ރާއްޖެއިން ބޭރުން އާއިރު ފޮށިން ފެނުނު މަސްތުވާތަކެއްޗާއި ގުޅިގެން ހައްޔަރުކުރި ދެމަފިރިން ހައްޔަރުކޮށް ބަންދަށް 15 ދުވަސް ޖަހައިފިއެވެ.
ކްރިމިނަލް ކޯޓުންބަންދު ޖަހާދީފައިވަނީ އުމުރުން 27 އަހަރުގެ ފިރިހެނަކާއި 20 އަހަރުގެ އަންހެނަކަށެވެ. އެމީހުން ރާއްޖެިއން ބޭރުން އާއިރު ފޮށިން 6 ޕެކެޓުގެ މަސްތުވާތަކެތި ފެނުނުކަމަށް ވަނީ ތުހުމަތުކޮށްފައެވެ. އޭގެ ބަރުދަނުގައި 994 ގްރާމް ހުރިކަމަށް ތަހުގީގަށް ފާހަގަވެފައިވާކަމަށް ފުލުހުން ކޯޓުގައި ބުނެފައިވެއެވެ.
އޭގެ ތެރެއިން ފިރިހެންމީހާގެ ކުޑަކަމުދާ ތަކެތިން ހެދި ޓެސްޓުތަކުން ސީއޯސީ، ޓީއެޗްސީ އަދި ބެންޒޯއަށް ޕޮޒިޓިވްވެފައިވާކަމަށް ކޯޓުގެ ޢަމުރުގައި ބުނެފައިވެއެވެ.
ކޯޓުގައި އެމީހުން ބުނެފައިވަނީ އެއީ އެހެން މީހަކު ހަވާލުކުރި ތަކެތިކަމަށެވެ. އެއީ އެ ފިރިހެން މީހާގެ ތަކެތި ނޫންކަމަށްވެސް ބުނެފައިވެއެވެ.
އެ ފޮށިން ވަނީ އެ ދެމަފިރިންގެ އަންނައުނު ފެނިފައެވެ. ނަމަވެސް އަންހެން މީހާވެސް ވަނީ އެއީ އެމީހުން ގެނައި އެއްޗެއް ނޫންކަމަށް ބުނެފައެވެ. އަދި ފޮށީގައި މަސްތުވާތަކެތި ހުރިކަން ނޭނގޭކަމަށްވެސް އެ އަންހެންމީހާ ބުނެފައިވެއެވެ.
އެ އަންހެންމީހާގެ އަތްދަބަހުން 1،751 ޑޮލަރު ވެސް ފެނިފައިވާކަމަށް ތަހްގީގަށް އެނގިފައިވާކަމަށް ބުނެފައިވެއެވެ.
