ހާސްކަމާއި ގޮންޖެހުންތަކާއި ނުތަނަވަސްކަމުން ފުރިގެންވާ، އަދި ސިޔާސީ ބޮޑު ބަދަލެއް ގައުމު ދުށް އަހަރެއް ފާއިތުވެގެން ދިއުމަށްފަހު، މުޅި ދުނިޔެ މިއަދު މިވަނީ، އުއްމީދީ އާއަހަރަކަށް އަނެއްކާވެސް މަރުހަބާ ކިޔާފައެވެ.
މިގޮތުން ދުނިޔޭގެ އެކި ކަންކޮޅުތަކުން ރެއާއި މިއަދު 2024 ވަނަ އަހަރަށް، ބަޑިބޭހާއި މުއިޒިކާއި އަދި އެނޫންވެސް ތަފާތު އެތައް ހަރަކާތަކާއެކު މަރުހަބާ ކިޔާފައިވާއިރު، ރާއްޖޭގައިވެސް ރިސޯޓުތަކުގައި ވަނީ އާއަހަރަށް މަރުހަބާ ކިޔާފައެވެ.
އާއަހަރަށް މަރުހަބާ ކިޔުމަށް ސަރުކާރުން އިންތިޒާކުރި މިއުޒިކީ ފެސްޓިވަލް ވަނީ މިހާރު މާލެއަށާއި ރާއްޖޭގެ އެކި ކަންކޮޅުތަކަށް ކުރަމުންދާ ވިއްސަރައިގެ ސަބަބުން ފަސްކޮށްފައެވެ.
އިގްތިސަދީ ގޮތުންނާއި އަދި ހަގުރާމާއިގެ ބިރުވެރިކަމުން އެތައް އުދާސްތަކެއް ގެނުވި 2023 ވަނަ އަހަރަށް ދުނިޔެ އަލްވަދާއި ކިޔުމަށްފަހު، އާއަހަރަށް މަރުހަބާ ކިޔުމުގެ ގޮތުން ގިނަބަޔަކު އާއަހަރުގެ ތަހުނިޔާ ބަދަލުކޮށް، ފެށިގެންދިޔަ 2024 ވަނަ އަހަރަކީ އުއްމީދީ އަހަރެއްގެ ގޮތުގައި ސިފަކޮށް، އާއަހަރަށް ދެކޭ ހުވަފެންތަކުގައި ހަގީގީ ކުލަ ޖެއްސުމަށް ގިނަ ބަޔަކު ކަމަރު ބަނދެފައިވާއި، ކުރިޔަށް އޮތް އަހަރުވެސް ވެގެންދާނީ އިގްތިސާދީ ގޮތުންނާއި އަދި ދޭދޭ ގައުމުތަކުގެ މެދުގައި ހުރި ބޮޑެތި މައްސަލަތަކުން ދުނިޔޭގެ ސަލާމަތަށް އެތައް ނުރައްކަލެއް ކުރިމަތި ކުރުވާނެ އަހަރެއްގެ ގޮތުގައި ގިނަ ބަޔަކު ދަނީ ސިފަކުރަމުންނެވެ.
މިގޮތުން، ޢައްޒާއަށް އިސްރާއީލުން ދެމުންދާ އަނިޔާވެރި ލާއިންސާނީ ހަމަލާތައް ހުއްޓުމަކަށްއައިސް، ފަލަސްތީނުގެ ރައްޔިތުން މިނިވަންކަމަށް ކުރަމުންދާ ޖިހާދަށް ނަސްރުލިބި، އާ އަހަރު ފެށިގެންދިޔައީ، ހަނގުރާމަ ހުއްޓުމަކަށް އަންނާކަމަށް އެތައްބަޔަކު އަދިވެސް ކުރަމުންދާ އުއްމީދުތަކާއެކީވެސް މެއެވެ.
ހަމަ އެއާއެކު، ފާހަގަ ވާން އޮތްކަމަކީ މީލާދީ އާއަހަރަށް ދިވެހިރާއްޖެއިންވެސް މަރުހަބާ ކިޔާފައިވާއިރު، މިފެށޭ އަހަރަކީ ދިވެހިރާއްޖެއަށް ހުރިހާ ގޮތަކުންވެސް މުހިންމު އަހަރަކަށް ވެގެންދާނޭ ކަމެވެ. އާ ސަރުކާރެއް އިންތިޚާބުވެ، އާއަހަރު ފެށިގެންދިޔައިރު ސިޔާސީ ގޮތުން ގައުމު މިވަނީ މުޅިން އާ ދުވަހަކަށް އަލިވިލާފައެވެ.
އާ ސަރުކާރެއް، ސިޔާސީ ބޮޑު ބަދަލެއް!
މުޅި ދުނިޔެވެސް އާ އަހަރަކަށް މަރުހަބާ ކިޔާފައިވާއިރު، ކުރިޔަށް މިއޮތް 2024 ވެގެންދާނީ ދިވެހިރާއްޖެއަށް ހުރިހާ ގޮތަކުންވެސް ޚާއްސަ އަހަރެއް ކަމުގައެވެ. އޭގެ އެންމެ ބޮޑު އެއް ސަބަބަކީ މިއަހަރަކީ އެތައް ބައެއްގެ އުއްމީދާއި ގުޅިފައިވާ، އާ ސަރުކާރެއް އިންތިޚާބު، ސިޔާސީ ގޮތުން އަދި އެނޫން ގޮތްގޮތުންވެސް ބޮޑު ބަދަލަކާ ގައުމު ކުރިމަތިލާ އަހަަރަކަށް ވެގެންދާނެތީއެވެ.
މިގޮތުން، 2023 ވަނަ އަހަރުގެ ރިޔާސީ އިންތިޚާބު ފާއިތުވެދިޔަ އަހަރުގެ ސެޕްޓެމްބަރުމަހު ނިމި، އެ އިންތިޚާބުން ކުރީގެ ރައީސް ސަލިހު ބަލިވެ، ރައީސް މުއިއްޒު ވަނީ ރާއްޖޭގެ ވެރިކަމާއި ހަވާލުވެވަޑައިގެންފައެވެ. ފާއިތުވި ނޮވެމްބަރުމަހުގެ 17 ވަނަ ދުވަހު ރައީސް މުއިއްޒު ވެރިކަމުގެ ހުވާ ކުރެއްވުމަށްފަހު، މިހާރުވަނީ އާ ސަރުކާރު އެކުލަވާލާ، އާސަރުކާރުގެ ސިޔާސަތުތައް ތަންފީޒު ކުރައްވަން ފައްޓަވާފައެވެ.
ހަމައެއާއެކު އާ އަހަރަށް މަރުހަބާ ކީއިރު، މިހާރު ސިޔާސީ ޕާޓީތަކުންނާއި، ސިޔާސީ ފަރާތްތަކުން ތައްޔާރުވަމުންދަނީ ކުރިޔަށް އޮތް ރައްޔިތުންގެ މަޖިލިހުގެ އިންތިޚާބަށެވެ. އެއިންތިޚާބުގެ މެޖޯރިޓީ ހޯދުމަށް ސަރުކާރާ އަދި އިދިކޮޅު ފަރާތްތަކުންވެސް ތައްޔާރުވަމުންދާއިރު، އެ އިންތިޚާބު ވެގެންދާނީ އެމައްޗަށް ކުރިޔަށް އޮތް ފަސް އަހަރުގެ ސިޔާސީ މަސްރަހު ބައްޓަންވެގެންދާނެ، މި ފެށުނު 2024 ވަނަ އަހަރު ސިޔާސީ ގޮތުން ފެނިގެންދާނެ އެންމެ ބޮޑު އެއް ބަދަލު ކަމުގައެވެ.
ގިނަ ބަޔަކު ގަބޫލުކުރާ ގޮތުގައި، ކުރިޔަށް އޮތް މަޖިލިސް އިންތިޚާބަށްފަހު ރައީސް މުއިއްޒުގެ ސިޔާސީ ކުރިމަގު ސާފުވެ، އެ އިންތިޚާބު ވެގެންދާނީ މި ސަރުކާރުގެ ދެމިއޮތުމާއިވެސް ގުޅި ލާމެހިގެންދާނެ މުހިންމު އިންތިޚާބެއް ކަމުގައެވެ.
ކުރެވޭ އުއްމީދުތައް!
މިފެށުނު 2024 ވަނަ އަހަރަކީ އިގްތިސާދީ ގޮތުންނާއި އަދި ދުނިޔޭގެ ސަލާމަތާއި ރައްކާތެރިކަމުގެ ގޮތުން ބަނަ އަހަރެއްގެ ގޮތުގައި ގިނަ ބަޔަކު ސިފަ ކުރިނަމަވެސް، އާއަހަރުގެ ފެށުން ގިނަ ބަޔަކު ފާހަގަކޮށްފައިވަނީ 2024ވަނަ އަހަރަކީ އުއްމީދީ އަހަރަކަށް ވެގެންދާނޭކަމުގެ ފޮނު އުއްމީދުތަކާއެކުއެވެ.
ހަމަ އެބީދައިން، ދިވެހިރާއްޖޭގެ އިގްތިސާދަށް އަންނަނަމުންދާ ހެޔޮ ބަދަލުތަކާއި، އަދި ދައުލަތުގެ އާމްދަނީއަށް 2024ވަނަ އަހަރު އަންނާނެ ހެޔޮ ބަދަލުތަކާއެކު، ދައުލަތުގެ މުވައްޒަފުން ތިބީ މުސާރަތަކަށް އޭގެ ހެޔޮ ބަދަލުތަކެއް އަންނާނޭ ކަމުގެ އުއްމީދުގައެވެ. އަދި ކުރިޔަށް އޮތް އަަހަރު ރާއްޖެއަށް 2 މިލިއަން ފަތުރުވެރިން ގެނައުމަށް ރާއްޖެއިން ކަނޑައަޅާފައިވާ ލަނޑުދަނޑިއާއެކު، ފަތުރުވެރިކަމުގެ ސިނާއަތަށްވެސް އިތުރު ކުރިއެރުން ލިބި، އޭގެ އެދެވޭ ނަތީޖާ އިގްތިސާދުން ފެންނާނޭކަމުގެ އުއްމީދަކީވެސް 2024ވަނަ އަހަރުގެ އުއްމީދުތަކާއި ގުޅިފައިވާ މުހިންމު އަމާޒެއްކަންވެސް މިފުރުސަތުގައި ފާހަގަ ކޮށްލާން ޖެހެއެވެ.
އޭގެ އިތުުރުން އާއަހަރު ފެށިގެންދިޔައިރު، ގައުމުގެ ސިޔާސީ މަސްރަހަށް އައިސްފައިވާ ބޮޑު ބަދަލާއެކު، ގައުމުގައި އޮތް ސިޔާސީ ހަލަބޮލިކަމަށް އައިސްފައިވާ ހަމަހިމޭންކަން އެގޮތުގައި ދެމި އޮންނާނޭކަމުގެ އުއްމީދުގައި، ގިނަބަޔަކު ތިބީ މިފެށިގެންދިޔަ 2024 ވަނަ އަހަރަކީ ގައުމަށް ސިޔާސީ ގޮތުން ހަމަޖެހުމެއް ލިބި، ތަރައްގީއާއި ތަމައްދުނުގެ ރޮގުން އާ އުސްމިނަކަށް ދަތުރުކުރެވޭ ފާގަތި އަހަރަކަށް ވެގެންދާނޭކަމުގެ ފޮނި އުއްމީދުގައެވެ.
