ޕާކިސްތާނަށް ނިސްބަތްވާ އެކްޓްރެސް މާހިރާ ޚާން ވަނީ އޭނާ ކޮވިޑަށް ޕޮސިޓިވް ވިކަން އޭނާގެ އިންސްޓާގުރާމުގައި ހިއްސާކޮށްފަ އެވެ. އަދި އަވަހަށް ކަންތައްތައް ރަނގަޅުވާނެ ކަމަށް އުންމީދުކުރާކަމަށް ވަނީ ލިޔެފައެވެ.
އިންސްޓާގުރާމުގައި އޭނާ ކޮށްފައިވާ ޕޯސްޓުގައި ލިޔެފައިވަނީ ކޮވިޑަށް ޕޮސިޓިވް ވެއްޖެކަމަށާއި ކޮންޓެކްޓު ވެފައި ތިބި މީހުންނަށް މިހާރު އަންގާފައި ވާނެކަމަށެވެ. އަދި ﷲ އިރާދަކުރެއްވިއްޔާ ހުރިހާ ކަމެއް ރަނގަޅު ވާނެކަމަށާއި އެންމެންވެސް ރައްކާތެރިކަމުގެ ފިޔަވަޅު އަޅައިގެން ފަރުވާތެރިވެ އުޅެން މާހިރާ ނަސޭހަތްތެރިވެފަވެއެވެ.
View this post on Instagram
މާހިރާ ކޮވިޑަށް ޕޮސިޓިވް ވީކަން ހާމަކުރުމާއެކު ފިލްމީ ދާއިރާގެ ވަރަށް ގިނަ ފަންނާނުން ވަނީ ހެޔޮއެދުންތަކާއި އަވަސް ޝިފާއަކަށް އެދިފައެވެ. އެގޮތުން މޯނީ ރޯއީ، އަދްނާން މާލިކް އަދި މައިނަލް ޚާން ފަދަ ތަރިންވަނީ މާހިރާގެ ޕޯސްޓަށް ކޮމެންޓްކޮށްފަ އެވެ.
މާހިރާ އެންމެ ފުރަތަމަ ބޮލީވުޑަށް ނުކުތީ ޝާހްރުކް ޚާންގެ ފިލްމު "ރައީސް" އިން 2017 ވަނަ އަހަރު އެވެ. ނަމަވެސް 2016ގެ ޔޫރީ އެޓޭކްގެ ސަބަބުން މާހިރާ ޚާނަށް މި ފިލްމު ޕްރޮމޯޓް ކުރުމަށްޓަކައި އިންޑިއާއަށް އާދެވެގޮތްވަނީ ނުވެފައެވެ. ނަމަވެސް މާހިރާ ވަނީ ޕްރެސްއާއި ވީޑިއޯ ކޮންފަރެންސް އަކުން ބައްދަލުކޮށް އެ ފިލްމުގެ ރޯލުން އޭނާ އެންމެން ބަލައިގަތުމުން އުފާވާކަމަށް ބުނެފައެވެ.
ޔޫރީ އެޓޭކާ ގުޅިގެން ޕާކިސްތާނުގެ އެކްޓަރުން ވަނީ ބޮލީވުޑްގައި ބޭންކޮށްފަ އެވެ. އަދި އިންޑިއާ އެކްޓަރުން ޕާކިސްތާނުގައި ބޭން ކުރަންޖެހޭނެ ތޯ ސުވާލުކުރުމުން މާހިރާ ހާން ބުނެފައިވަނީ އެހެން ކަންތައް ކުރުމުން އެއްވެސްކަމެއް ރަނގަޅު ނުވާނެ ކަމަށެވެ.
ބޮލީވުޑްގައި އޭނަގެ ހަމައެކަނި ފެނިލުމުން ގިނަބައެއްގެ ލޯބި ހޯދި އެކްޓަރ މާހިރާ އަކީ ޕާކިސްތާނުގައި ޓީވީގެ އިތުރުން ބޮޑު ސްކްރީނުގައި ވެސް އެންމެ ހިނގާ އެއް ނަމެވެ.
