ކުރީ ސަރުކާރުން ގޯތި ނުލިބޭނެކަމަށް ނިންމި ފަރާތެއްގެ ޝަރުތު ފުރިހަމަ ނުވާކަމަށް ނިންމާފައިވަނީ ގޯސްކޮށްކަމަށް ސިވިލް ކޯޓުން ހުކުމް ކޮށްފިއެވެ.
ދަފްތަރު ނަންބަރު 234, ފާތިމަތު އަހުމަދު މައްސަލަ ކޯޓަށް ހުށަހެޅީ ކުރީ ސަރުކާރުގެ ޕްލޭނިން މިނިސްޓްރީން އޭނާގެ ޝަރުތު ފުރިހަމަނުވާ ކަމަށް ނިންމި ނިންމުން ނަފީ ކުރެވޭ ފަދަ ލިޔުމެއް ހުށަހަޅާފައިނުވާ ކަމަށް ބުނެ ދާއިމީ ލިސްޓްގައި ވެސް ނަމެއް ނުހިމެނުމުންނެވެ.
ކުރީ ސަރުކާރުގެ ޕްލޭނިން މިނިސްޓްރީން ނިންމާފައިވަނީ އޭނާއަކީ މާލޭ ރައްވެއްސެއްކަމަށް ޝަރުތު ފުރިހަމަ ނުވާކަމަށެވެ. އަދި އޭނާގެ ނަން ލިސްޓުގައި ހިމަނާފައި ނެތީވެސް އެ ސަބަބަށް ރިއާޔަތް ކޮށެވެ. އޭނާވަނީ ވަގުތީ ލިސްޓުގައި ނަންނެތިގެން އޭނާ އުފަންދުވަހުގެ ސެޓްފިކެޓާއި މާލޭގެ ރަށްވެރިންގެ ރަޖިސްޓްރީވެސް ހުށަހަޅާފައެވެ. އޭނާ އުފަންވެފައިވަނީ ހ. މަދަރާގޭގައެވެ.
ކުރީ ސަރުކާރުން ކަނޑައެޅި އުސޫލުގައިވާ ގޮތުން މާލޭގެ ރަށްވެއްސެއްކަން ހިނދުކޮޅަކަށް ވެސް މެދުކެނޑިފައިވާ ނަމަ ގޯއްޗަށް ޝަރުތު ހަމައެއް ނުވެއެވެ. ފާތިމަތުގެ ޝަރުތު ހަމަނުވާ ކަމަށް ވެސް ކަނޑައެޅީ އެއުސޫލަށް ބަލާ، މ. މުލަކު ގެއަކަށް އޭނާ ރަޖިސްޓާވެފައިވާ ވާތީކަމަށް އޭރު ސަރުކާރުން ބުނެފައި ވެއެވެ.
ފާތިމަތު ކޯޓުގައި ބުނެފައިވަނީ އޭނާ އުމުރުން 54 އަހަރު ހޭދަ ކޮށްފައިވަނީވެސް މާލޭގައި ކަމަށާއި، ރާއްޖޭގެ އެހެން އެއްވެސް ތަނެއްގައި އޭނާ ރަޖިސްޓްރީވެފައިވާކަން އެގެން ނޯންނާނެ ކަމަށެވެ.
ކޯޓުން ކުރި ހުކުމުގައިވަނީ މ. މުލީގެ ގެއެއްގައި ފާތިމަތު ރަޖިސްޓްރީވެފައިވާކަމަށް ޑީއެންއާރުއިން ދޫކޮށްފައިވާ ލިޔުމަކީ ސައްޙަ ލިޔުމެއް ނޫންކަަމަށެވެ. އަދި އެއީ ބާތިލް ރެކޯޑެއްކަން އެގެން އޮންނަ ކަމަށެވެސް ހުކުމުގައި ވެއެވެ.
އެހެންކަމުން މާލޭގެ ރައްވެހިންނަށް ލިބުނު ފުރުސަތު ފާތިމަތަށްވެސް ލިބެން ޖެހޭނެކަމަށާއި، އޭނާއަކި ގޯއްޗަށް ޝަރުތު ފުރިހަމަވާ މީހެއްކަމަށް ނިންމާ، އޮންނަ އުސޫލުގެ ތެެރެއިން އޭނާއަށްވެސް ގޯތި ދިނުމަށް ވަނީ ހުކުމް ކޮށްފައެވެ.
