ކޮމިޝަނަރ އޮފް ޕޮލިސްގެ މަޤާމަށް އެސިސްޓަންޓް ކޮމިޝަނަރ އޮފް ޕޮލިސް ޢަލީ ޝުޖާއު އައްޔަން ކުރަން ފެންނަކަމަށް ޕޮލިސް ބޯޑުން ހޯމްލޭންޑު މިނިސްޓަރަށް ލަފާ ދެއްވައިފިއެވެ.
ޕޮލިސް ކޮމިޝަނަރގެ މަޤާމަށް ކުރިމަތިލުމަށް ހުޅުވާލި ފުރުޞަތުގައި ކުރިމަތިލެއްވީ ޝުޖާޢުގެ އިތުރުން އެސިސްޓަންޓް ކޮމިޝަނަރ އޮފް ޕޮލިސް އިސްމާޢީލް ނަވީންއެވެ. އެ ދެބޭފުޅުންގެ ނަންވެސް ޕޮލިސް ބޯޑަށް ފޮނުވުން، ނަންތައް ދިރާސާކުރެއްވުމަށްފަހު ޕޮލިސް ބޯޑުން ނިންމެވީ ޕޮލިސް ކޮމިޝަނަރުގެ މަގާމަށް ޢަލީ ޝުޖާއު އައްޔަން ކުރަން، ވަޒީރަށް ލަފާ އެރުވުމަށެވެ. އެނގިފައިވާގޮތުން ޕޮލިސް ކޮމިޝަނަރުގެ މަޤާމަށް އޭސީޕީ ނަވީން ޝަރުޠު ހަމަނުވެއެވެ.
2021 ވަނަ އަހަރުގެ މާރިޗު މަހު ޢަމަލުކުރަން ފެށި ފުލުހުންގެ ޚިދުމަތުގެ ޤާނޫނުގައި ބަޔާންކުރާގޮތުން ކޮމިޝަނަރ އޮފް ޕޮލިސްގެ މަޤާމަށް ބޭފުޅަކު އައްޔަންކުރަންޖެހޭނީ އެސިސްޓެންޓް ކޮމިޝަނަރުގެ ރޭންކުން ފެށިގެން މަތީގެ ރޭންކުގެ ބޭފުޅެކެވެ. އަދި އެ މަޤާމަށް ބޭފުޅަކު އައްޔަންކުރަންވާނީ އެމަގާމަށް ކުރިމަތިލައްވާ ބޭފުޅުންނާ ޕޮލިސް ބޯޑުން އިންޓަވިއުކޮށް، ގާބިލްކަން ވަޒަން ކުރުމަށް ފަހު ކަމަށްވެސް ޤާނޫނު ބަޔާންކުރެއެވެ. އަދި ކޮމިޝަނަރ ޢައްޔަންކުރާނީ ޕޮލިސް ބޯޑުން ވަޒަންކޮށް ވަޒީރަށް ހުށަހަޅާ ނަންތަކުގެ ތެރެއިން، ވަޒީރުގެ ލަފާގެމަތިން ރައީސުލްޖުމްހޫރިއްޔާކަމަށްވެސް ޤާނޫނުގައި ބުނެފައިވެއެވެ.
ޕޮލިސް ކޮމިޝަނަރުގެ މަޤާމު ހުސްވީ، ކުރިން އެ މަޤާމުގައި ހުންނެވި މުޙައްމަދު ޙަމީދު މިދިޔަ ނޮވެމްބަރު މަހުގެ 15 ވަނަ ދުވަހު ރިޓަޔަރ ކުރެއްވުމުންނެވެ. އެހެންކަމުން އެކްޓިންގ ޕޮލިސް ކޮމިޝަނަރުގެ މަޤާމު ފުރުއްވަނީ އެސިސްޓެންޓް ކޮމިޝަނަރ އޮފް ޕޮލިސް ފަރުހާދު ފިކުރީއެވެ.
ފުލުހުންގެ ޚިދުމަތުގެ ޤާނުނުގައިވާ ގޮތުން ކޮމިޝަނަރު އޮފް ޕޮލިސްގެ މަގާމު ހުސްވެއްޖެނަމަ، އެ ތާރީޚުން ފެށިގެން 45 ދުވަހުގެ ތެރޭގައި މަގާމަށް ބޭފުޅަކު އައްޔަންކުރަންޖެހެއެވެ.
