ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވައުދާއި އެއްގޮތަށް އިސްލާމީ ނަޒަރަކުން ތިމާވެއްޓާ ބެހޭ ދިރާސާއެއް ހަދަން މަޝްވަރާ ކުރައްވައިފިއެވެ.
ރައީސުލްޖުމްހޫރިއްޔާ މިދޔަ ހުކުރު ދުވަހު ވެރިކަމާއި ހަވާލުވެ ވަޑައިގެންނެވުމަށްފަހު ދެއްވި ފުރަތަމަ ޚިތޯބުގައި ވަނީ ރާއްޖޭގެ އިލްމުވެރިންނަށް އޮތް ނޫފޫޒުން ސަލާމަތްކޮށް، ޢިލްމުވެރިންނާއި ދުލާއި ގަލަމުގެ މިނިވަންކަން ދެއްވާނެކަމަށް ވިދާޅުވެފައެވެ. އެގޮތުން އިލްމީ ދިރާސާތައް ހެދުމާއި، އެދިރާސާތައް ހާމަކޮށް، ޤައުމުގެ އެކި ކަންކަމުގައި އިލްމީ ދިރާސާތަކަށް ރިޢާޔަތް ކުރުމުގެ މުހިންމު ކަމަށް ރައީސް ވަނީ އަލި އަޅުވާލައްވާފައެވެ.
ރައީސްގެ ވައުދާއި އެއްގޮތަށް އިސްލާމިކް މިނިސްޓަރ ޑރ. މުހައްމަދު ޝަހީމް ޢަލީ ސައީދު ވަނީ އިއްޔެ ދިވެހި ރައްޖޭގެ އިސްލާމިކް ޔުނިވާސިޓީގެ އިސްވެރިންނާއި ބައްދަލު ކުރައްވައި އެއިދާރާއިން މިފަދަ މަސައްކަތް ކުރެވޭނެ ގޮތާއި، އަދި ކުރެވިދާނެ ގޮތްތަކާއި ގުޅޭގޮތުން މަޝްވަރާ ކުރައްވާފައެވެ.
ދިރާސާކުރުމަށް ރައީސް ގޮވާލައްވާފައިވާތީވެ، އައިޔޫއެމްގެ ރިސާރޗް ސެންޓަރުގައި، މިނިސްޓްރީ އިން ފަނޑުކޮށްގެން އިސްލާމީ ނަޒަރަކުން (ތިމާވެއްޓާ ބެހޭ ގޮތުން ރިސާޗެއް) ހެދުމާއި އައިޔޫއެމްގެ ތަރައްޤީއަށް މީހުން ބިނާކުރުމަށް ޕީއެޗްޑީ ޕްރޮގްރާމަށް ފަންޑުކޮށްދިނުމާއި އައިޔޫއެމްގެ އާއިމާރާތުގެ ތަޞައްވުރާމެދު މިއަދުވަނީ މަޝްވަރާކޮށްފަ.
– ޑރ. ޝަހީމް ވިދާޅުވިއެވެ.
ހުކުރު ދުވަހު ތަގުރީރުގައި ރައީސް ވަނީ ކޮންމެ ޤައުމެއްގައިވެސް ޢިލްމުވެރީންނަކީ، އެ ޤައުމެއްގެ އިންސާނީ ކިއްލާގެ އެންމެ އުސް ކުރިބޯށިތައް ކަމަށް ވިދާޅުވެފައެވެ. ރާއްޖޭގައިވެސް ތަފާތު ގިނަ ދާއިރާތަކުގެ ޢިލްމުވެރީން އެބަ ތިއްބެވިކަން ފަހަގަކޮށް ރައީސް އެފަދަ ދާއިރާތައްވެސް ފާހަގަ ކުރައްވާފައެވެ.
އެގޮތުން ދީނީ ރޮނގުންނާއި، ބަހުގެ ރޮނގުނާއި، ބޭސްވެރިކަމުގެ ރޮނގުންނާއި، އިމާރާތްކުރުމާއި، ވިޔަފާރިއާއި، ފަތުރުވެރިކަމާއި، ޓެކްނޯލޮޖީއާއި، ސައިންސްގެ އެކި ދާއިރާތަކުންނާއި، ވަކިން ޚާއްޞަކޮށް، އުނގަންނައި ދިނުމުގެ އެކި ދަރަޖަތަކުން ޚާއްސަ އިސްކަމެއް ދެއްވާނެކަމަށް ރައީސް ވަނީ ވިދާޅުވެފައެވެ. ރައީސް ވަނީ އެމަނިކުފާނުގެ ވެރިކަމުގައި ކޮންމެ ދާއިރާއެއްގައިވެސް ޢިލްމާއި ޢިލްމުވެރީންގެ އަގުވަޒަންކުރާނެކަމުގެ ޔަގީންކަން ދެއްވާފައެވެ.
