ރައްޔިތުންގެ މަޖިލިހުގައި ގިނަ ކަންކަން ފުނިޖެހިފައި ވަނިކޮށް އަނެއްކާވެސް މާދަމާ މަޖިލިސް ޖަލްސާއެއް ބޭއްވުމަށް ތާވަލްކޮށްފިއެވެ.
މަޖިލީހުގެ ތިން ވަނަ ދައުރު ހަމަވާ މުއްދަތު ތިން ވަނަ ފަހަރަށް އިތުރުކުރީ މިމަހުގެ 18 ވަނަ ދުވަހުއެވެ. ރައްޔިތުންގެ މަޖިލީހުގެ ގަވާއިދުގެ 24 ވަނަ މާއްދާގައި ބަޔާންކޮށްފައިވާ، މި ހިނގާ ތިންވަނަ ދައުރު، 28 ޑިސެންބަރު 2023 ގެ ނިޔަލަށް ވަނީ އިތުރު ކޮށްފައެވެ.
ރައްޔިތުންގެ މަޖިލީހުން ޖަލްސާ މާދަމާގެ 9:00 އަށް ތާވަލްކޮށްފައިވާއިރު އެޖަލްސާގެ އެޖެންޑާ އަދި އާންމު ކޮށްފައެއް ނުވެއެވެ.
މަޖިލީހުގެ ގަވާއިދު ބުނާ ގޮތުން ޑިސެމްބަރު މަހު މަޖިލިސް ޗުއްޓީއަށްދާނެއެވެ. ނަމަވެސް މި ސަރުކާރުގެ ވަޒީރުންނަށް ރުހުން ނުދީ ދިގުދަންމާލާފައިވާތީ މަޖިލީހުގެ ދައުރު ނިމުންވެސް ލަސްކުރީއެވެ.
ވަޒީރުންނަށް ރުހުން ނުދީ މަޖިލިސް ޗުއްޓީއަށް ދާތީ މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ)އިން ވަނީ ކަންބޮޑުވުން ފާޅުކޮށްފައެވެ.
އެ ޕާޓީން މިއަދު ނެރުނު ނޫސްބަޔާނެއްގައި ބުނެފައިވަނީ މި ސަރުކާރުގެ ކެބިނެޓަށް ރުހުން ނުދީ ލަސްވަމުން ދިޔުމަކީ ބަލައިގަނެވޭނެ ކަމެއް ނޫން ކަމަށެވެ. އަދި މި ސަރުކާރަކީ ރައްޔިތުން އިންތިޚާބު ކޮށްފައިވާ ސަރުކާރެއް ކަމަށާއި، ކެބިނެޓަށް ރުހުން ނުދީ މަޖިލިސް ދައުރު ނިމި ޗުއްޓީއަށް ދާތީ އެޕާޓީން ކަންބޮޑުވާ ކަމަށެވެ.
ވަޒީރުންނަށް ރުހުން ދިނުމާއި ގުޅޭގޮތުން ގޮތެއް ނިންމުމަށް އެންމެ ފަހުން ބާއްވަން ތަޢާވަލުކުރި ސަރުކާރު މަސްޢޫލިއްޔަތު އަދާކުރަ މިންވަރު ބަލާ ކޮމިޓީގެ ބައްދަލުވުންވެސް ކޯރަމް ހަމަނުވުމުގެ ސަބަބުން ވަނީ ކެންސަލް ކޮށްފައެވެ. އަދި ރައްޔިތުންގެ މަޖިލިހުގެ ޖަލްސާތައްވެސް ކޯރަމް ހަމަނުވެގެން ބޭއްވޭ ގޮތް ވެފައިނުވާތާ ވަނީ ހަފްތާއެއް ވެފައެވެ.
ވަޒީރުންގެ މަޖިލިހަށް ރުހުން ހޯދުމަށް ރައްޔިތުންގެ މަޖިލިހުގެ ކޮމިޓީން މަޖިލިހުގެ ތަޅުމަށް ފޮނުވި ރިޕޯޓު ފުރިހަމަ ނުވާކަމަށް ނިންމާ، ރިޕޯޓު އެޖެންޑާއިން އުނިކޮށް އަލުން އިސްލާހު ކުރުމަށް ރިޕޯޓު އަލުން ކޮމިޓީއަށް ފޮނުވާފައިވަނީ މިމަހުގެ 18 ގައެވެ.
ކުރިން ކޮމިޓީން ވަޒީރުންނަށް ރުހުން ދިނުމަށް ފާސްކޮށްފައިވަނީ މިނިސްޓްރީތަކަށް ގެނައި މެންޑޭޓް ފާސްނުކޮށްކަމަށް ބުނެ، އަލުން ކޮމިޓީއަށް ތަޅުމުން މައްސަލަ ފޮނުވީއެވެ.
