އެ ޕާޓީން މިއަދު ނެރުނު ނޫސްބަޔާނެއްގައި ބުނެފައިވަނީ މި ސަރުކާރުގެ ކެބިނެޓަށް ރުހުން ނުދީ ލަސްވަމުން ދިޔުމަކީ ބަލައިގަނެވޭނެ ކަމެއް ނޫން ކަމަށެވެ. އަދި މި ސަރުކާރަކީ ރައްޔިތުން އިންތިޚާބު ކޮށްފައިވާ ސަރުކާރެއް ކަމަށާއި، ކެބިނެޓަށް ރުހުން ނުދީ މަޖިލިސް ދައުރު ނިމި ޗުއްޓީއަށް ދާތީ އެޕާޓީން ކަންބޮޑުވާ ކަމަށެވެ.

އެމްޑީއޭގެ ބަޔާނުގައި ބުނެފައިވަނީ، ވަޒީރުންނަށް ރުހުން ދިނުމަކީ ގާނޫނުން ރައްޔިތުންގެ މަޖިލީހަށް މަތިކޮށްފައިވާ ޒިންމާއެއް ކަމަށާއި، އެޒިންމާ އަދާކުރުން ލަސްވާތީ ކަންބޮޑުވާ ކަމަށެވެ. އެޕާޓީގެ ބަޔާނުގައި ބުނެފައިވަނީ މިއީ ރައްޔިތުންގެ ނިންމުމާ މަޖިލީހުން ދެކޮޅުވުން ކަމުގައި އެޕާޓީން ދެކޭ ކަމަށާއި، އެހެންކަމުން ރައްޔިތުންގެ ނިންމުމާ ދެކޮޅަށް ދައުލަތުގެ އެއްވެސް ބާރަކުން މަސައްކަތް ނުކުރުމަށް ގޮވާލާ ކަމަށެވެ.

ވަޒީރުންނަށް ރުހުން ދިނުމާއި ގުޅޭގޮތުން ގޮތެއް ނިންމުމަށް އެންމެ ފަހުން ބާއްވަން ތަޢާވަލުކުރި ސަރުކާރު މަސްޢޫލިއްޔަތު އަދާކުރަ މިންވަރު ބަލާ ކޮމިޓީގެ ބައްދަލުވުންވެސް ކޯރަމް ހަމަނުވުމުގެ ސަބަބުން ވަނީ ކެންސަލް ކޮށްފައެވެ. އަދި ރައްޔިތުންގެ މަޖިލިހުގެ ޖަލްސާތައްވެސް ކޯރަމް ހަމަނުވެގެން ބޭއްވޭ ގޮތް ވެފައިނުވާތާ ވަނީ ހަފްތާއެއް ވެފައެވެ.

ވަޒީރުންގެ މަޖިލިހަށް ރުހުން ހޯދުމަށް ރައްޔިތުންގެ މަޖިލިހުގެ ކޮމިޓީން މަޖިލިހުގެ ތަޅުމަށް ފޮނުވި ރިޕޯޓު ފުރިހަމަ ނުވާކަމަށް ނިންމާ، ރިޕޯޓު އެޖެންޑާއިން އުނިކޮށް އަލުން އިސްލާހު ކުރުމަށް ރިޕޯޓު އަލުން ކޮމިޓީއަށް ފޮނުވާފައިވަނީ މިމަހުގެ 18 ގައެވެ.

ކުރިން ކޮމިޓީން ވަޒީރުންނަށް ރުހުން ދިނުމަށް ފާސްކޮށްފައިވަނީ މިނިސްޓްރީތަކަށް ގެނައި މެންޑޭޓް ފާސްނުކޮށްކަމަށް ބުނެ، އަލުން ކޮމިޓީއަށް ތަޅުމުން މައްސަލަ ފޮނުވީއެވެ.