އައްޑޫ ސިޓީގައި މާރާމާރީއާއި ގޭންގު ކުށްތައް އާދަޔާ ޚިލާފަށް އިތުރުވުމާއި ގުޅިގެން އެ ސިޓީގައި ފުލުހުން ފަށާފައިވާ ޚާއްސަ އޮޕަރޭޝަންގައި  މާރާމާރީ ހިންގުމަށް ތައްޔާރުކޮށްފަ ހުރި ކަމަށް ބެލެވޭ ތޫނު ހަތިޔާރާއި، ދަނގަޑުބުރިތަކާއި އެހެނިހެން އާލާތްތައް ހޯދާފައިވާކަމަށް ފުލުހުން ބުނެފިއެވެ.

ފުލުހުން ހާމަކޮށްފައިވާ ގޮތުގައި މި ތަކެތި ހޯދާފައިވަނީ މިހާރު ކުރިޔަށްދާ މި އޮޕަރޭޝަނުގައި، ހިތަދޫ ސަރަހައްދުގައި ގްރޫޕުތަކުން އެއްވެ އުޅޭ ތަންތަން ފުލުހުން ބަލައި ފާސްކުރަމުގެ ތެރެއިންނެވެ.

ފުލުހުން ބުނެފައިވަނީ، މި އޮޕަރޭޝަން ކުރިަޔަށް ގެންދަނީ ގޭންގު ހަދައިގެން މާރާމާރީ ހިންގާ މީހުން ހުއްޓުވުމަށް އައްޑޫ ސިޓީ ޕޮލިސް ސްޓޭޝަންތަކާއި، ސައުތު ޕޮލިސް ސީރިއަސް ކްރައިމް ސެލް އަދި ސްޕެޝަލިސްޓް އޮޕަރޭޝަންސްގެ ފުލުހުން ގުޅިގެން ކަމުގައެވެ.

މި ޑިސެމްބަރު 3 ވަނަ ދުވަހުން ފެށިގެން ކުރިއަށް ގެންދާ މި އޮޕަރޭޝަނުގައި މިހާތަނަށް 10 މީހުން ހައްޔަރުކޮށްފައިވާ ކަމަށްވެސް ފުލުހުން ބުނެފައި ވެއެވެ. އެ މީހުން ހައްޔަރުކޮށްފައިވަނީ މާރާމާރީ ހިންގި ކަމުގެ ތުހުމަތުގައި ކަމުއެވެ. އޭގެ ތެރޭގައި ހިމެނެނީ 18 އަހަރުގެ މީހަކާއި، 19 އަހަރުގެ 2 މީހުންނާއި، 20 އަހަރުގެ 3 މީހުންނާއި، 21 އަހަރުގެ މީހަކާ އަދި 23 އަހަރުގެ 3 މީހުންނެވެ.

މައްސަލައާ ގުޅިގެން އެ މީހުންގެ ބަންދާމެދު ގޮތެއް ނިންމުމަށް ހިތަދޫ މެޖިސްޓްރޭޓް ކޯޓަށް ހާޒިރުކުރުމުން ޝަރީއަތް ނިމެންދެން 10 މީހުންވެސް ބަންދުކުރުމަށް ކޯޓުން އަމުރުކޮށްފައިވެއެވެ.

މި މައްސަލަތައް އައްޑޫ ސިޓީ ޕޮލިސް ސްޓޭޝަންތަކާއި ސައުތު ޕޮލިސް ސީރިއަސް ކްރައިމް ސެލް ގުޅިގެންދަނީ ތަހުގީގު ކުރަމުންދާކަމަށްވެސް ފުލުހުން ބުނެފައި ވެއެވެ.

އައްޑޫގައި ގޭންގު މާރާމާރީތައް އިތުރުވެފައިވާއިރު، މާލޭގައިވެސް މިދުވަސްވަރު ހިނގަމުންދާ މާރާމާރީތައް ވަނީ ވަރަށްބޮޑުތަން އިތުރު ވެފައެވެ. ބައެއް ފަރާތްތަކުން ބުނަމުންދަނީ މާރާމާރީތައް އިތުރުވެފައިވަނީ ނިިދިޔަ ރިޔާސީ އިންތިޚާބާ ދިމާކޮށް ގިނަ އަދަދެއްގެ ކުށްވެރިން ޖަލުން ދޫކުރުމާއި ގުޅިގެން ކަމުގައެވެ.