ރައްޔިތުންގެ ސުވާލުތަކަށް ޖަވާބު ދިނުމަށް ޕަބްލިކް ފޯރަމްތަކެއް ބާއްވަން ނިންމާފައިވާ ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެއެވެ.
"ކަންގަތި އެވޯޑު" ދިނުމަށް ދަރުބާރުގޭގައި ބޭއްވި ހަފްލާގައި ރައީސް މުއިއްޒު ވިދާޅުވީ އެމަނިކުފާނު ބޭނުންފުޅުވަނީ ރައްޔިތުންނާ ގާތުން މަސައްކަތް ކުރައްވައި، އެމަނިކުފާނުގެ ސަރުކާރަކީ ދެފުށް ފެންނަ ސަރުކާރަކަށް ހަދަން ކަމަށެވެ.
ރައީސް ވިދާޅުވީ މި ޕޯޓަލްގެ އިތުރުން ހަފުތާ 14ގެ ތެރޭގައި، ރައްޔިތުންގެ ސުވާލުތަކަށް ޖަވާބު ދިނުމަށް ޕަބްލިކް ފޯރަމްތަކެއް ބާއްވަން ފައްޓަވާނެ ކަމަށެވެ. މިއީ ތިން މަހުން އެއް މަހު އޮންނަ ޕްރޮގްރާމެއް ކަމަށާއި ފުރަތަމަ ޕްރޮގްރާމް ފެބްރުއަރީ މަހުގެ ތެރޭގައި އޮންނާނެ ކަމުގައި ރައީސް ވިދާޅުވިއެވެ.
އަދި ވަޒީރުން ވެސް މިފަދަ ފޯރަމްތަކެއް ކޮންމެ ދެ މަހުން އެއް މަހު ބާއްވާޏެ ކަމަށާއި ފުރަތަމަ ފޯރަމް ޖެނުއަރީގައި އޮންނާނެ ކަމަށް ރައީސް ވިދާޅުވިއެވެ.
"މިއީ ކޮންމެ ތިން މަހުން އެއްމަހު އޮންނާނެ ޕްރޮގްރާމެއް. ފުރަތަމަ ފޯރަމް، ފެބުރުއަރީ މަހުގެ ތެރޭގައި އޮންނާނެ. އަދި ވަޒީރުންވެސް މިފަދަ ފޯރަމްތަކެއް، ކޮންމެ ދެ މަހުން އެއްމަހު ބާއްވާނެ. ފުރަތަމަ ފޯރަމް، ޖެނުއަރީ މަހުގެ ތެރޭގައި އޮންނާނެ." ރައީސް ވިދާޅުވިއެވެ.
މީގެއިތުރުން ދިވެހި ކޮންމެ ރައްޔިތަކަށް އެމަނިކުފާނާއި ސުވާލުކުރެވޭ ގޮތަށް އަދި އެ ރައްޔިތެއްގެ އުދާސްތަކާއި ހިޔާލުތަކާއި އުންމީދުތައް ސީދާ އެމަނިކުފާނަށް ހުށަހެޅޭ ގޮތަށް ރައީސް އޮފީހުގެ ވެބްސައިޓު ގައި ޕޯޓަލެއް ގާއިމު ކުރައްވާނެ ކަމަށާއި މި ޕޯޓަލް ތައްޔާރު ކުރުމުގެ މަސައްކަތް މިހާރު ފެށިފައިވާ ކަމަށް ރައީސް ވިދާޅުވިއެވެ.
