ރާއްޖެ އެތެރެކުރާ މުދާ ކްލިއާކުރަން ޝިޕިންގ އޭޖެންޓުން އެކި ނަންމުގައި ނަގަމުންދާ ފީތަކާއި ނުސީދާ ގޮތުން ނަގަމުންދާ ފްރައިޓް ޗާޖުތައް ނަގާނެގުން ހުއްޓުވުމަށް، އަވަސް ހައްލެއް ހޯއްދަވައި ދެއްވާނެކަމުގެ ޔަޤީންކަން ޓްރާންސްޕޯޓް މިނިސްޓަރ ޢާއިޝަތު ނަހުލާ ދެއްވާފައި ވާކަމަށް ޓްރޭޑް ޔޫނިއަނުން ބުނެފިއެވެ.
މޯލްޑިވްސް ޓްރޭޑް ޔޫނިއަންގެ ޓީމެއް މިނިސްޓަރ ނަހުލާއާ އިއްޔެ ވަނީ ބައްދަލުކުރައްވާފައެވެ. ޓްރޭޑް ޔޫނިއަންގެ ނައިބު ރައީސް ސަޢުދުﷲ އަޙްމަދު ޚަބަރު އޮންލައިނަށް ވިދާޅުވީ މިނިސްޓަރ އާއި ބައްދަލުކުރެއްވުމުން، ވިޔަފާރިވެރިންގެ ހުރި ކަންބޮޑުވުންތަކަށް އަވަސް ހައްލެއް ހޯދަވައިދެއްވާނެ ކަމުގެ ޔަޤީންކަން މިނިސްޓަރ ނަހުލާ ދެއްވާފައިވާކަމަށެވެ.
ސަޢުދުﷲ ވިދާޅުވީ މިނިސްޓަރާ މައިގަނޑު ގޮތެއްގައި މަޝްވަރާ ކުރެއްވީ ޝިޕިންގ އެޖެންޓުން ނުވަތަ ފުރައިޓު ފޯވާޑަރުން ޑެލިވަރީ އޯޑަރު ދޫކުރުމަށް ސީދާ ގޮތުންނާއި ނުސީދާ ގޮތުން ނަގަމުން ގެންދާ ފީތައް ނެގުން ހުއްޓުވުމާ ގުޅޭގޮތުންކަމަށެވެ. އަދި މިއީ މައިގަނޑު ގޮތެއްގައި މުދާ އިންޕޯޓުކުރުމަށް ބަރޯސާވެފައިވާ ވިޔަފާރީގެ މާހައުލެއް އޮތް ރާއްޖޭގެ ވިޔަފާރި ތަކަށް ނުހަނު ބޮޑު ތަކުލީފެއް ކަމަށް ސަޢުދުﷲ ވިދާޅުވިއެވެ. އޭނާ ވިދާޅުވީ ރާއްޖޭގައި ހިދުމަތްދޭ ޝިޕިން އޭޖެންސީތައް ޓްރާންސްޕޯޓު އޮތޯރިޓީގައި ރަޖިސްޓްރީ ކުރާގޮތަށް އެކުލަވާލައި ޖުލައިމަހު އާންމުކުރި ގަވާއިދު އެ އޮތޯރިޓީން އުވާލުމުން އެކަމާގުޅޭގޮތުންވެސް މިނިސްޓަރާ މަޝްވަރާ ކުރެވުނު ކަމަށެވެ.
"އަޅުގަނޑުމެން މިނިސްޓަރަށް ދެންނެވިން ގަވާއިދު އުވާލުމުން ވިޔަފާރިވެރިންގެ ހުރި ކަންބޮޑުވުން. މިނިސްޓަރ ވިދާޅުވީ ގަވާއިދު އުވާލީ އޭގައި ގާނޫނީގޮތުން އިސްލާހުކުރަންޖެހޭ ކަންތައްތަކެއް ހުރުމުން ކަމަށް. އެހެންކަމުން އެކަންކަން އިސްލާހު ކުރުމަށްފަހު. އަލުން އެގަވާއިދު އާންމުކޮށް، ވަރަށް އަވަހަށް ތަންފީޒު ކުރަން ފައްޓަވާނެކަމަށް".
ޓްރޭޑްޔޫނިއަންގެ ނައިބު ރައީސް ސަޢުދުﷲ އަޙްމަދު ވިދާޅުވިއެވެ.
ޖުލައި 16ގައި ޓްރާންސްޕޯޓް މިނިސްޓްރީން އާއްމުކޮށް، ދެ މަސް ފަހުން ސެޕްޓެމްބަރު 16 ގައި އުވާލި "ދިވެހިރާއްޖޭގައި ޝިޕިން އެޖެންސީގެ ހިދުމަތް ދިނުމާ ބެހޭ ގަވާއިދަކީ" ޝިޕިންގ އެޖެންޓުން އެކި ނަންނަމުގައި ފީތައް ނަގަމުންދާ މައްސަލައަށް ހައްލެއް ހޯދުމަށް ހެދި ގަވާއިދެއް ކަމަށް ޓްރާންސްޕޯޓް އޮތޯރިޓީން ވަނީ ވިދާޅުވެފަ އެވެ. ނަމަވެސް މި ގަވާއިދު މިނިސްޓަރ އުވާލެއްވުމުން ގިނަ ވިޔަފާރިވެރިން ވަނީ މިނިސްޓަރާއި މެދު ނުރުހުން ފާޅުކޮށްފައެވެ. އަދި މިނިސްޓަރާއި ދެކޮޅަށް އޭސީސީއަށް މަސްސަލައެއް ވެސް ވައްދާފައި ވެއެވެ.
ނަމަވެސް ގަވާއިދު އުވާލީ މަޖިލީހުގެ އިގްތިސާދީ ކޮމިޓީގައި ވެސް އެކަމާ ގުޅޭގޮތުން ވާހަކަ ދެކެވި، ގަވާއިދު އުވާލަން ލަފާދިނުމުން، ގަވާއިދާ ގުޅޭގޮތުން ދައުލަތުގެ ބަންޑާރަ ނާއިބުގެ އޮފީހާވެސް މަޝްވަރާ ކުރެއްވުމަށް ފަހު ކަމަށް މިނިސްޓްރީން މަޢުލޫމާތު ދެއްވައެވެ.
