ހުޅުމާލެ ސެންޓްރަލް ޕާކު ކައިރީގައި މިދިޔަ ހަފްތާގެ ހޯމަ ދުވަހު ކާރެއް ކޮންޓްރޯލް ނުވެ ގޮސް ތިން ސައިކަލެއްގައި ޖެހި ހިނގި ނުރައްކާތެރި އެކްސިޑެންޓުގައި އަނިޔާވި މީހާ ނިޔާވެއްޖެއެވެ.
ހުޅުމާލެ އެ ނުރައްކާތެރި އެކްސިޑެންޓުގައި ކާރު ދުއްވަން އިން މީހާ ފަހުން ވަނީ ހައްޔަރުވެސް ކޮށްފައެވެ.
ފުލުހުން ބުނެފައިވަނީ އެ މައްސަލައިގައި ހައްޔަރު ކުރީ 30 އަހަރުގެ ދިވެހި ފިރިހެނެއް ކަމަށެވެ. އަދި އެމީހާގެ ބަންދާ މެދުގައި ގޮތެއް ނިންމުމަށް މިމަހުގެ 22 ވަނަ ދުވަހު ކޯޓަށް ހާޒިރު ކުރުމުން އެމީހާގެ ބަންދަށް ހަތް ދުވަހުގެ މުއްދަތެއް ދީފައިވާ ކަމަށް ވެސް ފުލުހުން ބުނެފައި ވެއެވެ.
އެމީހާގެ ބަންދުގެ މުއްދަތު ޖެހީ ހުޅުމާލެ މެޖިސްޓްރޭޓް ކޯޓުގައެވެ.
މި އެކްސިޑެންޓުގައި ޖުމްލަ ހަތަރު މީހަކަށް އަނިޔާވިއެވެ. އެއީ ދެ އަންހެނުންނާއި ދެ ފިރިހެނުންނަށެވެ.
އެކްސިޑެންޓުގައި އަނިޔާވި ދެ މީހަކަށް އޭޑީކޭ ހޮސްޕިޓަލްގައި ފަރުވާދީފައިވާއިރު،، އެތަނުން އެކަކަށް ފަރުވާދެމުން އައިސްފައިވަނީ އައިސީޔޫގަ އެވެ. ދެވަނަ މީހާ އަށް ފަރުވާދީފައިވަނީ އެޗްޑީޔޫގައެވެ.
މައުލޫމާތު ލިބިފައިވާ ގޮތުގައި ނިޔާވެފައިވަނީ އެންމެ ފުރަތަމަ އެޗްޑީޔޫގައި ފަރުވާ ދެމުންއައި، އުމުރުން 59 އަހަރުގެ ފިރިހެން މީހާއެވެ. އޭނާގެ ހާލު ފަހުން ސީރިއަސްވެގެން އޭނާ އައިސީޔޫއަށް ބަދަލު ކުރިއެވެ. އެ މީހާ ނިޔާވެފައި ވަނީ އައިސީޔޫގައި ފަރުވާދެމުން ދަނިކޮށް ރޭ ދަންވަރު 2:50 ހާއިރު އެވެ.
