އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން، (އެސްޑީއެފްސީ)ގެ ޑެޕިއުޓީ މެނޭޖިން ޑިރެކްޓަރުކަމުގެ މަގާމަށް, ބޭފުޅަކު އައްޔަން ކޮށްފިއެވެ.
އެސްޑީއެފްސީ ޑެޕިއުޓީ މެނޭޖިން ޑިރެކްޓަރުކަމުގެ މަގާމަށް އައްޔަން ކޮށްފައިވަނީ ފާތިމަތު މީޒާ އާދަމް އެވެ.
ފާތިމަތު މީޒާ އާދަމް ވަނީ ބޭންކް އޮފް މޯލްޑިވްސް (ބީއެމްއެލް)ގެ ސީނިއާ ކްރެޑިޓް އޮފަސަރެއްގެ ގޮތުގައި ގިނަ އަހަރުތަކަކަށް މަސައްކަތްކުރައްވާފައެވެ. އޭނާ އެންމެ ފަހުން މަސައްކަތް ކުރެއްވީ ދިވެހި އިންވެސްޓްމަންޓް ޕާޓްނާސްގެ ކޯޕަރޭޓް އެފެއާސް މެނޭޖަރުގެ މަގާމުގައެވެ.
މީޒާ ވަނީ ޔުނިވާސިޓީ އޮފް ވެސްޓް އިންގްލޭންޑުން މާސްޓާ އޮފް ބިޒްނަސް މެނޭޖްމަންޓް (އެމްބީއޭ) ހާސިލްކުރައްވާފައެވެ. އަދި އެކައުންޓިން އަދި ފައިނޭންސްގެ ދާއިރާއިން އުނިވާސިޓީ އޮފް ކޮލަމްބޯ އިން އޭނާވަނީ ފުރަތަމަ ޑިގްރީ ހާސިލްކުރައްވާފައެވެ.
އެސްޑީއެފްސީ އެމްޑީގެ މަގާމުގައި އަދިވެސް ހުންނެވީ ކުރީ ސަރުކާރުން އައްޔަނުކުރި، އަހުމަދު ޒީނާދެވެ.
