ރައްޔިތުންގެ މަޖިލީހުގެ އިންތިޚާބުގައި ވާދަންކުރަން ކުރިމަތިލާ މީހުންނަށް ކުށުގެ ރެކޯޑު ސާފުކޮށްދިނުމުގެ އިންތިޒާމު ޕްރޮސެކިއުޓަރ ޖެނެރަލްގެ އޮފީހުން ފަސޭހަކޮށްދީފިއެވެ.
އެ އޮފީހުން ބުނީ، އަންނަ މަރޗްމަހު ބާއްވާ ރައްޔިތުން މަޖިލީހުގެ އިންތިޚާބުގައި ވާދަކުރާ ފަރާތްތަކުގެ ތެރެއިން ކުށުގެ ރެކޯޑެއް ނެތް މީހަކުނަމަ، އެމީހަކު ރެކޯޑަށް އެދޭތާ 5މިނިޓު ތެރޭގައި ރެކޯޑު ސާފުކޮށްދޭނެ ކަމަށެވެ. އަދި، ރެކޯޑެއް އޮތްނަމަ 24 ގަޑިއިރުުތެރޭ ސާފުކޮށްދޭނެކަމަށް ޕީޖީން ބުންޏެވެ.
މަޖިލިސް އިންތިޚާބަށް ކުރިމަތިލާން އެދޭ ފަރާތްތަކުން އިންތިޚާބަށް ކުރިމަތިލުމަށް އެދި ހުށަހަޅަންޖެހޭ ތަކެތީގެ ތެރޭގައި ކުށާއި ދަރަނީގެ ރެކޯޑު ފޯމު ހިމެނެއެވެ. މިއާއެކު އީސީން ވަނީ ކުށާއި ދަރަނީގެ ރެކޯޑު ދުރާލާ ސާފުކުރުމުގެ ކަންކަން ކުރިޔަށް ގެންދިޔުމަށް އިލްތިމާސްކޮށްފައެވެ.
ޕީޖީން ވަނީ ކުށުގެ ރެކޯޑު ސާފުކުރުމަށް އެއްވެސް ސުވާލެއް އޮތްނަމަ، އެ އޮފީހުގެ ނަންބަރު 3000655 އާ ގުޅުމަށް އެދިފައެވެ.
މަޖިލިސް އިންތިޚާބު އޮންޏާނީ މާރިޗު 17ގައެވެ. އަދި އިންތިޚަބަށް ކުރިމަތިލުމުގެ ފުރުޞަތު މިމަހުގެ 30ގައި ހުޅުވާލުމަށް ވަނީ ނިންމާފައެވެ.
