ރާއްޖެ ސަރަހައްދުގައި ކޮޅިގަނޑެއް އުފެދި، ކުރިއަށް އޮތް ތިން ދުވަހު ވިއްސާރަ ކުރާނެ ކަމަށް ލަފާ ކުރެވޭ ކަމަށް މޫސުމާ ބެހޭ ގައުމީ އިދާރާ އިން ބުނެފިއެވެ.
މެޓް އޮފީހުން މިރޭ ބުނީ ރާއްޖޭގެ އިރުމަތީގައި އުފެދިފައިވާ ކޮޅިގަނޑު ރާއްޖެ ހުރަސްކޮށް އަރަބިކަނޑަށް ޖެހެމުންދާ ކަމަށް ލަފާ ކުރެވޭ ކަމަށެވެ. އެހެން ކަމުން ކުރިއަށް އޮތް ތިން ދުވަހު ރާއްޖޭގެ އެކިހިސާބަށް ވިއްސާރަ ކުރާނެ ކަމަށް ބެލެވޭ ކަމަށް މެޓުން ބުނެފައިވެއެވެ.
އަދި ވައިގަދަވެ ކަނޑުތައް ގަދަވާނެ ކަމަށް ލަފާކުރެވޭ ކަމަށް ވެސް ބުނެފައިވެއެވެ. އެހެންވެ މިކަމުގައި ސަމާލުވުމަށް މެޓުން އިރުޝާދު ދީފައިވެއެވެ.
މިދިޔަ ހަފްތާގެ އާދިއްތަ ދުވަހު ރާއްޖެ އަށް ބޯކޮށް ވާރޭ ވެހި، ބައެއް ރަށްރަށަށް ގެއްލުންވެފައިވެއެވެ. މާލެ ސަރަހައްދަށް ރެކޯޑް މިންވަރަށް ވާރޭ ވެހި މުޅި މާލެއާ ހުޅުލެ އަދި ހުޅުމާލޭގެ ބޮޑު ބައެއް ގައި ފެންބޮޑުވިއެވެ. އެންމެ ބޮޑު ގެއްލުމެއް ވިއްސާރައިގައި ވެފައި ވަނީ މާލޭގެ ގެތަކަށެވެ. މާލޭގެ 160 ގެއަކަށް ފެން ވަދެގެން އެކިވަރުގެ ގެއްލުން ލިބިފައިވެއެވެ.
