ކުވައިތުގެ އާ ވަލީއަޙުދު ޝެއިޚް މިޝާލް އަލް އަޙްމަދު އައްޞަބާހު މަގާމުގެ ހުވާ ކުރައްވައިފިއެވެ.
ޝެއިޚް މިޝާލް ވަލީއަޙުދު ކަމުގެ މަގާމާއި ހަވާލްވެ ވަޑައިގަތީ ކުވައިތުގެ އަމީރުކަމުގެ މަގާމާއި އެމަނިކްފާނުގެ އެއްބަފާ ބޭބޭފުޅު ޝެއިޙް ނަވާފް އަލް އަހުމަދު އައްޞަބާހު ހަވާލުވެ ވަޑައިގަތްތާ ދިހަ ދުވަސް ފަހުންނެވެ. ކުވައިތުގެ އަމީރުކަމާއި ޝެއިޚް ނަވާފް ހަވާލުވެ ވަޑައިގަތީ، އަމީރުކަމުގައި މަގާމުގައި ހުންނެވި އެ މަނިކުފާނުގެ އެއްބަފާ ބޭބޭފުޅު މިދިޔަމަހުގެ 29 ވަނަ ދުވަހު އުމުރުފުޅުން 91 އަހަރުފުޅުގައި އަވާހާރަ ވުމާއި ގުޅިގެންނެވެ.
ކުވައިތުގެ ވަލީއަޙުދުކަމުގެ މަގާމަށް ޝެއިޚް މިޝާލް އައްޔަން ކުރެވުނުތާ ކުޑަވަގުތު ކޮޅެއްގެ ތެރޭގައި ޕާލަމެންޓުގެ ފުރިހަމަ އަޢުލަބިއްޔަތުން ވަނީ އެމަނިކުފާނަށް ރުހުން ދެއްވާފައެވެ. އަދި ޕާލަމަންޓަށް ވަޑައިގެން އެމަނިކުފާނު ވަނީ އާ އަމީރުގެ ކުރިފުޅުމަތީގައި މަގާމުގެ ހުވާ ކުރައްވާފައެވެ.
އުމުރުފުޅުން 80 އަހަރު ފުޅުގެ ޝެއިޚް މިޝާލް ވަލީއަޙުދު ކަމުގެ މަގާމަށް ވަޑައިގަތުމުގެ ކުރިން، 2004 އިންފެށިގެން ހުންނެވީ އެގައުމުގެ ނެޝަނަލް ގާޑްގެ ނާއިބުކަމުގެ މަގާމުގައެވެ. އަދި މީގެ އިތުރުން ކުވައިތުގެ ސްޓޭޓް ސެކިއުރިޓީގެ އެންމެ އިސްވެރިޔާގެ މަގާމު 13 އަހަރުވަންދެން އަދާކުރެއްވިއެވެ. އިނގިރޭސި ވިލާތުން ތަޢުލީމު ހާސިލްކުރެއްވި ޝެއިޚް މިޝާލް ވަނީ އެގައުމުގެ ނޭޝަނަލް ގާޑު ތަރައްގީ ކުރުމުގައި ގިނަގުނަ މަސައްކަތްތަކެއް ކުރައްވާފައެވެ.
ކުވައިތުގެ ވަލީއަޙުދު ކަމުގެ މަގާމަށް ޝެއިޚް މިޝާލް އައްޔަން ކުރުމާއި ގުޅިގެން ގިނަ ތަޖުރިބާ ކާރުން ވިދާޅުވާގޮތުގައި، އުމުރުފުޅުން 83 އަހަރުގެ އާ އަމީރު ސަރުކާރުގެ ގިނަ ބާރުތައް ވަލީ އަޙުދާއި ހަވާލު ކުރައްވާނެއެވެ. ސަބަބަކީ ޝެއިޚް މިޝާލްއަކީ މިހާތަނަށް އައިއިރު ސިޔާސީ ގޮތުން ނުފޫޒު ގަދަ ބޭފުޅަކަށް ނުވެފައި، އުމުރުފުޅުގެ ގޮތުން ތަޖުރިބާކާރު ބޭފުޅަކަށް ވުމެވެ. އެގިފައިވާ ގޮތުގައި ފާއިތުވެދިޔަ ތަނުގައި ޝެއިޚް މިޝާލަށް ކުވައިތުގެ އެތަކެއް އިސްމަގާމުތަކެއް ހުށަހެޅުނެވެ. އެހެންނަމަވެސް، ސިޔާސީ ހަމަނުޖެހުންތަކުން ދުރުވެ ވަޑައިގަތުމުގެ މަގުސަދުގައި އެމަނިކުފާނު ވަނީ އެމަގާމުތައް ގަބޫލުފުޅު ކުރެއްވުމަށް އިންކާރު ކުރައްވާފައެވެ.
ވަލީއަޙުދު ކަމުގެ މަގާމާއި ޙަވާލުވެވަޑައި ގަތުމަށްފަހު ގައުމާ މުޚާތަބް ކުރައްވާ އެންމެ ފުރަތަމަ ދެއްކެވި ވާހަކަފުޅުގައި އެމަނިކުފާނު ވިދާޅުވެފައިވަނީ، ސަރަހައްދީ ގޮތުންނާއި ބައިނަލްއަޤްވާމީގޮތުން އަދާކުރައްވަންޖެހޭ ޒިންމާތައް އަދާކުރެއްވުމުގައި ކުވައިތު ދެމި އޮންނާނެއެވެ. އަދި އެމަނިކުފާނުގެ މަގުސަދަކީ ސުލްޙަވެރި ޑިމޮކްރެޓިކް ބަދަލުތައް ކުވައިތައް ގެންނެވުމެވެ.
