މާލެ ސިޓީގެ މޭޔަރު ކަމަށް ކުރިމަތިލައްވާފައިވާ ބޭފުޅުންގެ ތެރެއިން އެމްޓީސީސީގެ ކުރީގެ ސީއީއޯ އަދި މެނޭޖިން ޑިރެކްޓަރު އާދަމް އާޒިމަށް ވުރެ ހީވާގި، ހިންގުންތެރި، ބޭފުޅެއް ނެތް ކަމަށް ވިދާޅުވެ، ތިނަދޫ ސިޓީ ކައުންސިލްގެ މޭޔަރު ސައުދު އަލީގެ ތާއީދު ވެސް އާޒިމަށް އޮތް ކަން ހާމަކުރައްވައިފައެވެ.

ސައުދު ވިދާޅުވީ އާޒިމަކީ ސަރުކާރުން ހަވާލު ކުރާ ޒިންމާތަކުގެ އިތުރުން ކުރާ ކޮންމެ މަސައްކަތެއް ވެސް އަމިއްލަ މަސައްކަތެއްގެ ގޮތުގައި ދެކިގެން ހަވާލު ކުރެވޭ ކޮންމެ ކަމެއް ވެސް ވަރަށް ގަޔާވެގެން ފުރިހަމައަށް އަދި ވަގުތަށް ނިންމަވާ ބޭފުޅެއް ކަމަށެވެ. އާޒިމަކީ ސިޔާސީ ހަޔާތުގައި ފެނިވަޑައިގެންނެވި އެންމެ ހީވާގި، ހިންގުންތެރި އެއް މެނޭޖިން ޑިރެކްޓަރު ކަމަށް ވެސް ސައުދު ވިދާޅުވިއެވެ.

އަދި ތިނަދޫއަށް ދިމާވެފައިވާ އެންމެ ބޮޑު އެއް މައްސަލަ، އިންޑަސްޓްރިއަލް ވިލެޖްގެ މައްސަލައަށް ހައްލެއް ހޯއްދަވައި ދެއްވާ ތިނަދޫ ސިޓީ ކައުންސިލުން ބޭނުންވާ ގޮތަށް ޓެކްނިކަލް ބޭފުޅުންގެ އެހީތެރިކަމާއެކު ކުރެވުނު މަސައްކަތާއި މަޝްވަރާ ކުރިއަށް ގެންދިޔައީ އާޒިމްގެ ލީޑަރޝިޕްގެ ދަށުން ކަން އޭނާ ފާހަގަ ކުރެއްވިއެވެ.

އާޒިމް މަސައްކަތަށް ބަހައްޓަވާ ފަރުވާތެރިކަމާއި ޝައުގުވެރިކަން ސިފަ ކުރައްވަމުން ސައުދު ވިދާޅުވީ ކިތަންމެ ކުޑަ ވަގުތުކޮޅަކަށް ތިނަދޫ އަށް ވަޑައިގެންނެވި ނަމަވެސް ކައުންސިލާ ބައްދަލު ކުރައްވައި ޕްރޮޖެކްޓް ކުރިއަށްދާ ގޮތާ ގުޅޭ ގޮތުން ރައްޔިތުންގެ މަޝްވަރާ އަބަދުވެސް އައްސަވާ ކަމަށެވެ.

އަދި އެކަންތައް ކޮށްދެވޭނެ ގޮތެއް އޮތްތޯ ބައްލަވާ އެކަމަށް މަގުފަހިކޮށް ދެއްވާ ކަމަށާއި މަސައްކަތް ކުރިއަށްދާއިރުވެސް ސިޓީ ކައުންސިލުގެ އެއްވެސް ކަންބޮޑުވުމެއް ހިއްސާ ކުރައްވައިފިނަމަ ވަރަށް އަވަހަށް ވަގުތުން އެފަދަ ކަންތަކަށް އެޓެންޑް ވާ ބޭފުޅެއްގެ ގޮތުގައި އާޒިމް އޭނާ ފާހަގަކުރެވެއެވެ.

އިންތިހާބީ މަގާމުތަކަށް އަންނަ ބޭފުޅުންނަކީ ރައްޔިތުންނާ ގާތުން މަސައްކަތްކުރަންޖެހޭ ބަޔަކަށް ވާއިރު މާލެ މޭޔަރުކަމަށް ވާދަކުރައްވާ އެމްޑީޕީ ކެންޑިޑޭޓް އާދަމް އާޒިމްގެ އެ ކޮލިޓީ ހުންނެވި ކަމަށާއި އަބަދުވެސް ފެނިގެންދިޔައީ ސިޔާސީ ވިސްނުމަށްވުރެ ރައްޔިތުންގެ ހާދިމެއްގެ ގޮތުގައި ހިދުމަތްކުރެއްވުމުގެ ވަތަނީ ވިސްނުން އިސްކުރެއްވި މަންޒަރު ކަން ތިނަދޫ މޭޔަރުގެ ވާހަކަފުޅުގައި ފާހަގަކުރެއްވިއެވެ.

ތިނަދޫގެ މޭޔަރު ސައުދުގެ ތާއީދު އާޒިމަށް އޮތް ކަމަށް ވިދާޅުވި އިރު، ހދ. ކުޅުދުއްފުށި ސިޓީގެ މޭޔަރު މުހައްމަދު އާތިފް ވެސް ވަނީ އާޒިމަށް ތާއީދު ކުރައްވައިފައެވެ.