މާލެ ސިޓީގެ މޭޔަރު ކަމުގެ ގޮނޑި އަށް އިންތިހާބުވެވަޑައިގެންފި ނަމަ، އެ ސިޓީ ބަދަލުކޮށްލަން ބޭނުން ވަނީ ކުރީގެ ރައީސް އަބްދުﷲ ޔާމީންގެ ތަސައްވުރާ އެއްގޮތަށް ކަމުގައި ޕީޕަލްސް ނެޝަނަލް ފްރަންޓް (ޕީއެންއެފް) ގެ ޓިކެޓުގައި މޭޔަރު ކަމުގެ ގޮނޑިއަށް ވާދަކުރައްވާ ކުރީގެ ޕޮލިސް ކޮމިޝަނަރު ހުސެއިން ވަހީދު ރޭ ވިދާޅުވެއްޖެ އެވެ.
ރައީސް ޔާމީން ޕީއެންއެފަށް ސޮއިކުރުމަށް ރޭ ބޭއްވި ހަފްލާގައި ހުސެއިން ވިދާޅުވީ ޔާމީން އެކުގައި ހުންނެވި ނަމަ، އެމަނިކުފާނު ތަސައްވަރު ކުރައްވާ ގޮތަށް މާލެ ސިޓީ އެއްކޮށް ބަދަލުކޮށްލެވޭނެ ކަމަށެވެ. އަދި ޔާމީން އުފައްދަވާ ކޮންމެ ޕާޓީއެއްގައި އެމަނިކުފާނު ފަހަތްޕުޅުން ވަޑައިގަންނަވާނެ ކަމުގެ ޔަގީން ކަން ވެސް ހުސެއިން ދެއްވިއެވެ.
ހުސެއިން ވިދާޅުވި ގޮތުގައި ތަސައްވަރު ކުރައްވާ ގޮތަށް މާލެ ސިޓީ އެއްކޮށް ބަދަލުކޮށްލެވޭނެއެވެ. އަދި އެ ތަން ބަދަލު ކުރާނީ ސުލްހަވެރި، މާ ނަލަ މާލެ ސިޓީ އަކަށް ކަމަށް އޭނާ ވިދާޅުވިއެވެ.
ހުސެއިން ވިދާޅުވީ އޭނާއަކީ މާލޭގެ މަންޒަރު ބަދަލުވެގެން އައި ގޮތް އެކި ގޮތް ގޮތަށް ފެނިވަޑައިގެންފައިވާ ކަމަށެވެ. މާލެއަކީ ކުޑަކުޑަ ތަނަކަށް ވެފައި، މީހުންނާއި ވެހިކަލްތައް އިތުރުވެގެން ދިޔައީމަ އެކަށީގެންވާ މާލެއެއް ނުލިބޭ ކަމަށް އޭނާ ވިދާޅުވިއެވެ.
"އަޅުގަނޑު އިރާދަކުރެއްވިއްޔާ މި އުޅެނީ ރައީސް ޔާމީންގެ ތަރައްގީގެ ވިސްނުމުގެ އެއް ހަމައެއްގައި މާލެ ސިޓީގެ ކަންކަން ބަދަލު ކުރެވޭތޯ. ޕީއެންއެފަށް އަޅުގަނޑު ވަނީ ރާއްޖޭގެ ތަރައްގީގެ ވިސްނުމަކީ ރައީސް ޔާމީން ކަމުގައިވާތީ ރައީސް ޔާމީން އާ އެއް ވިސްނުމުގައި އޮތިއްޔާ އަޅުގަނޑު ބާކީ ނުވާނެ ކަމަށް އަމިއްލަ ނަފްސަށް ގަބޫލު ކުރެވޭތީ،" ހުސެއިން ވިދާޅުވިއެވެ.
ހުސެއިން ވިދާޅުވީ ޕީއެންއެފް އިން މާލެ ސިޓީ ކައުންސިލްގެ ހުސްވެފައިވާ ތިން ގޮނޑި އަށް ވެސް ވާދަކުރާނެ ކަމަށެވެ. އަދި އެ ޕާޓީން ނުކުންނާނީ އެއް ޓީމެއްގެ ގޮތުގައި ކަމަށް ވެސް އޭނާ ވިދާޅުވިއެވެ.
ހުސެއިން ވަނީ މާލޭގެ މޭޔަރު ކަމަށް ހޮވިވަޑައިގެންފި ނަމަ، ކުރައްވާނެ މައިގަނޑު ބައެއް ކަންކަން ވެސް ހާމަކޮށް ދެއްވައިފައެވެ. އެގޮތުން ޒުވާނުން ހަވާސާވެފައި ތިބޭ ތިބުން ނިމުމަކަށް ގެނެސް، ޒުވާނުން ވަޒީފާތަކަށް ފައްކާ ކުރުމަށް ކުރެވެން ހުރި ހުރިހާ މަސައްކަތެއް ކުރައްވާނެ ކަމަށް ވިދާޅުވިއެވެ. އަދި އުމުރުން ދުވަސްވީ މީހުންނަށް ފަސޭހަ ތަނަކަށް މާލެ ހައްދަވާނެ ކަމަށް ވިދާޅުވިއެވެ.
މީގެއިތުރުން ބިދޭސީން މިއަދު ކުރަމުންދާ އެކި ކަހަލަ މަސައްކަތްތަކަށް ދިވެހި ޒުވާނުން އަހުލުވެރި ކުރުވުމަށް މަސައްކަތް ކުރައްވާނެ ކަމަށް ވެސް އޭނާ ވިދާޅުވިއެވެ.
