ރައީސުލްޖުމްހޫރިއްޔާ ޑޮކްޓަރ މުޙަންމަދު މުޢިއްޒާއި، އެމަނިކުފާނުގެ އަނބިކަނބަލުން ސާޖިދާ މުޙައްމަދު، މިއަދު ހެނދުނު ބަރލިންގްގެ ބޮޑު ފާރަށް ޒިޔާރަތްކުރައްވައި، އެތަނަށް ބައްލަވާލައްވައިފިއެވެ.
މި ޒިޔާރަތުގައި ރައީސުލްޖުމްހޫރިއްޔާގެ ދެކަނބަލުން ވަނީ އެތަނުގެ ގެސްޓު ފޮތުގައި ސޮއިކުރައްވާފައެވެ.
ބޮޑުފާރަކީ ވަރުގަދަކަމާއި، ދެމެހެއްޓެނިވިކަމާއި، އިންސާނިއްޔަތުގެ ކާމިޔާބީއާއި އެއްބައިވަންތަކަމުގެ ތާރީޚީ ރަމްޒެއްގެ ގޮތުގައި ރައީސުލްޖުމްހޫރިއްޔާ ޑޮކްޓަރ މުޢިއްޒު ފާހަގަކުރެއްވިއެވެ.
ގްރޭޓް ވޯލް އަކީ 21،000 ކިލޯމީޓަރުގެ ދިގު، ޗައިނާގެ ތާރީޚީ ލޭންޑްމާކކެވެ. އަދި، މިތަނުގެ ތާރީހީ، ސަގާފީ އަދި އާކިޓެކްޗަރަލް މުހިންމުކަމަށް ބަލައިގެންނެ، މިއީ ޔުނެސްކޯގެ ތަރިކައިގެ ގޮތުގައިވެސް ބެލައިގެންފައެވެ.
ރައީސުލްޖުމްހޫރިއްޔާގެ ދެކަނބަލުން ޗައިނާއަށް ކުރައްވަމުން ގެންދަވާ ފުރަމާނަ ދަތުރުފުޅަކީ، ޗައިނާގެ ރައީސް ޝީ ޖިންޕިންގެ ދައުވަތަކަށް ކުރައްވާ ފުރަމާނަ ދަތުރުފުޅެކެވެ. މި ދަތުރުފުޅުގައި ރައީސުލްޖުމްހޫރިއްޔާގެ ދެކަނބަލުންގެ އަރިހުގައި މަތީ ފަންތީގެ ވަފުދެއް ބައިވެރިވެވަޑައިގަންނަވައެވެ.
ކޮމެންޓު ފޮނުވާ