ރައްޔިތުން ހަވާލުކުރި މަސްއޫލިއްޔަތު އަދާކުރުމުގައި ދެގޮތެއްނުވެ ދެމިހުންނާނެ ކަމުގެ ޔަގީންކަން މާލޭ ސިޓީ ކައުންސިލްގެ މޭޔަރުކަމަށް އިންތިޚާބު އާދަމް އާޒިން ދެއްވައިފިއެވެ.
އޭނާ މިކަން ގާމަކޮށްފައިވަނީ ރައީސް މުއިއްޒު އޭނާއަށް ގުޅުއްވާ މަރުހަބާ ވިދާޅުވިކަމަށްޓަކާ ޝުކުރު އަދާކުރައްވާ ކުރެއްވި އެކްސް ޕޯސްޓެއްގައެވެ.
އާޒިމްގެ އެކްސް ޕޯސްޓުގައި ވިދާޅުވީ، އޭނާއަށް ގުޅުއްވާ ތަހުނިޔާ ވިދާޅުވެ އަދި އެއްބާރުލުން ދެއްވާނެކަމުގެ ޔަޤީންކަންދެއްވިކަމަށްޓަކާ ރައީސް މުއިއްޒުއަށް ޝުކުރު ދަންނަވާ ކަމުގައެވެ.
އަޅުގަނޑުގެ ތަސައްވުރަކީ، ސަރުކާރާއި މުއައްސަސާތަކާ ގުޅިގެން، ރައްޔިތުންގެ ޚިޔާލާއިއެކު މާލެ ސިޓީ ތަރައްގީކޮށް ރައްޔިތުން އުޅޭހިތުން އުޅޭ ސިޓީއަކަށް މާލެސިޓީ ހަދާދިނުން. އެންމެން ގުޅިގެން އެއްބައިވަންތަކަމާއިއެކު މަސައްކަތްކުރުމަކީ އެންމެން އެދިއެދި ތިބި ހިތްފަސޭހަކަމާއި، ފަހިކަން މާލެ ސިޓީއަށް ގެނައުމަށް މުހިއްމުކަމެއް. ރައްޔިތުން އަަޅުގަނޑަށް އިތުބާރުކުރައްވާ ހަވާލުކުރި މަސްއޫލިއްޔަތު އަދާކުރުމުގައި ދެގޮތެއްނުވެ އިރާދަކުރެއްވިއްޔާ ދެމިހުންނާނަން.
އާދަމް އާޒިމްގެ އެކްސް ޕޯސްޓުގައި ވިދާޅުވެފައި ވެއެވެ.
މިދިޔަ ހޮނިހިރު ދުވަހު ބޭއްވި ބައި އިލެކްޝަންގައި މޭޔަރުގެ ގޮނޑި ކާމިޔާބު ކުރެއްވި، އާޒިމަށް
7،621 ވޯޓު ލިބިވަޑައިގެންނެވި އެވެ. އާޒިމްއާ ވާދަކުރެއްވި ޕީއެންސީގެ ކެންޑިޑޭޓު އަދި ކުރީގެ ބަންޑާރަ ނައިބު އައިޝަތު އާޒިމާ ޝަކޫރަށް ލިބިވަޑައިގެންނެވީ 5،031 ވޯޓެވެ.
ތިން ވަނަ އަށް ދިޔަ ޑިމޮކްރެޓްސްގެ ކެންޑިޑޭޓު މުހައްމަދު ސައިފް ފާތިހަށް 2،343 ވޯޓު ލިބިވަޑައިގެންނެވި އިރު، ކުރީގެ ރައީސް އަބްދުﷲ ޔާމީންގެ ތާއީދާ އެކުގައި ހަތަރު ވަނަ އަށް ދިޔަ ކުރީގެ ޕޮލިސް ކޮމިޝަނަރު ހުސެއިން ވަހީދަށް 1،888 ވޯޓު ލިބިވަޑައިގަތެވެ. އަދި އަމިއްލަ ގޮތުން ވާދަކުރެއްވި ޝުއައިބު އަލީ އަށް 125 ވޯޓު ލިބިވަޑައިގަތެވެ.
މި ބައި އިލެކްޝަންގައި ބާތިލް ވޯޓުގެ ގޮތުގައި 402 ވޯޓު ކަނޑައަޅާފައިވެ އެވެ.
ކައުންސިލްގެ ތިން ގޮނޑީގެ ތެރެއިން މެދު ހެންވޭރު ދާއިރާގެ ގޮނޑި އެމްޑީޕީގެ ކެންޑިޑޭޓް، އަހުމަދު ރިޝްވާން ކާމިޔާބު ކޮށްފައިވާއިރު، ހެންވޭރު ދެކުނު ދާއިރާގެ ގޮނޑި ޕީއެންސީގެ ކެންޑިޑޭޓް އައިމިނަތު ރިޝްފާ އެވެ. އަދި މާފަންނު ދެކުނު ދާއިރާގެ ކައުންސިލްގެ ގޮނޑި ކާމިޔާބު ކުރީ ޕީއެންސީގެ ކެންޑިޑޭޓު ހަސަން ނިޒާމެވެ.
