ކުރީ ސަރުކާރުން ބޯހިޔާވަހިކަމަށް ޚާއްސަ ކޮށްގެން ތަރައްގީ ކުރުމަށް ފަށާފައިވާ ގުޅިފަޅުގައި މުނިސިޕަލް ހިދުމަތްތައް ގާއިމްކުރުމަށް ޗައިނާ ކުންފުންޏަކާ ހަވާލު ކޮށްފިއެވެ.
ޗަައިނާ ކުންފުންޏަކާ މި މަސައްކަތް ހަވާލު ކުރީ ރައީސް. މުއިއްޒު ޗައިނާ އަށް ކުރައްވަމުން ގެންދަވާ ފުރަމާނަ ދަތުރުފުޅުގެ ތެރެއިންނެވެ.
ޗައިނާ ކުންފުންޏާއެކު މި މަސައްކަތުގެ އެއްބަސްވުމުގައި ސޮއިކުރީ ޗައިނާގެ ސީއެމްއީސީގައި ބޭއްވި ހާއްސަ ރަސްމިއްޔާތެއްގައެވެ.
ޗައިނާ ކުންފުނީގެ ފަރާތުން އެއްބަސްވުމުގައި ސޮއިކުރެއްވީ ކުންފުނީގެ ރައީސް ފަންގް ޔަންޝުއީއެވެ. ރާއްޖޭގެ ފަރާތުން އެއްބަސްވުމުގައި ސޮއިކުރެއްވީ އިމާރާތް ކުރުމާއި ބިނާރާ ބެހޭ ވަޒީރު ޑރ. މުއްތަލިބެވެ.
މި އެއްބަސްވުމުގެ ތަފްސީލުތަކެއް އަދި ސަރުކާރުން ހާމަކޮށްފައެއް ނުވެއެވެ.
ދިވެހިރާއްޖެއާއި ޗައިނާއާ ދެމެދު އިއްޔެ ވަނީ މުހިންމު 20 އެއްބަސްވުމެއްގައި ސޮއިކޮށްފައެވެ. މި އެއްބަސްވުންތަކުގައި ސޮއިކުރުމުގެ ރަސްމިއްޔާތު އިއްޔެ ޝަރަފުވެރިކޮށްދެއްވީ ރައީސުލްޖުމްހޫރިއްޔާ ޑޮކްޓަރ މުޙަންމަދު މުޢިއްޒާއި، ޗައިނާގެ ރައީސް ޝީ ޖިންޕިންއެވެ.
އޭގެ ތެރޭގައި، ޗައިނާގެ އެހީގައި ފުށި ދިއްގަރު ފަޅުން ހިއްކާ ބިމުގައި ސޯޝަލް ހައުސިން ތަރައްގީކުރުމުގެ އެއްބަސްވުން ހިމެނެއެވެ.
އެ އެއްބަސްވުމުގައި ސޮއި ކޮށްފައިވަނީ، ޗައިނާގެ ޗައިނާ އިންޓަރނޭޝަނަލް ޑިވެލޮޕްމަންޓް ކޯޕަރޭޝަން އެޖެންސީއާއި، ރާއްޖޭގެ މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރއާ ދެމެދުއެވެ.
ޗައިނާ ދަތުރުފުޅު ނިންމަވާލެއްވުމަށް ފަހު ރައީސް ރާއްޖެ ވަޑައިގަންނަވަން ހަމަޖެހިފައިވަނީ މާދަމާ އެވެ.
ޗައިނާއަށް ކުރައްވަމުންގެންދަވާ ފުރަމާނަ ދަތުރުފުޅުގައި، ޗައިނާގެ ރައީސް ޝީ ޖިންޕިން ރާއްޖެ ވަޑައިގަންނަވަން ރައީސް މުހައްމަދު މުއިއްޒު ވަނީ ދައުވަތު ވެސް ދެއްވައިފަ އެވެ.
