ފާއިތުވި އޮކްޓޯބަރުމަހުގެ 7 ވަނަ ދުވަހުން ފެށިގެން އިސްރާއީލުން ފަލަސްތީނުގެ ޣައްޒާއަށް ދެމުންދާ އަނިޔާވެރި ހަމަލާތަކުގައި މިއަދު އެއްމަސް ފުރިގެންދާއިރު، މި ހަނގުރާމާގައި ޝަހީދުވި ފަލަސްތީނުގެ ކުޑަކުދިންގެ އަދަދު ރައްޔިތުންގެ އަދަދު 4،000 އިން މައްޗަށް އަރައިފިއެވެ.
މިގޮތުން ފަލަސްތީނުގެ ރަސްމީ ފަރާތްތަކުން ހާމަކޮށްފައިވާ ގޮތުގައި، މިހާރު ކުރިޔަށްދާ ހަނގުރާމާގައި ޝަހީދުވި ފަލަސްތީނު މީހުންގެ އަދަދު މިހާރުވަނީ 10,328 އަށް އަރާފައެވެ. މީގެ ތެރެއިން 4,237 ކުޑަކުދިން ހިމެނޭކަމަށްވެސް ބުނެފައި ވެއެވެ.
ހަނގުރާމާގައި އިސްރާއީލުން މަވެފައިވަނީ 1،400 މީހުންނެވެ. އޭގެ އިތުރަށް ފަލަސްތީނުގެ ހަމާސް ޖަމާއަތުން ވަނީ 200 އަށްވުރެ ގިނަ މީހުން ރަހީނު ކޮށްފައެވެ. ހަމާސް ޖަމާއަތުން ބުނެފައިވަނީ ރަހީނު ކޮށްފައިވާ 12 މީހަކު ދޫކޮށްލުމަށް އެޖަމާއަތުން އޮތީ ތައްޔާރަށް ކަމަށާއި، އެހެންނަމަވެސް އެމީހުން ދޫކޮށްލުމަށް އެޅިފައިވާ ހުރަހަކީ އިސްރާއީލުން ޣައްޒާއަށް މެދުނުކެނޑި ދެމުންދާ ހަމަލާތައް ކަމުގައެވެ.
އިސްރާއީލުން ފަލަސްތީނަށް ދެމުންދާ ހަމަލާތަކަށް 1 މަސް ފުރިގެންދިޔައިރު، ދުނިޔޭގެ ގިނަ ގައުމުތަކުން ބުނަމުންދަނީ ޣައްޒާގައި އިސްރާއީލުން ހިންގަމުންދަނީ ބޮޑު ގަތުލުޢާންމެއް ކަމުގައެވެ. އަދި ދުނިޔޭގެ ބައެއް ގައުމުތަކުން ވަނީ މި ގަތުލުއާންމު ކުށްވެރިކޮށް، އިސްރާއީއެކީ ދަމަހައްޓަމުންދާ ސިޔާސީ ގުޅުންވެސް ކަނޑާލާފައެވެ.
މިގޮތުން އިސްރާއީލުގައިވާ އެގައުމުތަކުގެ ސަފީރުން އަނބުރާ ގެންގޮސްފައިވާ ގައުމުތަކުގެ ތެރޭގައި ބަހުރެއިން، ޗާޑު، ޗިލީ، ކޮލޮމްބިއާ، ހޮންޑޫރާސް، އުރުދުން، ދެކުނު އެފްރިކާ އަދު ތުރުކީ ހިމެނެއެވެ.
އޭގެ އިތުރުން ޔޫއެންއާއި ދުނިޔޭ އިތުރު އެތައް ގައުމަކުން ދަނީ ޣައްޒާއަށް އިންސާނީ އެހީތެރިކަން ފޯރުކޮށްދިނުމަށް، އިސްރާއީލުން ދެމުންދާ ހަމަލާތައް ހުއްޓާލުމަށްވެސް ގޮވާލާފައެވެ. އެހެންނަމަވެސް އިސްރާއީލުންވަނީ ބޮމުގެ ހަމަލާތައް ހުއްޓާލުމަށް ދެކޮޅު ހަދާފައެވެ.
