މަސް މާރުޚޭޓާއި ލޯކަލް މާރުކޭޓު އެއް ޢިމާރާތެއްގައި ހިންގާގޮތަށް ޒަމާނީ އައު މާރުކޭޓް ޢިމާރާތެއް އެޅުމަށް ސަރުކާރުން ނިންމައިފިއެވެ.
ދެ މާރުކޭޓު އެއް ޢިމާރާތެއްގައި ހިންގާގޮތަށް އިމާރާތްކުރަނީ މިހާރު ލޯކަލް މާރުކޭޓު ހުރި ބިމުގައެވެ. މިހާރުގެ ލޯކަލް މާރކޭޓުގައި ގިނަ މައްސަލަތަކެއް ހުރިއިރު ޒަމާޏްވީ އެކަމަށް ޙައްލެއް އައިސްފައެއް ނުވެއެވެ. އައު މާރުކޭޓް ޢިމާރާތެއް އެޅުމަކީ ރައީސް ޑރ. މުޢިއްޒު މޭޔަރުކަމުގައި ހުންނެވިއިރުވެސް ގެންގުޅުއްވި ޕްލޭނެކެވެ. ނަމަވެސް ކުރީ ސަރުކާރުގައި އެކަމަށް އެއްބާރުލުން ލިބިވަޑައި ނުގެންނެވިކަމަށް ރައީސް މުޢިއްޒު ރޭ ވިދާޅުވެފައިވެއެވެ.
އަޅުގަނޑު މި މަގާމާ ހަވާލުވިފަހުން މާލެސިޓީން އަޅުގަނޑާ ހަމަޔަށް އަންނަ ސުވާލުތަކެއް ހުރީތީ، އެކަމާ ބެހޭގޮތުންވެސް އެއްޗެއް ދަންނަވާލަން ގަސްތުކުރަން. އެއީ، އަޅުގަނޑު މާލޭސިޓީގެ މޭޔަރު ކަމުގައި ހުރެގެން ރައްޔިތުންނަށް ކޮށްދޭން އުޅުނު މުހިންމު ބޮޑެތި ގިނަ ކަންތައްތަކެއް. އެނގިވަޑައިގަންނަވާނެ ފަދައިން، އޭރު އޮތީ ހުއްޓުވާފައި. އަޅުގަނޑުމެން މަސައްކަތް ކުރިން، އޭރު މާލޭގެ މަގުތައް ޒަމާނީ ފެންވަރަކަށް ހަދަން. ލޯކަލް މާރުކޭޓާއި މަސް މާރުކޭޓު، އެއް ފުރާޅެއްގެ ދަށަށް ގެނެސް، އެންމެ ޒަމާނީ ފެންވަރަށް ބިނާވެފައިވާ އިމާރާތަކަށް ހަދަން. ހުރިހާ ތައްޔާރީއެއްވިން. މާލޭގައި އޮތް ޓްރެފިކް މައްސަލަ ހައްލުކުރަން، ދުނިޔޭގައި ކުރިއަރާފައިވާ ޤައުމުތަކުގައި އޮންނަ ފަދަ ހައްލުތަކެއް މާލެއަށްވެސް ތަޢާރުފް ކުރަން މަސައްކަތް ކުރިން. އޭގެތެރޭގައި، ޕާކިންގ ބިލްޑިންގތައް ބިނާކުރަން ހުރިހާ ތައްޔާރީއެއްވިން.
– ރައީސް ޑރ. މުޢިއްޒު ވިދާޅުވިއެވެ.
މާރުކޭޓުގެ ޢިމާރާތުގެ މަސައްކަތް އަންނަ ހޮނިހިރު ދުވަހު ފެށުމަށް ވަނީ ނިންމާފައެވެ.
ސިޓީ ކައުންސިލުން ބުނީ އަލަށް ޢިމާރާތްކުރުމަށް ޕްލޭން ކޮށްފައިވާ އައު މާރުކެޓު ޢިމާރާތަކީ ބޭސްމަންޓުގައި ޕާކިން ޒޯނެއްވެސް ހިމެނޭ ޢިމާރާތެއްކަމަށެވެ. ގްރައުންޑު ފްލޯގައި މަސް މާރުކޭޓް އަދި އެ ޢިމާރާތުގެ 2 އަދި 1 ވަނަ ފްލޯގައި ހަދަން ނިންމާފައިވާނީ ދަތުރުވެރިންގެ މާރުކޭޓާއި ލޯކަލް މާރުކޭޓެވެ. އެންމެ މަތީ ފްލޯގައި ޤާއިމްކުރާނީ ފުޑް ކޯޓެވެ.
އެ މަސައްކަތް 8 މަސް ދުވަހުގެ ތެރޭގައި ނިންމުމަށް ވަނީ ނިންމާފައެވެ
