ފާއިތުވި ރިޔާސީ އިންތިހާބުގެ ފުރަތަމަ ބުރުގައި އަމިއްލަ ގޮތުން ވާދަކުރެއްވި، ޑިފެންސް މިނިސްޓްރީގެ ކުރީގެ ޑެޕިއުޓީ މިނިސްޓަރު ހަސަން ޒަމީލް، ރިޔާސީ އިންތިޚާބަށްފަހު ހުށަހަޅަންޖެހޭ މާލީ ބަޔާން ގާނޫނާ އެއްގޮތަށް ހުށަހަޅާފައި ނުވާތީ އިލެކްޝަންސް ކޮމިޝަން (އީސީ) އިން ކުރި ޖޫރިމަނާ ފަސްކޮށްދިނުމަށް އޭނާ ސިވިލް ކޯޓުގައި އެދުނު އަމުރު އެ ކޯޓުން ނެރެއެއް ނުދިނެވެ.
ރިޔާސީ އިންތިޚާބު 2023 ގެ ކެންޑިޑޭޓުންގެ މާލީ ބަޔާން އިލެކްޝަންސް ކޮމިޝަނުން ދިރާސާ ކުރުމަށްފަހު، އިންތިޚާބުތަކާ ބެހޭ ޢާންމު ޤާނޫނުގައި ބަޔާންކުރާ މިންގަނޑުތަކަށް ނުފެތޭ 5 ކެންޑިޑޭޓަކަށާއި، އެ 5 ކެންޑިޑޭޓުންގެ އިންތިޚާބީ އޭޖެންޓުންނަށް ޤާނޫނުގައިވާ ގޮތުގެ މަތީން، ފިޔަވަޅު އަޅަން އިލެކްޝަންސް ކޮމިޝަނު އެކެނޑިޑޭޓުން ވަނީ ޖޫރިމަނާ ކޮށްފައެވެ.
އިލެކްޝަންސް ކޮމިޝަނުން ބުނެފައިވަނީ، އެކޮމިޝަނުން ފިޔަވަޅު އަޅާފައިވަނީ، ރިޔާސީ އިންތިޚާބު 2023 އަށް ކުރިމަތިލި 08 ކެންޑިޑޭޓުންގެ މާލީ ބަޔާން އެ ކޮމިޝަނަށް ލިބި، އެ ބަޔާންތައް ކޮމިޝަނުން ދިރާސާކުރުމަށްފަހު، ޤާނޫނު ނަންބަރު 2008/11 (އިންތިޚާބުތަކާބެހޭ ޢާންމު ޤާނޫނު) ގައި ބަޔާންކޮށްފައިވާ ކަންކަން ފުރިހަމަނުވާ މާލީ ބަޔާންތައް ހުށަހަޅާފައިވާ ކެންޑިޑޭޓުންނާއި، އެ ކެންޑިޑޭޓުންގެ ރަސްމީ އިންތިޚާބީ އޭޖެންޓާ މެދު އިންތިޚާބުތަކާބެހޭ ޢާންމު ޤާނޫނު ގެ 75 ވަނަ މާއްދާގެ (ށ) ގެ ދަށުން ކަމުގައެވެ.
ޒަމީލްގެ ފަރާތުން އީސީގައި އެދިފައިވަނީ، މި މައްސަލައިގައި އެ ފަރާތުން ހުށަހަޅަން ގަސްތު ކުރާ ޖުޑިޝަލް ރިވިއުގެ މައްސަލަ ކޯޓަށް ހުށަހަޅައި އެ މައްސަލައާ މެދު ކޯޓުން ގޮތެއް ކަނޑައަޅަންދެން، އޭނާއާއި މަހްރާން އީސީން ކޮށްފައިވާ ޖޫރިމަނާއަށް އަމަލުކުރުން ފަސްކުރެވިފައިވާ ކަމަށް އީސީގެ މައްޗަށް ވަގުތީ އަމުރެއް ނެރެދިނުމަށެވެ.
މި މައްސަލައާ ގުޅިގެން ސިވިލް ކޯޓުގެ އިސްގާޒީ މަރިޔަމް ވަހީދު ނިންމެވި ނިންމެވުމުގައި ވިދާޅުވެފައިވަނީ، އީސީން އެ ދެބޭފުޅުން ކޮށްފައިވާ ޖޫރިމަނާއަކީ އެ ކޮމިޝަނަށް ދެއްކިޔަސް، ކޯޓަށް މައްސަލަ ހުށަހަޅައިގެން އީސީއާ ދެކޮޅަށް ކޯޓުން މައްސަލަ ނިމޭ ހާލަތުގައި އަނބުރާ އެ ފަރާތްތަކަށް ލިބިގެންދާނެ ފައިސާއެއް ކަމަށެވެ.
އެހެންކަމުން ސުޕްރީމް ކޯޓާއި ހައިކޯޓުން ބަޔާންކޮށްފައިވާ އުސޫލުގެ އަލީގައި، މި މައްސަލައަކީ ވަގުތުން ފިޔަވަޅު ނާޅައިފިނަމަ ފޫ ނުބެއްދޭވަރުގެ ބޮޑު ގެއްލުމެއް ލިބުމުގެ އިހުތިމާލު ފާޅުކަން ބޮޑު ގޮތެއްގައި ފެންނަން އޮތް މައްސަލައެއްތޯ ބަލާ އިރު، މިއީ ފައިސާއިން ބަދަލު ދެވިދާނެ ގެއްލުމަކަށްވާތީ، މި މައްސަލައަކީ މައުލޫއީ މައްސަލައެއް ހުށަހެޅުމުގެ ކުރިން ވަގުތީ އަމުރަކުން އަވަހަށް ފިޔަވަޅު އަޅަންޖެހޭ ބާވަތުގެ މައްސަލައެއް ކަމަށް ދެކެވަޑައިނުގަންނަވާ ކަމަށްވެސް ކޯޓުގެ ނިންމުމުގައި ވިދާޅުވެފައި ވެއެވެ.
އެހެންކަމުން ސިވިލް ކޯޓުން ނިންމާފައިވަނީ މި މައްސަލައިގައި ޒަމީލްގެ ފަރާތުން ނެރެދިނުމަށް އެދިފައިވާ ވަގުތީ އަމުރު ނެރެދެވޭނެ ތަނެއް ނެތްކަމަށް ކަމަށެވެ.
