އެމްޓިސީސީގެ ކުރީގެ ސީއީއޯ އާދަމް އާޒިމް މާލޭގެ މޭޔަރުކަމަށް އެމްޑީޕީގެ ޕްރައިމަރީގައި ވާދަކުރެއްވުމަށް ފޯމު ހުށަހަޅުއްވައިފިއެވެ. އެމްޑީޕީގެ އޮފީހުގައި އާޒިމް ފޯމު ހަވާލު ކުރައްވާފައިވަނީ އެމްޑީޕީގެ ޗެއަރޕާސަން ފައްޔާޒު އިސްމާއިލްއާއެވެ.
އާޒިމް ރައީސް ސާލިހުގެ ވެރިކަމުގެ ކުރީކޮޅު ހުންނެވީ އެމްޑަބްލިއުއެސްސީގެ މެނޭޖިން ޑިރެކްޓަރުކަމުގައެވެ. އެއަށްފަހު އޭނާ ދެން އަދާކުރައްވާފައިވަނީ އެމްޓީސީސީގެ ސީއީއޯކަމުގެ މަގާމެވެ. އާޒިމް ފާހަގަވެގެން ދިޔައީ އެމްޓީސީސީގެ ތާރީޚުގައިވެސް އެންމެ ކާމިޔާބުކޮށް އެކުންފުނި ހިންގެވި ފަރާތުގެ ގޮތުގައެވެ.
އާޒިމްވަނީ ރައީސް ޔާމިންގެ ދައުރުގައި އެސްޓީއޯގެ އެމްޑީގެ މަގާމުވެސް އަދާކުރައްވާފައެވެ.
އާޒިމް މާލޭގެ މޭޔަރުކަމަށް ކުރިމަތިލެއްވުމަށް ނިންމަވާފައިވާއިރު، އެމްޑީޕީގެ ވެރިކަމުގައި ޑިފެންސް މިނިސްޓަރުކަން ކުރެއްވި މާރިޔާ ދީދީވަނީ އާޒިމްއަކީ އެމަގާމަށް އެންމެ އެކަށީގެންވާ ބޭފުޅާކަމަށް ވިދާޅުވެ، އާޒިމްއަށް ތާއީދު ކުރައްވާނެކަން ހާމަކޮށް ޓުވީޓު ކުރައްވާފައެވެ.
އާޒިމްގެ އިތުރުން މާލޭގެ މޭޔަރުކަމަށް ވާދަކުރައްވާނެކަމަށް ރައީސް ސާލިހުގެ ވެރިކަމުގައި ޔޫތު މިނިސްޓަރުކަން ކުރެއްވި އަހުމަދު މަހުލޫފުވެސް ވަނީ ވިދާޅުވެފައެވެ. އެހެންނަމަވެސް އެމްޑީޕީގެ ޕްރައިމަރީގައި ދެބޭފުޅުން ވާދަކުރައްވާނެކަން އަދި ޔަގީން ކުރެވިފައެއް ނުވެއެވެ.
މާލޭގެ މޭޔަރުކަމަށް ވެރިކަންކުރާ ޕީއެންސީން ވާދަކުރެއްވުމުގެ ޝައުގުވެރިކަން ކުރީގެ ބަންޑާރަނައިބު އާޒިމާ ޝަކޫރުވަނީ ފާޅު ކުރައްވާފައެވެ. އަލަށް އުފައްދާ ރައީސް ޔާމިންގެ ޕީއެންއެފްއިން މާލޭ ސިޓީގެ މޭޔަރުކަމަށް ވާދަ ކުރައްވަނީ ކުރީގެ ކޮމިޝަނަރ އޮފް ޕޮލިސް ހުސެއިން ވަހީދެވެ.
