ކުރީގެ ރައީސް އިބްރާހިމް މުހައްމަދު ސޯލިހްގެ ވެރިކަމުގައި ލ. ގަމުގައި އިމާރާތްކުރަން ނިންމި ކެންސަރު ހޮސްޕިޓަލު މާލެ ސަރަޙައްދަށް ބަދަލުކުރަން ރަމިސަރުކާރުން ނިންމި ނިންމާއި ގުޅިގެން ކަންބޮޑުވުން ފާޅުކޮށް، އެ ނިންމުން ބަދަލުކުރުމަށް ރައްޔިތުންގެ މަޖިލީހުގެ ގަމު ދާއިރާގެ މެންބަރު މުހައްމަދު ވިސާމް ގޮވާލައްވައިފިއެވެ.
ކެންސަރު ހޮސްޕިޓަލް މާލެއަށް ބަދަލުކުރުމަށް މިސަރުކާރުން ނިންމި ނިންމުމާއި ގުޅިގެން ވިސާމް ނެރުއްވި ބަޔާނެއްގައި ވިދާޅުވީ ރައީސް ސޯލިހްގެ ސަރުކާރުން ގަމުގައި ގާއިމު ކުރުމަށް ނިންމީ ކެންސަރު ހޮސްޕިޓަލްގެ ދިރާސާތައްކޮށް ނިމިފައި އޮއްވައި ކަމުގައެވެ. އަދި އެ ހޮސްޕިޓަލް މާލެ ސަރަހައްދަށް ބަދަލު ކުރަން މި ސަރުކާރުން ނިންމި ނިންމުން އެންމެ ހަރުކަށި އިބާރާތުން ކުށްވެރި ކުރައްވާ ކަމަށްވެސް އޭނާ ވިދާޅިވިއެވެ.
ރައީސް މުއިއްޒު ވެރިކަމަށް ވަޑައިގެންނެވީ މިދިޔަ ސަރުކާރުން ފަށާފައިވާ އެއްވެސް ތަރައްގީގެ މަޝްރޫއެއް ނުހުއްޓައި ރޭވިފައިވާ ގޮތަށް ކުރިއަށްގެންދާނެ ގޮތުގެ ވައުދާއެކު ކަމަށްވީއިރު މިއީ ގަމުގެ ތަރައްގީއަށް އަދި އަތޮޅުގެ ކުރިއެރުމާ ނުހަނު ގުޅިފައިވާ އެންމެ ބޮޑު ޕްރޮޖެކްޓު.
ވިސާމުގެ ބަޔާނުގައި ވިދާޅުވެފައި ވެއެވެ.
ވިސާމްގެ ބަޔާނުގައި އިތުރަށް ވިދާޅުވެފައިވަނީ ގަމުގައި ޓާޝަރީ ހޮސްޕިޓަލެއް އެޅުމަށް ހަވާލުކޮށްފައި އޮއްވާ އެ ޚިދުމަތް ނުލިބޭތީ ކަމަށް ބުނެ ކެންސަރު ހޮސްޕިޓަލު މާލެގައި އަޅާގޮތަށް ބަދަލުކުރީކަމަށް ބުނެ ސަރުކާރުން ދައްކަނީ ދެކޮޅު ނުޖެހޭ ވާހަކައެއް ކަމަށެވެ. އަދި އެކަމުގެ ސަބަބުން ގަމުގައި އެޅުމަށް ހަވާލުކޮށްފައިވާ ޓާޝަރީ ހޮސްޕިޓަލް ވެސް އެހެން ރަށަކަށް ބަދަލުކޮށްފާނެ ކަމުގެ ބިރު އެބައޮތް ކަމަށްވެސް އޭނާ ވިދާޅުވިއެވެ.
އެނާ ވިދާޅުވީ މި ސަރުކާރުން މަސައްކަތް ކުރަމުންދަނީ ހުރިހާ ބާރުތަކެއް މާލެއަށް މަރުކަޒު ކުރުމަށް ކަމަށާއި، އެ ސަގާފަތް އަލުން އިއާދަކޮށް، ކެންސަރު ހޮސްޕިޓަލްފަދަ ބޮޑެތި މަޝްރޫޢެއް މާލެއަށް އަލުން ބަދަލުކުރީ އެމަޝްރޫޢު ހުއްޓުވުމަށް ކަމުގައެވެ.
