އިންފޮމޭޝަން ކޮމިޝަނަރު ފެނަކައިގެ ދަރަނީގެ ތަފްސީލު ހާމަކުރުމަށް އެންގީ ރަގަޅަށްކަމަށް ހައި ކޯޓުން ހުކުމް ކޮށްފިއެވެ.
ފެނަކައިން އެކި ފަރާތްތަކަށް ދައްކާންޖެހޭ ފައިސާގެ ތަފްސީލުތައް ހާމަކުރުމަށް އިންފޮމޭޝަން ކޮމިޝަނަރ ފާއިތުވި އޮކްޓޯބަރުމަހު އެންގުމުން އެކުންފުނިންވަނީ އެނިންމުން ހައި ކޯޓުގައި އިސްތިއުނާފް ކޮށްފައެވެ.
މިމައްސަލާގައި ހައިކޯޓުން ކުރި ހުކުމުގައި ބުނެފައިވަނީ، ފެނަކައިން ފައިސާ ދައްކާންޖެހޭ ކުންފުނިތަކުގެ ނަމާއި އެހެނިހެން މައުލޫމާތަކީ މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން ހާމަ ނުކުރެވޭނެ މައުލޫމާތެއްކަމަށް ފެނަކައިން ބުނި ނަމަވެސް، އެ މައުލޫމާތު ހާމަކުރުމުން ތިންވަނަ ފަރާތުގެ ވިޔަފާރިއަށް ގެއްލުންވާނެކަމަށް ބެލެވެން ނެތްކަމުގައެވެ.
އޭގެ އިތުރުން ހުކުމުގައި ބުނެފައިވަނީ، އެމައުލޫމާތު ހާމަކުރުމަކީ ސިއްރު ހިފެހެއްޓުމުގެ އުސޫލާއި ޚިލާފްކަމެއްކަންވެސް ފެނަކައަށް ސާބިތު ކޮށްދެވިފައި ނުވާކަމުގައެވެ.
އެގޮތުން ތިން ފަނޑިޔާރުންގެ އިއްތިފާގުން ކުރި ހުކުމުގައި ބުނެފައިވަނީ، ފެނަކައިން ފައިސާ ދޭންޖެހޭ ފަރާތްތަކުން މައުލޫމާތު ހާމަކުރުމަށް އިންފޮމޭޝަން ކޮމިޝަނަރު އެންގި އެންގުމަށް ބަދަލު ގެންނާންޖެހޭ ސަބަބެއް ނެތްކަމުގައެވެ.
ފަނޑިޔާރު ފައިސަލް ރިޔާސަތު ބެއްލެހެއްޓެވި ހައިކޯޓުގެ މިމައްސަ ބެލި ބެންޒުގައި ދެން ތިއްބެވީ ފަނޑިޔާރު ހުސައިން މަޒީދު އާއި ފަނޑިޔާރު ފާތިމަތު ފަރުހީޒާއެވެ.
