ކުރިޔަށް އޮތް މާލޭ ސިޓީގެ މޭޔަރ ބައި އިލެކްޝަންގައި އެމްޑީޕީގެ ޓިކެޓްގައި ވާދަކުރައްވާ އާދަމް އާޒިމް މާލޭ މޭޔަރުކަމަށް ވަޑައިގަންވަނީ އާޒިމް އަންނީ، ސަރުކާރަށް ޖެއްސުންކޮށް، އިތުރު ސަރުކާރެއް ހަދައިގެން ވަކި ވެރިކަމެއް ކުރާކަށް ނޫން ކަމުގައި ކުރީގެ ރައީސް ސާލިހު ވިދާޅުވެއްޖެއެވެ.
ރައީސް ސާލިހު މިހެން ވިދާޅުވީ، މިރޭ އޮތް، އެމްޑީޕީގެ "ފެހި ތަނަވަސް މާލެ" ކެމްޕޭން ނިންމުމުގެ ޖަލްސާގައި ވާހަކަ ދައްކަވަމުންނެވެ.
މިރޭގެ ޖަލްސާގައި ވަހަކަ ދައްކަވަމުން ރައީސް ސާލިހު ވިދާޅުވީ މިހާތަނަށް އިންތިހާބުކުރި މާލޭ ސިޓީ ކައުންސިލްތަކުން ފެނުނީ ވަކި ސަރުކާރެއް ހަދައިގެން ސަރުކާރާ ދެކޮޅަށް މަސައްކަތް ކުރަމުންދިޔަ މަންޒަރު ކަމަށެވެ. ނަމަވެސް އާޒިމަކީ އެފަދައިން އަމަލުކުރައްވާނެ ބޭފުޅެއް ނޫން ކަމަށް ސޯލިހު ވިދާޅުވި އެވެ.
މޭޔަރަކަށް އާދަމް އާޒިމް ނިކުމެ އެ ހުންނެވީ ގާނޫނީ ގޮތުން ކައުންސިލަށް މަތިކޮށްފައިހުރި މަސައްކަތްތަކެއް ކުރަން. އިތުރު ސަރުކާރެއް ހަދައިގެން ވަކި ވެރިކަމެއް ކުރާކަށް ނޫން. އަދި ނޫނިއްޔާ މިހާރު މި އޮތް ސަރުކާރަށް ޖެއްސުން ކުރާކަށް ވެސް ނޫން.
މިރޭގެ ޖަލްސާގައި ވާހަކަ ދައްކަވަމުން ރައީސް ސާލިހު ވިދާޅުވިއެވެ.
މިރޭގެ ޖަލްސާގައި ވާހަކަ ދައްކަވަމުން ރައީސް ސާލިހުވަނީ މި ސަރުކާރަށް ވަރަށް ބޮޑަށް ފާޑު ވިދާޅުވެފައެވެ. އެގޮތުން ރައީސް ސާލިހު ވިދާޅުވީ މިހާރު ކަން ހިނގަމުންދާގޮތަށް ބަލާއިރު، ސަރުކާރު ޖަވާބުދާރީ ކުރުވަން އެމްޑީޕީން އަލުން ނުކުންނަންޖެހޭ ކަމަށެވެ.
އެހެންނަމަވެސް، އެމްޑީޕީން ސަރުކާރު ޖަވާބުދާރީ ކުރުވަން މަސައްކަތް ކުރާނީ ޒިންމާދާރު ކަމާއެކު ކަމަށާއި އެކަން ނުކޮށްފިނަމަ ރާއްޖެ ބޮޑު އަނދަވަޅަކަށް ވެއްޓޭނެ ކަމަށް ވެސް ސޯލިހު ވިދާޅުވި އެވެ.
ރައީސް ސާލިހު އިތުރަށް ވިދާޅުވީ، އެމްޑީޕީގެ ސަރުކާރުން ރާއްޖޭގެ އެކި ކަންކޮޅުތަކުގައި ފަށާފައިވާ ތަރައްގީގެ މަޝްރޫއުތަކުގެ 70 ނުވަތަ 80 ޕަސެންޓް މިހާރު ހުރީ ހުއްޓައިލައިފައި ކަމުގައެވެ.
