އައްޑޫ ސިޓީ ހިތަދޫގައި ފާއިތުވި ހަފްތާގައި ހިންގި މާރާމާރީގައި 30 އަހަރުގެ ދިވެހި ފިރިހެނަކަށް އަނިޔާވެ، އޭނާގެ ހާލު ސިރިއަސްވެ މާލެގެނެސް ފަރުވާ ދީފައިވެއެވެ.

އަދި މި މާރާމާރީތަކާއި ގުޅިގެން މި ހަފްތާގައި ފުލުހުން ވަނީ އެ ސިޓީގައި ޚާއްސަ އޮޕަރޭޝަނެއްވެސް ފަށާފައެވެ.

މި ޑިސެމްބަރު 3 ވަނަ ދުވަހުން ފެށިގެން ކުރިއަށް ގެންދާ މި އޮޕަރޭޝަނުގައި 10 މީހުން ހައްޔަރުކޮށްފައިވާ ކަމަށްވެސް ފުލުހުން ބުނެފައި ވެއެވެ. އެ މީހުން ހައްޔަރުކޮށްފައިވަނީ މާރާމާރީ ހިންގި ކަމުގެ ތުހުމަތުގައި ކަމުއެވެ. އޭގެ ތެރޭގައި ހިމެނެނީ 18 އަހަރުގެ މީހަކާއި، 19 އަހަރުގެ 2 މީހުންނާއި، 20 އަހަރުގެ 3 މީހުންނާއި، 21 އަހަރުގެ މީހަކާ އަދި 23 އަހަރުގެ 3 މީހުންނެވެ.

މައްސަލައާ ގުޅިގެން އެ މީހުންގެ ބަންދާމެދު ގޮތެއް ނިންމުމަށް ހިތަދޫ މެޖިސްޓްރޭޓް ކޯޓަށް ހާޒިރުކުރުމުން ޝަރީއަތް ނިމެންދެން 10 މީހުންވެސް ބަންދުކުރުމަށް ކޯޓުން އަމުރުކޮށްފައިވެއެވެ.

މި މައްސަލަތައް އައްޑޫ ސިޓީ ޕޮލިސް ސްޓޭޝަންތަކާއި ސައުތު ޕޮލިސް ސީރިއަސް ކްރައިމް ސެލް ގުޅިގެންދަނީ ތަހުގީގު ކުރަމުންދާކަމަށްވެސް ފުލުހުން ބުނެފައި ވެއެވެ.

އައްޑޫގައި ގޭންގު މާރާމާރީތައް އިތުރުވެފައިވާއިރު، މާލޭގައިވެސް މިދުވަސްވަރު ހިނގަމުންދާ މާރާމާރީތައް ވަނީ ވަރަށްބޮޑުތަން އިތުރު ވެފައެވެ. ބައެއް ފަރާތްތަކުން ބުނަމުންދަނީ މާރާމާރީތައް އިތުރުވެފައިވަނީ ނިިދިޔަ ރިޔާސީ އިންތިޚާބާ ދިމާކޮށް ގިނަ އަދަދެއްގެ ކުށްވެރިން ޖަލުން ދޫކުރުމާއި ގުޅިގެން ކަމުގައެވެ.