ފެނަކަ ކޯޕަރޭޝަންގެ މެނޭޖިން ޑިރެކްޓަރުގެ މަގާމުން އަހުމަދު ސައީދު އިސްތިއުފާ ދެއްވައިފިއެވެ.
ސައީދު ވަނީ ފެނަކައިގެ މެނޭޖިން ޑިރެކްޓަރުގެ މަގާމުން އިސްތިއުފާ ދެއްވަން ނިންމެވި ކަން ހާމަކުރައްވައި ޕްރައިވަޓައިޒޭޝަން ބޯޑަށް ސިޓީ ފޮނުއްވައިފައެވެ.
ފެނަކައިގެ މެނޭޖިން ޑިރެކްޓަރުގެ މަގާމަށް ސައީދު ހަމަޖައްސަވާފައި ވަނީ ޑިސެންބަރު 16، 2018 ގައެވެ.
ހުކުރު ދުވަހު ރިޔާސީ ދައުރު ހަމަވާތީ، މި ސަރުކާރުގެ އެކި ބޭފުޅުން ގެންދަވަނީ އިސްތިއުފާ ދެއްވަމުންނެވެ. އެގޮތުން ކޮމިޝަނާ އޮފް ޕްރިޒަންސްގެ މަގާމުގައި ހުންނެވި އަހުމަދު މުހައްމަދުފުޅު ވެސް ވަނީ އިސްތިއުފާ ދެއްވުމަށް ނިންމަވައިފައެވެ.
ސައީދު މަގާމުން އިސްތިއުފާ ދެއްވިއިރު، ފެނަކާއާ ގުޅޭ 75 މައްސަލައެއް އެންޓި ކޮރަޕްޝަން ކޮމިޝަން (އޭސީސީ) އިން އަންނަނީ ތަހުގީގު ކުރަމުންނެވެ.
ފެނަކައިގެ ދަރަނި މިދިޔަ އަހަރު ނިމުނު އިރު 4.1 ބިލިއަން ރުފިޔާއަށް އަރާފައިވާ ކަމަށާއި އޭގެ ތެރެއިން 900 މިލިއަނަށް ވުރެ ގިނަ ރުފިޔާއަކީ ދައްކަން ޖެހޭ ލޯންތައް ކަމުގައި އިންތިހާބީ ރައީސްގެ އޮފީހުން މީގެކުރިން ވަނީ ހާމަކޮށްފައެވެ.
