އައިޖީއެމްއެޗްގައި މަސައްކަތްކުރި ފިލިޕީންގެ ނަރުސް މޭރީ ގްރޭސްގެ މަރުގެ މައްސަލާގައި ދައުވާ ލިބޭ ހަލީމަތު ލަމްހާގެ ފައިގައި ޓެގް އެޅުވުމަށްފަހު އޭނާ ބަންދުން ދޫކޮށްދޭން ކޯޓުގައި އެދިއްޖެއެވެ.

މޭރީ މަރާލާފައި ވަނީ 2021 ވަނަ އަަހަރުގެ އޮކްޓޯބަރު މަހުގެ 19ވަނަ ދުވަހުއެވެ. މި މައްސަލާގައި ލަމްހާގެ މައްޗަށް ދައުވާ ކުރަނީ އައިޖީއެމްއެޗްގައި މަސައްކަތް ކުރަމުންދިޔަ އޭނާ ފިރިމީހާ މާވިންއާ ގުޅިގެން މޭރީ މަރާލުމުގައި ބައިވެރިވި ކަމުގެ ތުހުމަތެވެ. އަދި އިންޖެކްޝަންތަކެއް ގެންގުޅުނު ކަމަށް ބުނެ އިތުރު ދެ ދައުވާއެއް ވެސް އޭނާގެ މައްޗަށް ކުރެއެވެ.

މި މައްސަލާގައި ދެމީހުންވެސް ތިބީ ޝަރީޢަތް ނިމެންދެން ބަންދުގައެވެ.

ލަމްހާގެ ފަރާތުން ވަނީ ބަންދު މުރާޖައާ ކޮށްދިނުމަށް ހުށައަޅާފައެވެ. މީގެ ކުރިން ވެސް ޝަރުތުތަކެއް ކުރުމަށް ފަހު ލަމްހާ ދޫކޮށްލަން އެދުމުން، ޝަރީއަތުން ނިންމާފައިވަނީ ލަމްހާގެ ބަންދު ދެމެހެއްޓުމަށެވެ.

ފަސް މަސް ދުވަސް ފަހުން ބަންދު މުރާޖައާ ކުރުމަށް ހުށަހަޅާފައި އޮތުމުން، އެ ކަމާ ގުޅޭ ގޮތުން ވާހަކަ ދައްކަން ދިން ފުރުސަތުގައި ލަމްހާގެ ވަކީލު އަހުމަދު ޔާމީން ވަނީ ޓެގު އެޅުމަށް ފަހު އޭނާ ދޫކޮށްލުމަށް އެދިފައެވެ. ވަކީލް ވިދާޅުވީ، މުޖްތަމައުއަށް ނުރައްކާ ކުޑަވާނެ ގޮތަށް ލަމްހާ ބަންދުން ދޫކުރެވިދާނެކަމަށެވެ.

ނަމަވެސް ދައުލަތުން އެކަމާ ދެކޮޅެވެ. ދައުލަތުން ވިދާޅުވީ، ޓެގް އެޅުވުމަށްފަހު ބަންދުން ދޫކުރުމަކީ ޖިނާއީ އިޖްރައާތުގެ ގާނޫނު ދަންނަ ކަމެއްނޫންކަމަށެވެ.

އޭގެ ރައްދުގައި ލަމްހާގެ ވަކީލް ވިދާޅުވީ، ނާއީ އިޖްރައާތުގެ ގާނޫނުގައި ބުނާގޮތަށް ކޮންމެ 30 ދުވަހަކުން އެއް ފަހަރު ބަންދު މުރާޖާ ކޮށްފައިނުވާކަމަށެވެ. މީގެ ކުރިން އެގޮތަށް އަމަލު ނުކޮށްފައިވަނީ ޤާނޫނާ ޚިލާފަށްކަމަށް ލަމްހާގެ ވަކީލް ވިދާޅުވިއެވެ.

ލަމްހާއަކީ މީގެ ކުރިން ކުށގެ ރެކޯޑް އޮތް މީހެއް ނޫންކަމަށާއި، ނަމަވެސް މީހަކު މަރާލުމުގައި ބައިވެރިވުމުގެ ތުހުމަތު އޮތް މީހަކަށް ވާތީވެ، މުޖުތަމައަށް ނުރައްކާ އޮތް ކަމަށް ބެލެވޭނަމަ، ޓެގު އަޅުވާފައި އޭނާ ހުންނަ ތަން ބެލޭނެ ގޮތަށް ދޫކޮށްލެވެންވާނެކަމަށް އޭނާ ވިދާޅުވިއެވެ.

މިކަންކަމަށްފަހު މައްސަލަ ބައްލަވާ ގާޒީ ހުސައިން ފާއިޒް ރަޝާދު ވިދާޅުވީ ބަންދަށް ލުޔެއް ދިނުމާ މެދު ދެން އޮންނަ އަޑުއެހުމެއްގައި ގޮތެއް ނިންމަވާނެކަމަށެވެ.

މިއަދުގެ ޝަރީޢަތުގައި ވަނީ ތިން މީހެއްގެ ހެކިބަސް ނަގާފައެވެ. އެއީ އައިޖީއެމްއެޗްގެ ނަރުހެއްގެ ހެކިބަހާއި ދެ ފުލުހުންގެ ހެކިބަހެވެ.