ދިވެހީންގެ އާއިލީ ގުޅުންތަކަށް ފަރުވާ އެބަ ބޭނުންވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ޤައުމީ އެއްބައިވަންތަކުގެ ދުވަސް ފާހަގަކުރުމަށް ދަރުބާރުގޭގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޑރ. މުޢިއްޒު ވަނީ ދިވެހީންގެ އެއްބައިވަންތަކަމުގެ މައްޗަށް އަލިއަޅުއްވާލައްވާފައެވެ. ދިވެހީންގެ އެއްބައިވަންތަކަމަކީ ދިވެހީންގެ ޚާއްޞަ ދިފައެއްކަމަށާއި، އެކަން ފެނިގެންދަނީ އެއް ދީނެއް، އެއް ބަހެއް، އެއް ސަގާފަތެއް، އަދި ނަސްލީ ތަފާތުކުރުމެއް ނެތުމުންކަމަށް ރައީސް ވިދާޅުވިއެވެ.
މިކަންކަމުގައި ދިވެހިންނަށް މިއަދު އާދެވިފައިވަނީ ކިހާ ހިސާބަކަށްތޯ ސުވާލު ކުރައްވަމުން ރައީސް ވިދާޅުވީ މިއަދު އަޅުގަނޑުމެންގެ އާއިލީ ގުޅުންތަކަށް ފަރުވާ އެބަ ބޭނުންވާކަމަށެވެ. އަޅުގަނޑުމެންގެ ދޭދޭ ކުލުނުވެރިކަމާއި އެއްބަނޑުއެއްބަފާކަން ގާއިމުކުރުމަށް އެހީ އެބަ ބޭނުންވާކަމަށާއި، އަޅުގަނޑުމެން ދިވެހީން އެކަކު އަނެކަކުގެ އަބުރަށް ޢިއްޒަތަށް ޙުރުމަތްތެރިކޮށް ހިތުމަށް، މަގުދައްކައިދޭން އެބަ ޖެހޭކަމަށް ރައީސް ވިދާޅުވިއެވެ. އަދި އަޅުގަނޑުމެންގެ ހިތްތަކަށް ރަޙުމާއި ކުލުނާއި އޯގާވެރިކަމުގެ މޫސުމެއް އަންނަން އެބަ ޖެހޭކަމަށްވެސް ރައީސް ވިދާޅުވިއެވެ.
އަޅުގަނޑު ދެކެން ބޭނުންވަނީ އެ ދުވަސް. މާޒީން އަޅުގަނޑުމެން ދެކެފައިވި، އެކުވެރިކަމުގެ ދުވަސް. ގުޅުންތެރިކަމުގެ ދުވަސް. މިއަދު އަޅުގަނޑުމެން ފާހަގަކުރަމުން މިދާ ޤައުމީ އެއްބައިވަންތަކަމުގެ ދުވަސް އަޅުގަނޑުމެންނަށް ދޭ ފިލާވަޅަކީ އެއީ. އެ ދުވަހު އެކެއްގެ އަންނައުނުން އަނެކަކު ނިވާކޮށްދިނީމު. އެކެއްގެ ބަތްސުވަލުން އަނެކެއްގެ ހައިހޫނުކަން ފިލުވައިދިނީމު. އެކެއްގެ ރެޔާއި ދުވާލުގެ ހިލޭ މަސައްކަތުން އަނެކެއްގެ ގޯތި ގެދޮރު ކުނިކަހައި ސާފުކޮށް ދިނީމު. ކެނޑިފައި އޮތް ކަރަންޓާއި، ހުއްޓިފައި އޮތް ތަޢުލީމީ ނިޒާމަށް އަލުން ފެށުމެއް ގެނެސްދިނީ، ހުރިހާ ދިވެހީން ގުޅިގެން ދިވެހިވަންތަ އިސްލާމީ ޤައުމީ ރޫޙުގައި ހަރަކާތްތެރިވެގެން.
– ރައީސް ޑރ. މުޢިއްޒު ވިދާޅުވިއެވެ.
ރައީސްގެ ވާހަކަފުޅުގައި ސުނާމީ ކާރިސާއަށް ފަހު، އަލުން ބައެއް ރަށްތައް ބިނާކުރުމުގައި ސޭފް އައިލެންޑް ކޮންސެޕްޓް ބޭނުންކުރަން ފެށުނުކަމަށް ވިދާޅުވިއެވެ. އެގޮތުން ދާދިފަހުން މި ސަރުކާރުން ފެށި ރަސްމާލެ މަޝްރޫޢަކީ ވެސް ސޭފް އައިލެންޑް ކޮންސެޕްޓަށް ފަރުމާކުރެވިފައިވާ މަޝްރޫޢެއްކަމަށާއި، ކިތަންމެ ފެންވަރު މަތިކޮށް ނަމަވެސް، މި ގޮތަށް ސިޓީތައް ބިނާކުރުމުގެ އަސާސީ ބޭނުމަކީ، ރައްޔިތުންގެ މުދަލާއި ގެދޮރާއި ފުރާނަތައް ސަލާމަތް ކޮށްދިނުންކަމަށް ރައީސް ވިދާޅުވިއެވެ.
ރަށުގެ ފަސްގަނޑު ވަކި ވަރަކަށް އުސްކޮށް، އޮޔާއި ވައިގެ ދައުރުވުމަށް ބަލައި ބަނދަރުތަކާއި ތޮށިގަނޑުތައް ލެވެނީ އެހެންވެގެން. ސަލާމަތާއި ރައްކާތެރިކަމަށް ޓަކާ. އެކަމަކު ދަންނަވަންތޯ؟ އަޅުގަނޑުމެންގެ ޙަޤީޤީ ސަލާމަތްތެރިކަން އޮތީ އަދި މުޅިން އެހެން ކަމެއްގާ. އެހެން ގޮތެއްގާ. އެ ގޮތަކީ ކޮބައިތޯ؟
– ރައީސް ޑރ. މުޢިއްޒު ވިދާޅުވިއެވެ.
ރައީސްގެ ވާހަކަފުޅުގައި ޤައުމެއްގެ މިސާލަކީ އާއިލާއެއްގެ މިސާލުކަމަށާއި، އާއިލާއަކުން އަބަދު ވެސް އެ މީހުންގެ ގޯތި ގެދޮރާއި މުދަލުގެ ސަލާމަތާ މެދު ވިސްނާކަމަށް ވިދާޅުވިއެވެ. ގައުމެއް އެ ޤައުމެއްގެ ބިމާއި މީހުންގެ ސަލާމަތާ މެދު ވިސްނާކަމަށާއި، އާއިލާއެއް އަބަދުވެސް ގޭތެރޭގެ ހަމަޖެހުމާއި ކުލުނާއި ލޯބި އިތުރުވާނެ ގޮތަށް ކަންކަން ކުރާކަމަށްވެސް ވިދާޅުވިއެވެ. ޤައުމެއްގައި ވެސް އެ ސިފަ އޮންނަންޖެހޭކަމަށާއި، އާއިލާއެއް އަބަދުވެސް ޢިލްމީ ގޮތުންނާއި ފިކުރީ ގޮތުން އަދި ޞިއްޙީ ގޮތުންނާއި އިޤުތިޞާދީ ގޮތުން އެ އާއިލާއެއްގެ ކުދިން މޮޅުކުރަން ބޭނުންވާކަން ރައީސް ފާހަގަކުރެއްވިއެވެ.
އެކަމަށް ޓަކައި މަސައްކަތް ވެސްކުރުމަށް ރައީސް ގޮވާލެއްވިއެވެ. ޤައުމެއް ވެސް ދެމި އޮންނަނީ މި ގޮތުންކަމަށާއި، ޤައުމެއް ފިކުރީ ގޮތުން ފުދުންތެރިވާންޖެހޭކަމަށް ވިދާޅުވިއެވެ. އަދި ޢިލްމީ ގޮތުން ހޭލުންތެރިވާންޖެހޭކަމަށާއި، އިޤުތިޞާދީ ގޮތުން ފޯރުންތެރިވާންޖެހޭކަމަށްވެސް ރައީސް ވިދާޅުވިއެވެ.
ހުނަރުގެ ގޮތުން އުފެއްދުންތެރިވާންޖެހޭ. މި ހުރިހައި ބަހާތަކަކާއެކު ޤައުމީ ގޮތުން އެއްބައިވަންތަ ވާންޖެހޭ. ކުލުނުވެރިކަމާއި އިޙްސާންތެރިކަމާއި އިޚްލާޞްތެރިކަން ރައްޔިތުންގެ ކިބައިގައި ހަރުލާންޖެހޭ. ދިވެހީންގެ މާޒީ ދިވެހީންނަށް ދިނީ މި ފިލާވަޅު. އެއްބައިވަންތަކަމުގެ ދުވަހު އަޅުގަނޑުމެން ޢަމަލީ ގޮތުން ދަސްކުރީ އަދި އުނގެނުނީ މި ފިލާވަޅު. މީ އެއް ޤައުމެއްކަން. އެއްބައެއްކަން.
– ރައީސް ޑރ. މުޢިއްޒު ވިދާޅުވިއެވެ.
ރައީސް ވަނީ އެއްރޫޙެއްގައި އެއް ޢަޒުމެއްގައި ދެމިތިބި ތިބުން ދަމަހައްޓަވައިދެއްވުމަށް އެދިވަޑައިގެންފައެވެ. އެކަމަށް ޓަކައި މިއީ އެއްބައިވަންތަ އެކުވެރި ޤައުމެއްކަން ހަމަ ކޮންމެ ދިވެއްސަކު ބަހާއި ޢަމަލުން ސާބިތުކޮށްދެއްވުމަށްވެސް އެމަނިކުފާނު އެދިވަޑައިގެންނެވިއެވެ.
