ރައްޔިތުންގެ މަޖިލިހުގައި ގިނަ ކަންކަން ފުނިޖެހިފައި ވަނިކޮށް އަނެއްކާވެސް މާދަމާ މަޖިލިސް ޖަލްސާއެއް އެޖެންޑާކޮށް، ވަޒީރުންނަށް ރުހުން ދިނުން ތާވަލް ނުކޮށް މަޖިލިހުގެ ޖަލްސާ އެޖެންޑާ ކޮށްފިއެވެ.
މިހާރު ރައްޔިތުންގެ މަޖިލިހުގެ އިދާރާއިން އާންމުކޮށްފައިވާ، މާދަމާގެ ޖަލްސާގެ އެޖެންޑާގައި ހިމަނާފައިވަނީ، ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނަށް އިޞްލާޙު ގެނައުމުގެ ބިލުގެ ފުރަތަމަ ކިޔުން އިއްވުމުގެ އިތުރުން ވަޒީރުންނާ ސުވާލުކުރުމުގެ ޤާނޫނު އުވާލުމުގެ ބިލުގެ ފުރަތަމަ ކިޔުން އިއްވުމެވެ.
އޭގެ އިތުރުން، މަޖިލީހުގެ މާދަމާގެ ޖަލްސާާގަ، ރައީސްގެ މޭޒުން ހުށަހަޅާ ކަންކަމުގެ ތެރޭގައި ވަނީ ރައީސް، ޑރ. މުހައްމަދު މުއިއްޒު ނޮވެމްބަރު 17 ގައި އުފައްދަވާފައިވާ ވުޒާރާތަކާއި އެ ވުޒާރާތަކުގެ މަސައްކަތުގެ ދާއިރާތައް މަޖިލީހުން ފާސްކުރުމަށްޓަކައި ފޮނުއްވަވާފައިވާ މައްސަލަ ދިރާސާކޮށް ގޮތެއް ނިންމުމަށް ދާއިމީ ކޮމިޓީއަށް ފޮނުވުމުގެ މައްސަލައާއި ޤާނޫނުގެ 93 ވަނަ މާއްދާގެ (ހ)ގެ ދަށުން "މިނަމާޓާ ކޮންވެންޝަން އޮން މަރކިއުރީ" ގައި ރާއްޖޭން ބައިވެރިވުމާމެދު މަޖިލީހުގެ ރުހުން ހޯދުމަށް ރައީސް ފޮނުއްވާފައިވާ މައްސަލަ ދިރާސާކޮށް ގޮތެއް ނިންމުމަށް ދާއިމީ ކޮމިޓީ ފޮނުވުމެވެ.
އޭގެ އިތުރުތަށް އެޖެންޑާގައި ވަނީ މެމްބަރުން ބިލްތަކަށް ހުށަހަޅާފައިވާ އިސްލާހުތަކާއި ބެހޭ ގޮތުން މަޝްވަރާ ކުރުމެވެ.
މަޖިލީހުގެ ގަވާއިދު ބުނާ ގޮތުން ޑިސެމްބަރު މަހު މަޖިލިސް ޗުއްޓީއަށްދާނެއެވެ. ނަމަވެސް މި ސަރުކާރުގެ ވަޒީރުންނަށް ރުހުން ނުދީ ދިގުދަންމާލާފައިވާތީ މަޖިލީހުގެ ދައުރު ނިމުންވެސް ލަސްކުރީއެވެ.
ވަޒީރުންނަށް ރުހުން ނުދީ މަޖިލިސް ޗުއްޓީއަށް ދާތީ މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ)އިން ވަނީ ކަންބޮޑުވުން ފާޅުކޮށްފައެވެ.
އެ ޕާޓީން މިއަދު ނެރުނު ނޫސްބަޔާނެއްގައި ބުނެފައިވަނީ މި ސަރުކާރުގެ ކެބިނެޓަށް ރުހުން ނުދީ ލަސްވަމުން ދިޔުމަކީ ބަލައިގަނެވޭނެ ކަމެއް ނޫން ކަމަށެވެ. އަދި މި ސަރުކާރަކީ ރައްޔިތުން އިންތިޚާބު ކޮށްފައިވާ ސަރުކާރެއް ކަމަށާއި، ކެބިނެޓަށް ރުހުން ނުދީ މަޖިލިސް ދައުރު ނިމި ޗުއްޓީއަށް ދާތީ އެޕާޓީން ކަންބޮޑުވާ ކަމަށެވެ.
ވަޒީރުންނަށް ރުހުން ދިނުމާއި ގުޅޭގޮތުން ގޮތެއް ނިންމުމަށް އެންމެ ފަހުން ބާއްވަން ތަޢާވަލުކުރި ސަރުކާރު މަސްޢޫލިއްޔަތު އަދާކުރަ މިންވަރު ބަލާ ކޮމިޓީގެ ބައްދަލުވުންވެސް ކޯރަމް ހަމަނުވުމުގެ ސަބަބުން ވަނީ ކެންސަލް ކޮށްފައެވެ. އަދި ރައްޔިތުންގެ މަޖިލިހުގެ ޖަލްސާތައްވެސް ކޯރަމް ހަމަނުވެގެން ބޭއްވޭ ގޮތް ވެފައިނުވާތާ ވަނީ ހަފްތާއެއް ވެފައެވެ.
ވަޒީރުންގެ މަޖިލިހަށް ރުހުން ހޯދުމަށް ރައްޔިތުންގެ މަޖިލިހުގެ ކޮމިޓީން މަޖިލިހުގެ ތަޅުމަށް ފޮނުވި ރިޕޯޓު ފުރިހަމަ ނުވާކަމަށް ނިންމާ، ރިޕޯޓު އެޖެންޑާއިން އުނިކޮށް އަލުން އިސްލާހު ކުރުމަށް ރިޕޯޓު އަލުން ކޮމިޓީއަށް ފޮނުވާފައިވަނީ މިމަހުގެ 18 ގައެވެ.
ކުރިން ކޮމިޓީން ވަޒީރުންނަށް ރުހުން ދިނުމަށް ފާސްކޮށްފައިވަނީ މިނިސްޓްރީތަކަށް ގެނައި މެންޑޭޓް ފާސްނުކޮށްކަމަށް ބުނެ، އަލުން ކޮމިޓީއަށް ތަޅުމުން މައްސަލަ ފޮނުވީއެވެ.
