ފަހި ދިރުއުޅުން ކޯޕަރޭޝަން (އެފްޑީސީ)އިންވެސް އެ ކުންފުނީގެ ރަސްމީ ދަތުރުތަކުގެ ޚަރަދުތަކުގެ ތަފްސީލުތައް 15 ދުވަސްތެރޭ ހާމަކުރުމަށް ނިންމާ އެކަން އިއުލާން ކޮށްފިއެވެ.
އެކުންފުނިން މިއަދު ކުރި ޓުވީޓެއްގައި ބުނެފައިވަނީ ރައިސް މުހައްމަދު މުއިއްޒުގެ އިސް ނެންގެވުމާ އެއްގޮތަށް އެކުންފުނިންވެސް ކުރާ ރަސްމީ ދަތުރުތަކުގެ ތަފްސީލުތައް ދަތުރުތައް ނިމޭތާ 15 ދުވަސްތެރޭ ހާމަކުރުމަށް ނިންމާފައިވާ ކަމުގައެވެ.
އެފްޑީސީ ވެގެން ދިޔައީ ޑރ. މުއިއްޒުގެ ރަސްމީ ދަތުުރުތަކުގެ ތަފްސީލު ދަތުރު ނިމޭތާ 15 ދުވަސްތެރޭ ހާމަކުރުމަށް ނިންމި ނިންމުމާ އެއްގޮތަށް އަމަލުކުރުމަށް ނިންމި ފުރަތަމަ ކުންފުނި ކަމުގައެވެ.
ދާދިފަހުން ތުރުކީއަށް ކުރެއްވި ރަސްމީ ދަަތުރުފުޅަށްފަހު ރައީސް މުއިއްޒު ވިދާޅުވެފައިވަނީ އެމަނިކުފާނު ރާއްޖެއިން ބޭރަށް ކުރައްވާ ހުރިހާ ދަތުރުފުޅެއްގެވެސް މާލީ ތަފްސީލުތައް ދަތުރުފުޅު ނިމޭތާ 15 ދުވަސް ތެރޭ ހާމަކުރައްވާނެ ކަމުގައެވެ.
ފަހި ދިރިއުޅުން ކޯޕަރޭޝަނަކީ ރައްޔިތުންނަށް އަތްފޯރާ ފަށުގައި ބޯހިޔާވަހިކަން ފޯރުކޮށްދިނުމުގެ ސިޔާސަތުގެ ދަށުން މުޅި ރާއްޖެއަށް އަމާޒުކޮށް ބޯހިޔާވަހިކަން ފޯރުކޮށްދިނުމުގެ މަޝްރޫއުތައް އެއްފުރާޅެއްގެދަށުން ކުރިއަށް ގެންދިއުމުގެ މަގުސަދުގައި 25 މާރިޗު 2019 ގައި އުފައްދާފައިވާ ކުންފުންޏެކެވެ.
