ދައުލަތުގެ އެންމެ ބޮޑެތި އެސްއޯއީތަކުގެ ތެރޭގައި ހިމެނޭ، ފެނަކަ ކޯޕަރޭޝަންއާއި، އެމްޑަބްލިއުއެސްސީއާއި، އައިލޭންޑް އޭވިއޭޝަން، އެމްއޭސީއެލްއަށް އަދި އެމްޓީސީސީއަށް ޕީސީބީން އެންމެ އިސްވެރީން އައްޔަންކޮށްފިއެވެ.
މި ކުންފުނިތަކަށް ވެރީން އައްޔަން ކޮށްފައި މިވަނީ އިއްޔެރިން ފެށިގެން ޕީސީބީ ދައުލަތުގެ ގިނަ ކުންފުނިތަކަށް އެމްޑީން އައްޔަން ކުރަން ފަށާފައި ވަނިކޮށެވެ.
މިގޮތުން އެމްޑީން މި 5 ކުންޏަށް އެމްޑީންގެ ގޮތުގައި އައްޔަން ކޮށްފައިވާ ބޭފުޅުން ތިރީގައި މިވަނީއެވެ.
- މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް): އިބްރާހިމް ޝަރީފު މުހައްމަދު
- އެމްޑަބްލިއުއެސްސީ: އަބްދުލްމަތީން މުހައްމަދު
- ފެނަކަ ކޯޕަރޭޝަން: ރައްޔިތުންގެ މަޖިލީހުގެ މަޑަވެލި ދާއިރާގެ ކުރީގެ މެންބަރު މުއާޒު މުހައްމަދު ރަޝީދު
- އައިލެންޑް އޭވިއޭޝަން: އިބްރާހިމް އިޔާސް
- މޯލްޑިވްސް ޕޯޓްސް ލިމިޓެޑް (އެމްޕީއެލް): އިސްމާއިލް ވަޖީހް
- އެމްޓީސީސީ: އަބްދުﷲ ޒިޔާދު
އިބްރާހިމް ޝަރީފު މުހައްމަދު
މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ މެނޭޖިން ޑިރެކްޓަރުގެ މަގާމަށް އައްޔަންކުރި އުބުރާހިމް ޝަރީފް ވަނީ އެކި ސަރުކާރުތަކުގައި އިސް މަގާމުތަކެއް ފުރުއްވާފައެވެ.
ޝަރީފް އެންމެ ފަހުން ހުންނެވީ އޮސްޓްރޭލިއާގައި ހުންނަވާ ރާއްޖޭގެ ޓްރޭޑް ރެޕްރެޒެންޓޭޓިވްގެ މަގާމުގައެވެ. އޭގެކުރިން އޭނާ ވަނީ ކޮމިޝަނަ ޖެނެރަލް އޮފް ކަސްޓަމްސް ކަމާއި ޓްރާންސްޕޯޓް އޮތޯރިޓީގެ ޗެއާމަންކަން ކުރައްވައިފައެވެ.
އޮސްޓްރޭލިއާގައި ކޮމާސްގެ ދާއިރާ އިން މާސްޓާސް ހައްދަވާފައިވާ ޝަރީފް ވަނީ ގިނަ ދުވަސްތަކެއް ވަންދެން ކަސްޓަމަށް ހިދުމަތް ކުރައްވައިފައެވެ. އޭނާ އެ މަގާމަށް އައްޔަން ކުރުމާ ގުޅިގެން އެމްއޭސީއެލް އިން ވަނީ މަރުހަބާ ކިޔައިފައެވެ.
ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި އެންމެ ފަހުން އެމްއޭސީއެލްގެ މެނޭޖިން ޑިރެކްޓަރުކަން ކުރެއްވީ މަހުޖޫބު ޝުޖާއުއެވެ.
އަބްދުލްމަތީން މުހައްމަދު
ޕީޕީއެމް/ޕީއެންސީގެ ހަރަކާތްތަކުގައި އިސްކޮށް އުޅުއްވާ އަދި ނިމިގެންދިޔަ ރިޔާސީ އިންތިހާބުގައި ރައީސް ޑރ. މުހައްމަދު މުއިއްޒުގެ ކެމްޕެއިންގައި ވަރަށް ބޮޑަށް މަސައްކަތް ކުރެއްވި މަތީން ސްޓޭޓް މިނިސްޓަރު ކަން ކުރެއްވީ ކުރީގެ ރައީސް އަބްދުﷲ ޔާމީންގެ ވެރިކަމުގައެވެ. އެގޮތުން މިނިސްޓްރީގައި އޭނާ ވަނީ ހަތް އަހަރު ދުވަހު މަސައްކަތް ކުރައްވައިފައެވެ. މަތީން ވަނީ ބިލްޑިން ސާވިސަސް އިންޖިނިއަރިން ދާއިރާ އިން މާސްޓާސް ހާސިލް ކުރައްވައިފައެވެ.
ރައްޔިތުންގެ މަޖިލިހުގެ އުނގޫފާރު ދާއިރާގެ މެމްބަރު ކަމަށް ވެސް ވާދަކުރެއްވެވި މަތީން މީގެކުރިން ވަނީ ޕީޕީއެމްގެ ސެކްރެޓަރީ ޖެނެރަލްކަން ވެސް ކުރައްވައިފައެވެ. އޭނާއަކީ ގައުމީ ޕާޓީގެ ނައިބް ރައީސްގެ މަގާމްވެސް އަދާކުރެއްވި ބޭފުޅެކެވެ.
މަތީންއަކީ އިލެޓްރިކަލް އިންޖީނިއަރިންގ ދާއިރާގެ ތަޖުރިބާކާރެކެވެ. އެގޮތުން އެންމެ ފުރަތަމަ ސްޓެލްކޯގައި މަސައްކަތް ކުރައްވަން ފެއްޓެވުމަށްފަހު، ޔޫޓިލިޓީ ކުންފުނިތަކުގައިވެސް މަތީން މަސައްކަތް ކުރެއްވިއެވެ.
މަތީން އަކީ ރާއްޖޭގެ އިޔާދަކުރަނިވި ހަކަތައިގެ ދާއިރާ ތަރައްގީ ކުރެއްވުމުގައި އިސްކޮށް މަސައްކަތް ކުރެއްވި ބޭފުޅެކެވެ.
މުއާޒު މުހައްމަދު ރަޝީދު
ޕީޕީއެމް/ޕީއެންސީގެ ހަރަކާތްތަކުގައި ހާއްސަކޮށް ނިމިގެންދިޔަ ރިޔާސީ އިންތިހާބުގައި ރައީސް ޑރ. މުހައްމަދު މުއިއްޒަށް ކެމްޕެއިން ކުރެއްވުމުގައި އިސް ދައުރެއް އަދާކުރެއްވި މުއާޒް މަތީ ތައުލީމު ހާސިލު ކުރެއްވީ އާކިޓެކްޗާގެ ދާއިރާއިންނެވެ. ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓްރީގެ ޕްރޮޖެކްޓް އޮފިސަރެއްގެ މަގާމު ވެސް އަދާކުރެއްވި މުއާޒް ވަނީ އަމިއްލަ ވިޔަފާރީގައި ވަރަށް ގިނަ ދުވަހު މަސައްކަތް ކުރައްވައިފައެވެ.
ރައީސް މުއިއްޒުގެ އެސިސްޓެންޓް ކެމްޕެއިން މެނޭޖަރުކަން ކުރެއްވި މުއާޒް ވަނީ ކެމްޕެއިން ތެރޭގައި ވަރަށް ގިނަ ނޫސްވެރިންގެ ބައްދަލުވުންތަކުގައި ބައިވެރިވެވަޑައިގެން މުއިއްޒަށް ކުރެވިފައިވާ އެކިއެކި ތުހުމަތުތަކަށް ރައްދު ދެއްވައި ކުރީގެ ސަރުކާރަށް ވަރަށް ބޮޑަށް ފާޑު ވިދާޅުވެފައެވެ.
ފެނަކައިގެ މެނޭޖިން ޑިރެކްޓަރުގެ މަގާމުގައި ކުރިން ހުންނެވީ އަހުމަދު ސައީދެވެ.
އިބްރާހިމް އިޔާސް
ގައުމީ އެއާލައިން، މޯލްޑިވިއަން ހިންގަމުން އަންނަ އައިލެންޑް އޭވިއޭޝަންގެ މެނޭޖިން ޑިރެކްޓަރަކަށް އިޔާސް ހަމަޖެއްސި އިރު، އޭނާ މީގެކުރިން ހުންނެވީ އައިލެންޑް އޭވިއޭޝަންގެ ޗީފް އޮޕަރޭޓިން އޮފިސަރުގެ މަގާމުގައެވެ. އިޔާސް އައިލެންޑް އޭވިއޭޝަންގައި މަސައްކަތްކުރައްވާތާ 15 އަހަރު ވަނީ ވެފައެވެ.
އިޔާސް އައިލެންޑް އޭވިއޭޝަނާ އެންމެ ފުރަތަމަ ގުޅިވަޑައިގަތީ 2008 ގައި ސޭފްޓީ އެންޑް ކޮލިޓީ މެނޭޖަރެއްގެ ގޮތުގައެވެ. އޭގެ ފަހުން، އެ ކުންފުނީގެ އިންޖިނިއަރިން ޑިޕާޓްމަންޓްގެ ވެރިއަކަށް ހުންނެވި އިޔާސްއަކީ އިނގިރޭސިިވިލާތުގެ ޔުނިވަސިޓީ އޮފް ލަންޑަންގެ އިމްޕީރިއަލް ކޮލެޖުން އޭރޯނޯޓިކަލް އިންޖިނިއަރިން އިން މާސްޓާސް ހާސިލުކުރެއްވި ބޭފުޅެކެވެ.
އިޔާސް ވަނީ މޯލްޑިވްސް ސިވިލް އޭވިއޭޝަން އޮތޯރިޓީގައި ވެސް މަސައްކަތް ކުރައްވައިފައެވެ.
ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި އެންމެ ފަހުން އައިލެންޑް އޭވިއޭޝަންގެ މެނޭޖިން ޑިރެކްޓަރަކަށް ހުންނެވީ މުހައްމަދު މިހާދެވެ.
އިސްމާއިލް ވަޖީހް
އިނގިރޭސިިވިލާތުގެ އެންގްލިއާ ރަސްކިން ޔުނިވާސިޓީން އެމްބީއޭ ހާސިލް ކުރައްވާފައިވާ ވަޖީހު ވަނީ އެމްޕީއެލްގައި 9 އަހަރަށް ވުރެ ގިނަ ދުވަހު ހިދުމަތް ކުރައްވައިފައެވެ. އޭނާ ވަނީ އެ ކުންފުނީގެ އެސިސްޓެންޓް ޖެނެރަލް މެނޭޖަރު ކަމާއި ޖެނެރަލް މެނޭޖަރު ކަމާއި އެސިސްޓެންޓް ސީއީއޯކަން ވެސް ކުރައްވައިފައެވެ.
އެޑިއުކޭޝަން މިނިސްޓްރީގެ ފައިނޭންސް ޑިޕާޓްމެންޓްގައި މަސައްކަތް ކުރެއްވި ވަޖީހް މީގެކުރިން ބައެއް ބައެއް ސްކޫލްތަކުގައި ޕްރިންސިޕަލްކަން ކުރެއްވެވިއެވެ.
އަބްދުﷲ ޒިޔާދު
ޒިޔާދު ވަނީ ކުރިން ހައުސިން ޓްރާންސްޕޯޓް އެންޑް އެންވަޔަރުމެންޓް މިނިސްޓްރީގެ ސީނިއާ އިންޖިނިއަރުކަމާއި ހައުސިން އެންޑް އިންފްރާސްޓްރަކްޗަ މިނިސްޓްރީ އާއި އެންވަޔަރުމެންޓް އެނާޖީ މިނިސްޓްރީގެ ސްޓޭޓް މިނިސްޓަރުކަން ކުރައްވައިފަ އެވެ.
އޭނާ މަތީ ތައުލީމަށް ކިޔަވައި ވިދާޅުވީ، އިންޖިނިއަރިން މެނޭޖްމަންޓުގެ ދާއިރާއިންނެވެ. ރާއްޖެ އާއި ރާއްޖެ އިން ބޭރުގެ އެކި ކުންފުނިތަކުގައި ވެސް ކުރިން މަސައްކަތް ކުރެއްވި ޒިޔާދު ކިޔަވައި ވިދާޅުވީ ބަހުރެއިން ޔުނިވާސިޓީންނެވެ.
އެމްޓީސީސީގެ ސީއީއޯ އަދި އެމްޑީކަން އެންމެ ފަހުން ކުރެއްވީ އާދަމް އާޒިމެވެ. އޭގެ ކުރިން މި ސަރުކާރުގައި ދެން އެ ދެ ދެ މަގާމު ފުރުއްވީ ހަސަން ޝާހެވެ.
