ރައީސް ޑރ. މުހައްމަދު މުއިއްޒުގެ ކެބިނެޓް ބައްދަލުވުމުގައި މުހިންމު މަޝްވަރާތަކެއް ކުރުމަށް ހަމަޖެހިއްޖެއެވެ.
ރައީސް އޮފީހުން މިއަދު އާންމު ކުރެއްވި ވީޑިއޯއެއްގައި ރައީސް ވިދާޅުވީ މިއަދުގެ ކެބިނެޓު ބައްދަލުވުމުގައި ވަރަށް މުހިންމު ކަންތައްތަކެއް މަޝްވަރާ ކުރަން އެބަހުރި ކަމަށެވެ. އެގޮތުން އެއް ކަމަކަށް ރައީސް މުއިއްޒު ފާހަގަ ކުރެއްވީ ރާއްޖޭގައި ޑިވެލޮޕްމަންޓް ބޭންކެއް އުފެއްދުމާ ގުޅޭ މަޝްވަރާއެވެ.
"މިއަދު ކެބިނެޓު ބައްދަލުވުމުގައި ވަރަށް މުހިންމު ކަންތައްތަކެއް އެބަހުރި މަޝްވަރާ ކުރަން ނިންމާފައި. އޭގެ ތެރޭގައި ރާއްޖޭގެ ޑިވެލޮޕްމަންޓް ބޭންކެއް އުފެއްދުމުގެ ކަންކަމުގައި މަޝްވަރާ ކުރުން އެބަ އޮތް،" ރައީސް ވިދާޅުވިއެވެ.
އަދި އޮންލައިން ޕޭމަންޓް ޕްލެޓްފޯމް ބޭނުންކޮށްގެން ފައިސާ ދެއްކުމުގައި ހުރި ހުރަސްތައް ނައްތާލުމާ ގުޅޭ މަޝްވަރާތަކާއި ފަތުރުވެރިކަމުގެ ދާއިރާއަށް ސޯޝަލް ހައުސިން ވަކި ކެޓަގަރީއެއް ތައާރަފް ކުރުމާ ގުޅޭ ގޮތުންނާއި މީޑިއާ ވިލެޖާ ގުޅޭ މަޝްވަރާތައް ކުރައްވާނެ ކަމަށް ރައީސް ވިދާޅުވިއެވެ.
"އަދި އޮންލައިން ޕޭމަންޓު ޕްލެޓްފޯމްތައް ބޭނުންކޮށްގެން ޕޭ ކުރުމުގައި ހުރި ހުރަސްތައް ނައްތާލުމުގެ ވާހަކަ އެބަ އޮތް. ދެން ފަތުރުވެރިކަމުގެ ދާއިރާއަށް ސޯޝަލް ހައުސިން ކެޓަގަރީއެއް ތައާރަފު ކުރުމުގެ ވާހަކަ އާއި މިކަހަކަ ވަރަށް މުހިންމު ވާހަކަތައް އެބަހުރި،" ރައީސް ވިދާޅުވިއެވެ.
ރައީސް ފުރަމާނަ ދަތުރުފުޅެއްގައި މިރޭގެ ވަގުތެއްގައި ޗައިނާ އަށް ފުރާވަޑައިގަތުމަށް ވަނީ ހަމަޖެހިފައެވެ. ޗައިނާގެ ރައީސް ޝީ ޖިންޕިންގެ ދައުވަތަކަށް ކުރައްވާ މި ދަތުރުފުޅުގައި ސަރުކާރުގެ މަތީ ފެންވަރުގެ ވަފްދެއް ވެސް ބައިވެރިވެވަޑައިގަންނަވައެވެ.
ކޮމެންޓު ފޮނުވާ