އެމްއެމްޕީއާރުސީ ހިޔާނާތުގެ މައްސަލައިގައި ޖަލަށްލާފައިވާ ކުރީގެ ނައިބު ރައީސް، އަހުމަދު އަދީބު އާއި އެމްއެމްޕީއާރުސީގެ ކުރީގެ މެނޭޖިން ޑިރެކްޓަރ، ޒިޔަތަށް މާފު ދެއްވައި މިނިވަން ކުރިކުރުން ބަލައި ނުގަންނާނެ ކަމުގައި އަދާލަތު ޕާޓީން ބުނެފިއެވެ.

އެމްއެމްޕީއާރުސީގެ ޚިޔާނާތުގެ ކުށް ސާބިތުވެ ހުކުމް ތަންފީޒު ކުރަމުންދާ އަދީބުއައި ޒިޔަތު ރައީސް ސާލިހު މާފް ދެއްވުމާއެކު އިއްޔެ އެ ދެބޭފުޅުންވެސް ވަނީ މިނިވަނ ވެފައެވެ.

އަދީބު މިނިވަންވެފައިވާކަން ހާމަކޮށް އަދީބު އުފައްދަވާފައިވާ އެމްޓީޑީންވެސް ވަނީ ބަޔާނެއް ނެރެފައެވެ. އެބަޔާނުގައި ވިދާޅުވެފައިވަނީ، ރައީސް ސާލިހު އަދީބުއަށް މާފް ދީފައިވާ ކަމަށާއި، އަދީބު މިނިވަންވެގެން ދިއުން ވެގެންދާނީ އެޕާޓީ އިތުރަށް ހަރުދަނާކޮށް  އަދި އެއްބައިވަންތަ ކުރުވަން ލިބިގެންދިޔަ ފުރުސަތަކަށް ކަމުގައެވެ.

އެމްއެމްޕީއާރުސީ ހިޔާނާތުގެ މައްސަލައިގައި ދިގު މުއްދަތަކަށް ހުކުމް ކޮށްފައިވާ އަދީބު އާއި ޒިޔަތު މިނިވަންވެފައިވަނީ އަދަބު ލުއިކޮށްދިނުމާއި މައާފުދިނުމުގެ ޤާނޫނުގެ ދަށުން ރައީސް އިބްރާހިމް މުހައްމަދު ސޯލިހަށް ލިބިވަޑައިގަންނަވާ ބާރުގެ ތެރެއިން މައާފުދެއްވައި ގުޅިގެންނެވެ.

އަދީބުއާއި ޒިޔަތު ރައީސް މާފް ދެއްުވުމާއި ގުޅިގެން އަދާލަތު ޕާޓީން ކުރި ޓުވީޓުގައި ބުނެފައިވަނީ ދައުލަތުގެ މުދަލަށް ބޮޑެތި ޚިޔާނާތް ވީކަމަށް އަމިއްލައަށް އިޢުތިރާފްވެ އެކަމުގެ ކުށް ސާބިތުވެފައިވާ ފަރާތްތަކަށް ޙައްޤު އަދަބު ނުލިބި ދިޔުމަކީ އެ ޕާޓީއިން ބަލައިގަންނަ ކަމެއް ނޫން ކަމުގައެވެ.

އެމްއެމްޕީއާރުސީގެ ބޮޑު ހިޔާނާތާ ގުޅިގެން، އަދީބުގެ މައްޗަށް އިއްވީ 20 އަހަރުގެ ޖަލު ހުކުމެކެވެ. އަދި އެހުމުން އިއްވުމުގެ ކުރިން ދައުލަތާ އެކީގައި އަދީބު އިއުތިރާފް އެއްބަސްވުމެއް ހެދިއެވެ. ދިގުމުއްދަތެއްގެ ޖަލު ހުކުމެއް ކޯޓުން އަދީބުގެ މައްޗަށް އިއްވި ނަމަވެސް ރައީސް ސާލިހުގެ ވެރިކަމުގެ ބޮޑު ބައިގައި އަދީބު ހުންނެވީ ގޭ ބަންދުގައެވެ. އަދި އެކި ފަހަރުމަތިން އޭނާވަނީ ސިއްޙީ ފަރުވާއަށް ރާޖެއިން ބޭރަށްވެސް ވަޑައިގެފައެވެ.

އަދީބުއާއި ޒިޔަތު މިނިވަންކުރުން ބަލައި ނުގަންނާނެކަމަށް އަދާލަތު ޕާޓީން ބުނެފައިވާއިރު، އެޕާޓީއަކީ ފާއިތުވި ރިޔާސީ އިންތިޚާބުގައި ރައީސް ސާލިހާއެކު ކޯލިޝަން ހެދި ޕާޓީއެކެވެ.