މިމަހު 23 ވަނަ ދުވަހު ބޭއްވުމަށް ހަމަޖެހިފައިވާ ޕީޕީއެމް/ޕީއެންސީގެ މަޖިލިސް ޕްރައިމަރީގައި ވެރިކަންކުރާ ކޯލިޝަންގައި ހިމެނޭ އެމްއެންޕީއާއި އަދި އެމްޑީއޭގެ މެމްބަރުންނަށް ވާދަކުރެވޭ ގޮތް ހަދައިފިއެވެ.

މި ފުރުސަތު ދީފައިވަނީ ވެރިކަންކުރާ މައި ދެޕާޓީން ބޭއްވުމަށް ހަމަޖައްސާފައިވާ މަޖިލިސް ޕްރައިމަރީއާއި ގުޅޭގޮތުން އެކުލަވާލާފައިވާ އުސޫލުގައެވެ.

މިއުސޫލުގައި ވާގޮތުން ޕީޕީއެމް/ޕީއެންސީގެ މަޖިލިސް ޕްރައިމަރީތަކާއި ގުޅޭގޮތުން އެންމެ އިސްބަސް ބުނާ ފަރާތެއްގެ ގޮތުގައި ހަމަޖައްސާފައިވަނީ ދެ ޕާޓީގެ ލީޑަރޝިޕެވެ.  އެގޮތުން ކެނޑިޑަސީ ބަލައިގަތުމުގެ ބާރު ލިބިދީފައިވަނީ ދެޕާޓީގެ ލީޑަރޝިޕަށެވެ.

މި އުސޫލުގައި ވާގޮތުން ޕްރައިމަރީގައި ވާދަކުރެވޭނީ ކޯލިޝަންގައި ހިމެނޭ އެމްޑީއޭ އަދި އެމްއެންޕީންއިންވެސް މިމިމަހުގެ 11 ވަނަ ދުވަހާއި ހަމައަށް ޕްރައިމަރީގައި ވާދަކުރުމަށް ފޯމު ހުށަހަޅާ ފަރާތްތަކަށެވެ.

މިގޮތުން އެއްވެސް ދާއިރާއަކުން ޕްރައިމަރީ ބާއްވާނަމަ ޕްރައިމަރީ ބާއްވާ ތާރީޚެއްގެ ގޮތުގައި ކަނޑައަޅާފައިވަނީ މިމަހުގެ 23 ވަނަ ދުވަހެވެ.

ޕްރައިމަރީގައި ވާދަކުރާ ފަރާތްތަކުގެ ޝަރުތުތަކުގެ ގޮތުގައި ކަނޑައަޅާފައި ވަނީ:

• އަބުރުވެރި ނަޒާހާތްތެރި ފަރާތެއް ކަމުގައިވުން
• މަޖިލީހާއި ހާއްސަ މަޖިލީހުގެ ތަޖުރިބާ ލިބިފައިވާ މިންވަރު
• ގާނޫނުތަކާއި ގާނޫނު އަސާސީއަށް ފަރިތަ މިންވަރު
• ޕާޓީއަށް ހިދުމަތްކޮށްފައިވާ މިންވަރު
• ކޯލިޝަންގައި ހިމެނޭ ދެ ޕާޓީންވެސް ކުރިމަތިލާން ޝައުގުވެރިވާ ފަރާތަކީ މިމަހުގެ 10 ވަނަ ދުވަހުގެ ކުރިން ކޯލިޝަންގައި ހިމެނޭ ދެ ޕާޓީގައި ރެޖިސްޓްރީވެފައިވާ ފަރާތަކަށް ވުން. އަދި އެ ފަރާތަކީ ޕާޓީގެ ފަރާތުން އިންތިހާބުގައި ވާދަނުކުރެވޭނެ ގޮތަށް އެއްވެސް ފިޔަވަޅެއް އަޅާފައިވާ މީހަކަށްވެގެން ނުވުން.
• ގާނޫނު އަސާސީންނާއި ގާނޫނުތަކުން އެ އިންތިހާބަކަށް ކުރިމަތިލާ ކެންޑިޑޭޓެއްގެ ކިބައިގައި ހުންނަންވާ ޝަރުތު ފުރިހަމަވާ ފަރާތަކަށްވެސް ވާންޖެހެއެވެ.

ވެރިކަންކުރާ ކޯލިޝަންގައި އެމްއެންޕީއާއި އެމްޑީއޭ ހިމެނުނު ނަމަވެސް، އެ ދެޕާޓީގެ ތެރެެއިން ކެބިނެޓްގައި އެމްޑީއޭ ތަމްސީލެއް ނުކުރެއެވެ. އަދި އެ ޕާޓީއަކީ ކެމްޕޭންގައިވެސް އެއްވެސް ދައުރެއް އަދާކޮށްފައިވާ ޕާޓީއެއްވެސް ނޫންކަން ފާހަގަ ކޮށްލެވެއެވެ. އެމްއެންޕީގެ ފަރާތުން އެއް ބޭފުޅަކު މުއިއްޒުގެ ކެބިނެޓުގައި އިންނަވައެވެ. އެއީ އެޓާރނީޖެނެރަލް އުޝާމްއެވެ.