ރާއްޖޭގެ އެކިކަންކޮޅުތަކުގައި ކުރިއަށްދާ މަގު ހެދުމުގެ މަޝްރޫއުތަކުގެ ތެރެއިން ހުއްޓިފައި އޮތް 17 ރަށެއްގެ މަގު ހެދުމުގެ މަސައްކަތް ރޯޑް ޑިވޮލޮޕްމެންޓް ކޯޕަރޭޝަން (އާރުޑީސީ) އިން އަލުން ފަށާފައިވާ ކަމަށް އެ ކުންފުނިން މިއަދު ހާމަކޮށްފިއެވެ.

ކުރީގެ ރައީސް އިބްރާހިމް މުހައްމަދު ސޯލިހްގެ ސަރުކާރުގައި އާރުޑީސީއާ މަގު ހެދުމުގެ 37 މަޝްރޫއު ހަވާލު ކުރިއިރު، ނުނިމި ދިގުލައިގެން ދިޔަ މަޝްރޫއުތައް ގިނައެވެ. ބައެއް ރަށްރަށުގައި މަގު ހެދުމަށް ވަޅު ކޮނުމަށް ފަހު، އެ ތަން ދުވަހަކު ފަސް ނާޅާ ހުރި ކަމުގެ ޝަކުވާ ވެސް އެ ރަށްރަށުގެ ރައްޔިތުން ކުރެއެވެ.

އެކަމަކު، އާރުޑީސީން އިއްޔެ ބުނީ އެ ކުންފުންޏާ ހަވާލުކުރި މަޝްރޫއުގެ ތެރެއިން މަސައްކަތް ހުއްޓި ގިނަ ދުވަސްތަކެއްވީ ރަށްތަކުގެ މަގު ހެދުމުގެ މަސައްކަތް އަލުން ފަށާފައިވާ ކަމަށެވެ. އެ ރަށްތަކުގެ ތަފްސީލްތައް ވެސް އާރުޑީސީން ވަނީ ދީފައެވެ.

މަގު ހެދުމުގެ މަސައްކަތް އަލުން ފެށި ރަށްތަކުގެ ތެރޭގައި ހިމެނެނީ ހއ. ދިއްދޫ އާއި ހދ. ކުޅުދުއްފުއްޓާއި ށ. މިލަންދޫ އާއި ރ. ހުޅުދުއްފާރާއި ނ. ހޮޅުދޫ އާއި ނ. ވެލިދޫ އާއި ޅ. ހިންނަވަރާއި މ. މުލަކާއި އަމީނީ މަގާއި އދ. މާމިގިއްޔާއި ދ. ކުޑަހުވަދޫ އާއި ތ. ތިމަރަފުއްޓާއި ލ. ގަން ފޭސް ދޭކާއި ގއ. ކޮލަމާފުއްޓާއި ގއ. ވިލިނގިލި ފޭސް ދޭކާއި ގދ. ތިނަދޫ ފޭސް ދޭކާއި ގދ. ގައްދޫއެވެ.

އާރުޑީސީން އެންމެ އިސްކަމެއް ދީގެން ކުރަމުން އަންނަ އެއް މަސައްކަތަކީ އަމީނީ މަގު ހެދުމުގެ މަސައްކަތެވެ. އެ ކުންފުނީގެ އަމާޒަކީ ސްކޫލްގެ ދެވަނަ ޓާމްގެ ކިޔެވުން ފެށުމުގެ ކުރިން އަމީނީ މަގުގެ ބާކީ ބައި ހެދުމުގެ މަސައްކަތް އެއްކޮށް ނިންމާލުމަށެވެ.