ވެރިކަންކުރާ ޕީޕީއެމް/ޕީއެންސީގެ ޓިކެޓުގައި ރައްޔިތުންގެ މަޖިލިހަށް ވާދަކުރަން ބޭނުންވާ ފަރާތްތަކަށް މިއަދުންފެށިގެން ފުރުސަތު ހުޅުވާލާ، ދެ ޕާޓީގެ މަޖިލިސް ޕްރައިމަރީ މިމަހުގެ 23 ވަނަ ދުވަހު ބޭއްވުމަށް ހަމަޖައްސައިފިއެވެ.
މިކަން ހާމަކޮށްފައިވަނީ ރޭ ބެއްވުނު ޕްރޮގްރެސިވް ކޮންގްރެސް ކޯލިޝަންގެ ޖޮއިންޓް ސެނެޓްގެ 6 ވަނަ ބައްދަލުވުމުގައި ނިންމި ކަންތައް ރައްޔިތުންނަށް ހާމަކޮށްދިނުމަށްޓަކައި ބޭއްވި ނޫސްވެރިންގެ ބައްދަލުވުމުގައެވެ.
މި ބައްދަލުވުމުގައި ވާހަކަ ދައްކަވަމުން ޕީއެންސީގެ ޗެއަރޕާސަން، އަދި ރައީސް މުއިއްޒުގެ އިސް މުޝީރު އަބުދުއްރަހީމް ވިދާޅުވީ، ޕްރައިމަރީގައި ވާދަކުރާ ފަރާތްތަކަށް ފުރުސަތު ހުޅުވާލުމަށްފަހު ޕްރައިމަރީ ބޭއްވުމަށް ހަމަޖައްސާފައިވަނީ މިމަހުގެ 23 ވަނަ ދުވަހު ކަމަށެވެ.
2024 ވަނަ އަހަރު ބާއްވާ ރައްޔިތުންގެ މަޖިލީހުގެ އިންތިޚާބުގައި އަޅުގަނޑުމެންގެ ކެނޑިޑޭޓުންނަށް ވާދަކުރުމުގެ ފުރުސަތު މިއޮތީ ހުޅުވާލެވިފައި، އަޅުގަނޑުމެންގެކޯލިޝަނުގެ ޓިކެޓަށް ޝައުޤުވެރިވެ ވަޑައިގަންނަވާ ބޭފުޅުންނަށް ހުޅުވާލެވޭ ޕްރައިމަރީ ނުވަތަ ކުރިމަތިލުމުގެ ފުރުސަތު މި ހުޅުވާލަނީ މާދަމާ. ޕްރައިމަރީ މި ބާއްވަނީ މިމަހުގެ 23 ވަނަ ދުވަހު.
އަބުދުއްރަހީމް ވިދާޅުވިއެވެ.
އަބުދުއްރަހީމް ވިދާޅުވީ މި ޕްރައިމަރީގައި ވާދަކުރެވޭނީ މިމަހުގެ 10 ވަނަ ދުވަހުގެ ނިޔަލަށް އެ ޕާޓީގައި ތިބި މެމްބަރުންނަށް ކަމަށާއި، ކުރިމަތި ލުމުގެ ފުރުސަތު 11 ވަނަ ދުވަހާއި ހަމައަށް ކުރިމަތި ލުމުގެ ފުރުސަތު ހުޅުވާލެވިފައި ވާކަމުގައެވެ.
އަބުދުއްރަހީމް ވިދާޅުވީ ކުރިޔަށް އޮތް މަޖިލިސް އިންތިޚާބުގައި ވާދަކުރުމާއިބެހޭ އުސޫލެއްވެސް ރޭ ބޭއްވުނު ޖޮއިން ސެނެޓުން ފާސްކޮށްފައިވާކަމުގައެވެ.
މިރޭ އަޅުގަނޑުމެން މި ނިންމި ނިންމުމަކީ ކުރިޔަށް އޮތް ރައްޔިތުންގެ މަޖިލީހުގައި އަޅުގަނޑުމެންގެ ކެނޑިޑޭޓުން ކަނޑައަޅާނެ ގޮތާއި ކެނޑިޑޭޓުންނަށް ކުރިމަތިލެވޭނެ ގޮތާއި އެކަންކަމާއި ގުޅޭ އުސޫލެއް މިރޭ އަޅުގަނޑުމެން ސެނެޓުން ފާސްކުރީ.
ޕީޕީއެމް/ޕީއެންސީން ރޭވަނީ ދެޕާޓީގެ އިސް ލީޑަރަކަށް ރައީސް މުއިއްޒު ހަމަޖައްސާފައެވެ.
