ބޮލީވުޑްގެ މަޝްހޫރު ގިނަ ފިލްމުތަކުން ނުބައިބައި ރޯލުން ފެނިފައިވާ ސޯނޫ ސޫދަށް މިހާރު ޕްރޮޑިއުސަރުންނާއި ޑައިރެކްޓަރުން ހުށަހަޅާ ރޯލުތައް ތަފާތުކަން ފާހަގަ ވާކަމަށް އޭނާ ބުނެފިއެވެ.
ސޯނޫ ފާހަގަވެގެންދަނީ އާންމު ދިރިއުޅުމުގައި އިންސާނިއްޔަތަ މަސައްކަތްކުރާ ތަރިއެއްގެ ގޮތުގައެވެ. އެގޮތުން އިންޑިއާގެ އެކި ސަރަހައްދުތަކަށް މަސައްކަތްކުރަން ހިޖުރަކޮށްގެން އުޅޭމީހުނަށް ކޯވިޑްގެ ލޮކްޑައުންގެ ސަބަބުން ކުރިމަތިވި ދަތިތަކަށް އެހީވުމަށް އޭނާ އިސްނަގައިގެން ފެށި މަސައްކަތަކީ ދުނިޔޭގެ ފެންވަރުގައިވެސް ފާހަގަވެގެންދިޔަ މަސައްކަތެކެވެ. އޭނާ ވަނީ ކޯވިޑްގެ ޕެންޑަމިކްގައި ފަގީރުންނަށް ކާނާ ބެހުމުގެ މަސައްކަތުގައި އަމަލީގޮތުންވެސް ބައިވެރިވެފައެވެ.
މި ފަހުން އޭނާ ވަނީ ޖޫހޫގައި ހުންނަ އޭނާގެ 8 ޕްރޮޕަޓީއެއް މޯގޭޖްކޮށް ބޭނުންޖެހިފައިވާ މީހުނަށް އެހީވުމަށް 10 ކަރޯޑް ރުޕީސް ވެސް އެއްކޮށްފަ އެވެ.
މީގެ އިތުރުން އިންޑިއާގެ އެކި ހިސާބުތަކުގައި މަސައްކަތްކުރަން ހިޖުރަކުރުމަށްފަހު އާއިލާއާ ހަމައަށް ދާންބޭނުންވެ، ލޮކްޑައުންގެ ސަބަބުން ނުދެވި ތިބި މީހުނަށް ޗާޓަރ ފްލައިޓް ހަމަޖައްސައިދީ، ކަޒަކިސްތާނުގައި ގައުމަށް ނާދެވި ތިބި 135 ދަރިވަރުން އިންޑިއާއަށް ގެނައުމަށްވެސް ޗާޓަރ ފްލައިޓެއް ސޯނޫ ވަނީ ހަމަޖައްސައިދީފަ އެވެ.
އިންސާނިއްޔަތަށް އޭނާ ކޮށްދޭ ހިދުމަތްތަކުގެ އަގު ވަޒަންކުރުމަށް ހައިދަރު އާބާދުގެ ތަޢުލީމީ އިންސްޓިޓިއުޓަކުން އެ ތަނުގެ އެއް ޑިޕާޓްމެންޓްގެ ނަން ސޯނޫ ސޫދުގެ ނަމަށް ބަދަލުކޮށްފައިވެސް ވެއެވެ.
An educational institute in Hyderabad names their Arts & Humanities department after #SonuSood. pic.twitter.com/CJSM6q3xGC
— Filmfare (@filmfare) December 2, 2020
ދާދިފަހުން ޓައިމްސް އޮފް އިންޑިއާއިން އޭނާގެ ފިލްމީ ކުރިމަގާ ގުޅޭގޮތުން ކުރި ސުވާލަކަށް ޖަވާބުދެމުން، ވިލަންއެއް ނުވަތަ ނުބައިބައި މީހެއްގެ ގޮތުގައި ބޮޑު ސްކްރީނުން ބެލުންތެރިން ބަލައިގަނެފައިވާ ސޯނޫ ބުނީ އޭނާއަށް މިހާރު ލިބޭ ސްކްރިޕްޓްތައް އޭނާގެ އާންމު ދިރިއުޅުމާ ގުޅުވަން ޕްރޮޑިއުސަރުން މަސައްކަތަ ކުރާކަމަށެވެ. ނަމަވެސް އޭނާގެ އާންމު ދިރިއުޅުމުގެ ކަންކަމަކީ މުޅިން ތަފާތު ކަންކަން ކަމަށާއި ސްކްރީނުން އޭނާ ބަލައިގަނެފައިވާ ގޮތް ނޫން ގޮތަކަށް ހުށަހަޅާއިދޭން އުނދަގޫ ވާނެކަމަށްވެސް ސޯނޫ ބުންޏެވެ.
ނަމަވެސް އޭނާ މުމްބާއީއަށް އައީ އެކްޓަރަކަށް ވުމަށް ކަމަށާއި އޭނާއަށް ހިތްހަމަ ޖެހުން ލިބޭ ކޮންމެ ކަމެއް އޭނާ ކުރާނެކަމަށްވެސް ސޯނޫ ބުންޏެވެ. އެގޮތުން އައު ކެރެކްޓަރ ތަކާއި އައު ރޯލުތަކާއި އައު ވާހަކަތައް ކުރިއަށް އޮތްތާ ފެންނާނެ ކަމަށްވެސް ސޯނޫ ބުންޏެވެ.
1999 ވަނަ އަހަރު ސައުތު އިންޑިއަން ފިލްމު ތަކުން އެކްޓިންގ ކެރިއަރފެށި ސޯނޫ މިހާތަނަށް ގިނައިން ކުޅެފައި ހުރީ ވިލަންގެ ރޯލެވެ. ހިންދީ ފިލްމަކުން އެންމެ ފަހުން ސޯނޫ ފެނުނީ 2018 ވަނަ އަހަރު ރޯހިތު ޝެއްޓީގެ ސިމްބާއިންނެވެ.
