ފައިތުވި ރިޔާސީ އިންތިޚާބުގެ ތެރޭގައި ގދ. ތިނަދޫއަށް ސިޓީއެއްގެ ދަރަޖަ ދިނުމާއެކު އެ ސިޓީގެ ހައިސިއްޔަތު އޮޅި އުފެދުނު ސުވާކުތަކަށް ޖަވާބު ހޯދުމަށް ރައްޔިތުންގެ މަޖިލިހުގެ ލާމަރުކަޒީ ކޮމިޓީއަށް މިއަދު ހުށަހަޅައިފިއެވެ.
ރައީސް ސާލިހުގެ ސަރުކާރުން ގދ. ތިނަދޫއަށް ސިޓީއެއްގެ ދަރަޖަ ދީފައިވަނީ ފާއިތުވި ރިޔާސީ އިންތިޚާބުގެ ތެރޭގައި އެމަނިކުފާނު ވެވަޑައިގެންނެވި ރިޔާސީ ވައުދެއް ފުއްދެވުމުގެ ގޮތުންނެވެ. އެހެންނަމަވެސް އެ އެރަށަށް ސިޓީއެއްގެ ދަރަޖަ ދިން ނަމަވެސް، އެކަމުގައި ގިނަ ފުށުއެރުންތަކެއް ހުރިއިރު، އެ ރަށަށުގެ ކައުންސިލްގެ ހައިސިއްޔަތުވެސް ސަރުކާރުގެ އެކި އިދާރާތަކުން ބަލައިގެންފައިވަނީ އެކި ގޮތަށެވެ.
މިއަދު ބޭއްވުނު ލާމަރުކަޒީ ކޮމިޓީއަށް، ކައުންސިލްގެ ހައިސިއްޔާތާމެދު އުފެދިފައިވާ ސުވާކުތަކާއި ގުޅޭގޮތުން ތިނަދޫ ކައުންސިލްގެ ރައީސްގެ އިތުރުން އެލްޖީއޭއާއި އަދި ލާމަރުކަޒީ މިނިސްޓްރީންވެސް ހާޒިރު ވެފައި ވެއެވެ.
ކޮމިޓީގައި ވާހަކަ ދައްކަވަމުން ތިނަދޫ ކައުންސިލްގެ ރައީސް ސައުދު އަލީ ވިދާޅުވީ ކުރީގެ ރައީސް ތިނަދޫއަށް ސިޓީއެއްގެ ދަރަޖަ ދީފައިވި ނަމަވެސް އެކަމާއި ގުޅޭގޮތުން ޚިލާފްތަކެއް އުފެދިފައި އެބަހުރި ކަމަށާއި، ޚިޔާލުތަފާތުވުންތައް އުފެދިފައިވަނީ ޤާނޫނަށް ގެނެވުނު 8 ވަނަ އިސްލާހާއި 9 ވަނަ އިސްލާހުގައި ދިމާވި މައްސަލައަކުން ކަމަށެވެ.
ސައުދު ވިދާޅުވީ މިމައްސަލަ ހައްލުކުރުމަށް އެކި މަސައްކަތް ކުރެވުނު ނަމަވެސް އެކި ފަރާތްތަކުން އެކި ގޮތަށް ގާނޫނު މާނަ ކުރުމުގެ ސަބަބުން ޚިޔާލުތަފާތުވުން އުފެދިފައިވާ ކަމަށާއި، ސަރުކާރު ބައެއް އިދާރާތަކުން އެކައުންސިލަށް ސިޓީ ކައުންސިލްގެ ގޮތުގައި އެޑްރެސް ކުރަމުންދާއިރު އަނެއްބައި އިދާރާތަކުން އެކައުންސިލަށް ތިނަދޫ ކައުންސިލްގެ ގޮތުގައިވެސް އެޑްރެސް ކުރަމުން ދާކަމުގައެވެ.
އޮޓޮމެޓިކުން އަޅުގަނޑުމެންގެ އިދާރާ މިއޮތީ ސިޓީ ކައުންސިލަކަށް ބަދަލުވެފައި. އެހެންކަމަށްވަނީ ނަމަ އެ ސްކޭލްގައި ހިދުމަތް ދޭނަމަ އަޅުގަނޑުމެންގެ އޮނިގަނޑަށް ވެސް ބަދަލުތަކެއް އަންނަން ޖެހޭނެ، އިދާރާގައި އިތުރު މުވައްޒަފުން ވެސް އަންނަން ޖެހޭނެ، ބަޖެޓު ވެސް ލިބެން ޖެހޭނެ، ހައިސިއްޔަތަށް ވެސް ބަދަލު އަންނަން ޖެހޭނެ.
ސައުދު ވިދާޅުވިއެވެ.
ސައުދު ވިދާޅުވީ މީގެކުރިން އުފައްދާފައިވާ ސިޓީތައް އުފައްދާފައިވަނީ ގާނޫނުގެ 37 ވަނަ މާއްދާގެ ދަށުން ކަމުގައެވެ. އެގޮތުން ސިޓީތަކަށް ބަދަލުވުމާއެކު އެސިޓީގައި ކައުންސިލެއް ރައީސް އުފައްދަވަން ޖެހުނު ނަމަވެސް، އެކަން ނުކުރައްވާ ތިނަދޫ ސިޓީއަކަށް ބަދަލު ކޮށްފައިވަނީ ގާނޫނުގެ 51 ވަނަ މާއްދާގެ ދަށުން ކަމުގައެވެ.
ގާނޫނުގެ 51 ވަނަ މައްދާގައި ބުނެފައިވަނީ ވާގޮތުން އެކައުންސިލެއް ހިންގާނީ އޭރަކު އޮންނަ ރަށު ކައުންސިލަކުންކަމަށް ބުނެފައިވާކަމަށްވެސް ސައުދު ވިދާޅުވެފައި ވެއެވެ. އޭނާ އިތުރަށް ވިދާޅުވީ އެ އިދާރާ ރަސްމީކޮށް ސިޓީ ކައުންސިލަކަށް ބަދަލުވެފައި ނުވާތީ ސިޓީ ކައުންސިލަށް އައްޔަން ކުރާންޖެހޭ ސެކެޓްރީ ޖެނެރަލް އައްޔަން ކުރުމުގައި ސިވިލް ސާވިސް ކޮމިޝަނަށްވެސް ގޮންޖެހުންތައް ހުރި ކަމުގައެވެ.
މިމައްސަލައާއި ގުޅިގެން ލާމަރުކަޒީ މިނިސްޓަރު އާދަމް ޝަރީފް ވިދާޅުވީ އެ މިނިސްޓްރީން މަސަައްކަތް ކުރަމުންދަނީ ތިނަދޫއަކީ ސިޓީއެއްކަމަށް ބަލައިގެން ކަމަށާއި، ހިދުމަތްތައް ދިނުމަށް ބަޖެޓުގައި ބްލޮކް ގްރާންޓު ހިމަނައިގެން އެ ކަން ފަހިކޮށްދީފައިވާނެ ކަމަށެވެ. އަދި އޭނާ ވިދާޅުވީ ކަންކަން އިތުރަށް ރަގަޅުކުރުމަށް އޭޖީގެ ލަފައަކަށް އެމިނިސްޓްރީން އެދިފައިވާ ކަމުގައެވެ.
ކޮމިޓީގައި ވާހަކަ ދައްކަވަމުން އެލްޖީއޭގެ ޑިރެކްޓާ ޖެނެރަލް ޝަމްއޫނު އާދަމް ވިދާޅުވީ ސިޓީއެއްގެ ދަރަޖަ ލިބިގެންދާނީ އޭރަކު އޮންނަ ކައުންސިލެއް ނުވަތަ އާ ކައުންސިލެއް އިންތިޚާބު ކުރުމުން ކަމުގައެވެ. އޭނާ ވިދާޅުވީ އެހެންނަމަވެސް އޭރަކުން އޮންނަ ކައުންސިލެއްގެ ދައުރު ހަމަވުމުގެ ކުރިން ސިޓީއެއްގެ ދަރަޖަ ދީފިނަމަ ސިޓީ ހިނގަމުންދާނީ އޭރަކުން އޮންނަ ކައުންސިލެއްގެ ބާރުގެ ދަށުން ކަމުގައެވެ.
