މި ސަރުކާރުގެ ހަފުތާ 14ގެ ފުރަތަމަ އަމާޒު ކަމުގައިވާ، ހަތަރު ހަފުތާގެ ތެރޭގައި ހާޞިލުކުރާނެކަމަށް ވަޢުދުވި ކަންކަން އެ މުއްދަތުގެތެރޭގައި ނިންމާނެކަމަށް ކެންޕޭނުގައި ދެންނެވި ހުރިހައި ކަމެއް އެ މުއްދަތުގައި ނިންމަން ކަނޑައެޅިވަރަށް ނިންމާފައިވާކަމަށް ރައީސް މުއިއްޒު ވިދާޅުވެއްޖެއެވެ.
ރައީސް މުއިއްޒު މިހެން ވިދާޅުވީ މިއަދު ފާހަގަ ކުރެވެމުންދާ ހުރަވީ ދުވަހުގެ މުނާސަބަތުގައި ބޭއްވި ރަސްމީ ޖަލްސާގައި ވާހަކަ ދައްކަވަމުންނެވެ.
މިރޭގެ ޖަލްސާގައި ވާހަކަ ދައްކަވަމުން ރައީސް ވިދާޅުވީ ޝަރުޢީ ދާއިރާއަށް ނުފޫޒު ފޯރުވުން މުޅިން ހުއްޓާލުމަށް އެމަނިކުފާނު ވީ ވަޢުދަށް ވެސް ފުރަތަމަ ދުވަހުން ފެށިގެން ވަފާތެރިވަމުންދާ ކަމަށާއި، ހަފުތާ ސާދައިގެ ތެރޭގައި މަސްވެރީންނަށް ޓަކައި ދަފުތަރެއް އެކުލަވައިލުމުގެ މަސައްކަތް ފެށިފައިވާ ކަމުގައެވެ. އަދި ފައިސާ ޗާޕުކުރުން ހުއްޓާލާނެކަން އެއީ ވެސް ވީ ވަޢުދެއްކަން ފާހަގަ ކުރައްވަމުން ރައީސް ވިދާޅުވީ ސަރުކާރު ހިންގަންފެށުމާއެކު ދައުލަތުން ފައިސާ ޗާޕުކުރުން ހުއްޓައިލާފައިވާ ކަމުގައެވެ.
ހަމަ އެހެންމެ ވެލާނާ އިންޓަރނޭޝަނަލް އެއަރޕޯޓު ނިންމުމަށް ކުރަންޖެހޭ މަސައްކަތްތައް ވަރަށް ބާރަށް ކުރިޔަށް ދާކަމަށާއި، މިފްކޯއަކީ މަސްވެރިންގެ ބަސްހިމެނޭ ސަތޭކަ އިންސައްތަ ދައުލަތުގެ ކުންފުންޏަކަށް ހަދަން ކެބިނެޓުން ދާދި ފަހުން ފާސްކުރެއްވުމަކީ ވެސް މިފަދައިން ނިމިގެން ދިޔަކަމެއް ކަމަށްވެސް ރައީސް ވިދާޅުވިއެވެ.
1000 ފަގީރުން ހައްޖަށް ފޮނުވުމުގެ ވަޢުދުގެ ތެރޭން ފުރަތަމަ ޙައްޖަށް ފޮނުވަން ކަނޑައަޅާ 50 މީހުން ފޮނުވުމުގެ އިންތިޒާމީ މަސައްކަތްތައް ވެސް އެވަނީ ފާސްކުރެވިފައި. ޒަކާތު ހައުސް އުފައްދަން ކެބިނެޓުން ފާސްކުރައްވައި އެ މަސައްކަތް ވެސް އެ ދަނީ ހިނގަމުން.. ހަމަ މިއާއެކު ތެލަސީމިޔާ ބަލިހުންނަ ކުދީންނަށް މަތީފެންވަރުގެ ހޮސްޕިޓަލެއް ބިނާކުރުމާއި ވަކިން ޚާއްޞަކޮށް ސަރުކާރުގެ ޚަރަދުގައި އެ ކުދިންގެ ބޯންމެރޯ ހެދުމުގެ އިންތިޒާމު އެދަނީ ހިނގަމުން. ފުރަތަމަ ކުއްޖާ މިހާރުވަނީ ފޮނުވިފައި. އަދި އިތުރު 4 ކުދިން ވަރަށް އަވަހަށް ފުރާނެ.
ރައީސް މުއިއްޒު ވިދާޅުވިއެވެ.
މިރެގޭ ޖަލްސާގައި، ސަރުކާރުގެ ފުރަތަމަ 4 ހަފްތާ ތެރޭގައި ޙާސިލް ކުރެއްވި ލަނޑުދަނޑިތަކަށް އަލި އަޅުއްވާލައްވަމުން ރައީސް ވިދާޅުވީ ދަރީން ނުލިބުމުގެ ހިތާމަ ތަޙަންމަލްކުރަމުންދާ ދިވެހިރައްޔިތުންނަށް އެކަމުގެ ފަރުވާ ރާއްޖެއާ ރާއްޖޭން ބޭރުން ހަމަޖެއްސުމުގެ ކަންކަން ކުރިޔަށްދާ ކަމަށާއި، ޚާއްޞަކޮށް އާސަންދަ މެދުވެރިކޮށް އައިވީ އެފް ހެދުމުގެ ފުރުޞަތު މިހާރު ފަހުވަމުންދާ ކަމަށެވެ. އޭގެ އިތުރުންވެސް ކޮންމެ ދިވެހި ރައްޔިތަކަށް އާސަންދަ މެދުވެރިކޮށް ހިލޭ މެޑިކަލްޗެކަޕް ކޮންމެ އަހަރަކު ދެ ފަހަރު ހެދޭ ގޮތް ހަމަ ޖެހިގެން ދިޔުން ފަދަ ކަންކަމަކީ 4 ވަނަ ހަފުތާއާ ހަމައަށް އައި އިރު ކަނޑައެޅިފައިވާ މިންވަރަށް ކުރިޔަށް ގެންދެވި ނިމިފައި ހުރިކަންކަން ކަންވެސް ރައީސް ފާހަގަ ކުރެއްވިއެވެ.
ގެދޮރުވެރިކަމުގައި ލުއި ގޮތްތަކެއް ހޯދައި ދިނުމުގައި ވެސް އަޅުގަނޑު ވީ ވަޢުދާ އެއް ގޮތަށް ފުލެޓުތަކާ ގުޅޭ ގޮތުން އެތައް ލުއިތަކެއް އެވަނީ ތަޢާރުފުކުރެވިފާ. މިސްކިތައް އާބާތުރަ ފިލުވައި ރީތިކުރުން އިހަށްވުރެ ތިން ގުނައަށް އިތުރުކުރުމަށް ޓަކައި ވީ ވައުދާ އެއްގޮތަށް އެކަމުގެ ބަޖެޓަށް ވެސް 15 މިލިޔަން އެ ވަނީ އިތުރުކުރެވިފާ. މިއަދު އަޅުގަނޑު އުފާކުރަނީ ހަފުތާ ސާދައިގެ ހުރިހައި ވަޢުދެއް ހަތަރުވަނަ ހަފުތާގެ ލަނޑުދަނޑިތަކާ އެއްވަރަށް އަކުރުން އަކުރަށް ފުރިހަމަވެފައިވާތީ. ރައްޔިތުންނަށް އެކަމުގެ ލާބައާއި މަންފާ ލިބެމުންދާތީ. އަދި ލިބެމުންދާނެތީ.
ރައީސް ވިދާޅުވިއެވެ.
ކޮމެންޓު ފޮނުވާ