ޖުމުހޫރީ ޕާޓީ (ޖޭޕީ) ހުސްވެފައިވާ މަގާމްތަކަށް މެމްބަރުން މިއަދު އިންތިޚާބު ކުރާގޮތަށް ހަމަޖައްސައިފިއެވެ. މަގާމްތަކަށް މެމްބަރުން އިންތިޚާބު ކުރުމަށް ހަމަޖެހިފައިވަނީ މިއަދު 2:00 ގައެވެ. މިބައްދަލުވުމުގައި އެޕާޓީން ހުސްވެފައިވާ 11 މަގާމަކަށް މެމްބަރުން އިންތިޚާބު ކުރާނެއެވެ. މިއަދު އިންތިޚާބުކުރާ މަގާމްތަކުގެ ތެރޭގައި އެޕާޓީގެ ނާއިބު ލީޑަރުކަމަށް ބޭފުޅަކު އިންތިޚާބު ކުރުންވެސް ހިމެނެއެވެ.
ޖޭޕީގައި 5 ނައިބު ލީޑަރުން ތިއްބަވައެވެ. އޭގެތެރެއިން ހުސްވީ އެއް ނައިބު ލީޑަރުގެ މަޤާމެވެ. އެއީ ކުރިން އެމަޤާމުގައި ހުންނެވި އިގްބާލް އާދަމް، އެމަޤާމުން އިސްތިއުފާދެއްވައި ރައީސް އޮފީހުގެ މިނިސްޓަރުކަމަށް ވަޑައިގަތުމުންނެވެ.
ޖޭޕީގެ ނައިބު ލީޑަރުކަމަށް ވާދަކުރައްވާ ބޭފުޅުންގެ ތެރޭގައި:
1- ޓުރިޒަމް މިނިސްޓަރުގެ ކުރީގެ ނައިބު އަސްޢަދު ރިޒާ
2- ރައްޔިތުންގެ މަޖިލީހުގެ ވިލިމާލެ ދާއިރާގެ ކުރީގެ މެންބަރު އަޙްމަދު ނިހާން ޙުސައިން މަނިކް
3- ޓްރާންސްޕޯޓް މިނިސްޓްރީގެ ކުރީގެ ސްޓޭޓް މިނިސްޓަރު އަދި ތަރުޖަމާން ޢަލީ ޞާލިޙް
4- ކައުންސިލް މެންބަރު މުޙައްމަދު ސަޢީދު
ހުސްވެފައިވާ ނައިބުގެ މަޤާމަށާއި، ހުސްވެފައިވާ އެޕާޓީގެ އެހެން މަޤާމުތަކަށް ބޭފުޅުން އައްޔަންކުރުން މިއަދު ކުރިއަށް މި އިންތިޚާބުގައި ވޯޓުލާނީ ހަމައެކަނި ޖުމްހޫރީ ޕާޓީގެ ކައުންސިލް މެންބަރުންނެވެ.
ޖުމްހޫރީ ޕާޓީގެ ނައިބު ލީޑަރުންގެ ގޮތުގައި މިހާރު ތިއްބެވީ ކުރީގެ ޓްރާންސްޕޯޓް މިނިސްޓަރު އާއިޝަތު ނަހުލާއާއި، އެޕާޓީގެ ލީޑަރު ޤާސިމް އިބްރާހީމްގެ ރަނިންމޭޓެއްގެ ގޮތުގައި ނިމިދިޔަ ރިޔާސީ އިންތިޚާބުގައި ހުންނެވި ކުރީގެ ޓްރާންސްޕޯޓް މިނިސްޓަރ ޑރ. އަމީން އިބްރާހީމާއި، ފުވައްމުލަކު އުތުރު ދާއިރާގެ ކުރީގެ މެންބަރު ޢަލީ ޝަހުގެ އިތުރުން އެޕާޓީގެ ކުރީގެ ނައިބު ރައީސް އަޙްމަދު ސަޢުދެވެ.
