ސުޕަރ ސްޓަރ އާމިރް ޚާންގެ ދަރިފުޅު ޖާނަލިސްޓެއްގެ ރޯލުން ބޮލީވުޑަށް ނުކުންނަށް ތައްޔާރުވެއްޖެ އެވެ.
ޖުނައިދު ޚާން ފިލްމް އިންޑަސްޓްރީއަށް ނުކުތުމާއެކު އިންޑަސްޓްރީއަށް އަނެއްކާވެސް އާ ސްޓާ ކިޑެއް ލިބުނީއެވެ.
ރިޕޯޓުތައް ބުނާގޮތުގައި ޖުނައިދު ފެނިގެންދާނީ ޔަޝްރާޖް ފިލްމްސް އިން މިހާރު ގެނެސްދިނުމަށް ތައްޔާރުވަމުންދާ، 1862ވަނަ އަހަރުގެ މަޝްހޫރު މަހާރާޖް ލައިބެލް ކޭސްގެ މައްޗަށް ބިނާކޮށް އުފައްދާ ފިލްމުން ނެވެ.
މި ފިލްމުގެ މަސައްކަތް ފަށަން ޑައިރެކްޓަރ ސިދްހާތު މަލްހޯތުރާ ނިންމާފައިވަނީ 2021 ވަނަ އަހަރުގެ ކުރީކޮޅުގައެވެ. ނަމަވެސް މާކުރީ ޒަމާނެއް ދައްކައިދޭން ޖެހޭތީ މި ފިލްމަށް ބޭނުންވާ ބޮޑު ސެޓްގެ މަސައްކަތްތައް 2 ދުވަހެއްގެ ތެރޭ ފެށޭނެ ކަމަށް ޕްރޮޑަކްޝަން ޓީމުން ބުނެއެވެ.
އިނގިރޭސީން ގެ އަޅުވެތިކަމުގައި އިންޑިއާ އޮތް ދުވަސްވަރު ހިނގާފައިވާ މި ހާދިސާއަކީ އެގައުމުގެ ދީނީ ލީޑަރަކު ފައްޅިތަކުގައި އަންހެނުންނާއެކު ޖިންސީ ގުޅުންތައް ހިންގާކަމަށް ނޫސްވެރިއަކު ލިއުނު ރިޕޯޓަކާގުޅިގެން ހިނގި މައްސަލައެކެވެ. ޖުނައިދު ޚާން ފެނިގެންދާނީ އެމައްސަލަ ބިނާވެފައިވާ ނޫސްވެރިއާ ކަރްސަންދާސް މުލްޖީގެ ރޯލުން ކަމަށް މީޑިއާ ރިޕޯޓްތައް ބުނެއެވެ.
މީގެ ކުރިން ކަރަން ޖޯހަރުގެ ޝޯވ އެއްގައި ވާހަކަ ދައްކަމުން އާމިރް ޚާން ބުނީ ޖުނެއިދު ފިލްމު ކުޅެން ބޭނުންވާހެން ހީވާކަމަށާއި އޭނާ އެކްޓްކުރުމާއި ފިލްމު އުފައްދައި ޑައިރެކްޓް ކުރަންވެސް ބޭނުންވާކަމަށެވެ. ނަމަވެސް އެކްޓްކުރުން ޚިޔާރުކުރުމުން އެއީ އުނދަގޫ ދާއިރާއެއްކަމަށާއި ވަރަށް ގިނަ މީހުންނާ އަޅާ ކިޔާނެ ކަމަށް ބުނެދިނިން ކަމަށްވެސް އާމިރު ބުންޏެވެ.
ޖުނައިދަކީ އެކްޓިންގގެ ދާއިރާއިން ކިޔަވައި، ސްޓޭޖް ޑްރާމާ ތަކުގައިވެސް އެކްޓްކޮށްފައިވާ ތަރިއެކެވެ.
އާމިރް ހާންގެ މަސައްކަތަށް ބާލާއިރުގައި ދެން އޭނާ އެންމެ އަވަހަށް ފެންނާނީ އަންނަ އަހަރުގެ ޑިސެމްބަރު 24ގައި ނެރެން ހަމަޖެހިފައިވާ ފިލްމު " ލާލް ސިންގް ޗައްޑާ" އިންނެވެ.
