އެމްޑީޕީގެ ޓިކެޓުގައި މާލޭގެ މޭޔަރުކަމަށް ވާދަކުރައްވާ އާދަމް އާޒިމް މިއަދު ވިލިމާލޭގެ 100 އަށްވުރެ ގިނަ ގެއަށް ޒިޔާރަތްކޮށް ރައްޔިތުންގެ ހާލު ބައްލަވައިފިއެވެ.
އާޒިމް މިއަދު ކުރިއަށް ގެންދިޔަ ޓީޓުދޯގެ ހަރަކާތުގައި އެމްޑީޕީގެ ޗެއާޕާސަން ފައްޔާޒު އިސްމާއީލް، ކުރީގެ ފޮރިން މިނިސްޓަރު ޝާހިދުގެ އިތުރުން އެމްޑީޕީގެ ލީޑާޝިޕުގެ އިސް ބޭފުޅުން ބައިވެރިވެ ވަޑައިގެންނެވިއެވެ.
މިހަރަކާތުގައި އުޅުއްވަމުން އާޒިމް ވިދާޅުވެފައިވަނީ ވިލިމާލޭގެ މީހުންނަށާއި އެ ރަށަށް ޒިޔާރަތްކުރާ މީހުންނަށް އެކަށީގެންވާ ވަސީލަތްތައް ގާއިމްވެފައި ނެތްކަމަށާއި، އެރަށާމެދު ވަރަށް ބޮޑު އިހުމާލެއްވެފައިވާ ކަމަށެވެ.
އަދި އާޒިމް ވިދާޅުވީ މާލޭ ސަރަހައްދުގެ މުނިސިޕަލް ހިދުމަތްތައް ރަނގަޅުވާނީ، ވިލިމާލެވެސް ބާކީ ނުކޮށް، އެރަށްވެސް ހިމެނޭގޮތުން ޚިދުމަތްތައް ފުރިހަމަ ކުރެވި، ޚިދުމަތް ފޯރުކޮށްދެވެން ފެށި ދުވަހަކުން ކަމުގައެވެ.
މާލޭގެ މޭޔަރުގެ ގޮނޑި ހުސްވީ އެ މަގާމުގައި ކުރިން ހުންނެވި ޑރ. މުހައްމަދު މުއިއްޒު ރިޔާސީ އިންތިހާބުގައި ވާދަކުރައްވައި ހޯއްދެވި ކާމިޔާބީއާ އެކުގައި މިދިޔަ މަހުގެ 17 ވަނަ ދުވަހު ރައީސުލްޖުމްހޫރިއްޔާ ކަމުގެ ހުވާ ކުރެއްވުމުންނެވެ. ރައީސް މުއިއްޒާ އެކުގައި ސަރުކާރުގެ އެކިއެކި މަގާމުތަކަށް ވަޑައިގަތުމަށް މާލެ ސިޓީ ކައުންސިލްގެ ތިން ކައުންސިލަރުން ވެސް އިސްތިއުފާ ދެއްވާފައިވެއެވެ.
މި ގޮނޑިތަކަށް ބޭފުޅުން އިންތިހާބު ކުރުން އޮންނާނީ އަންނަ ޖެނުއަރީ މަހުގެ 13 ވަނަ ދުވަހު ކަމަށް އިލެކްޝަންސް ކޮމިޝަން (އީސީ) އިން ބުންޏެވެ.
މާލޭގެ މޭޔަރު ކަމަށް ވާދަކުރައްވާނެ ބޭފުޅުންގެ ތެރޭގައި ދެން ހިމެނެނީ ޕީއެންސީގެ ޓިކެޓުގައި ވާދަކުރާ ކުރީގެ ބަންޑާރަނައިބު އާޒިމާ ޝަކޫރުއާއި، މިހާރު މާލޭ ސިޓީ ކައުންސިލްގެ ގަލޮޅު އުތުރު ދާއިރާގެ ކައުންސިލަރު މުހައްމަދު ސައިފް ފާތިހު އާއި ކުރީގެ ޕޮލިސް ކޮމިޝަނަރު ހުސައިން ވަހީދުގެ އިތުރުން މިނިވަން މެމްބަރެއްގެ ގޮތުގައި ފުރަހަނި ޝުއައިބުއެވެ.
