ރިޔާސީ އިންތިޚާބުގެ ދެވަނަ ބުރު ކައިރިވެފައިވަނިކޮށް ބޮޑޫކުރި މަހުގެ އަގުން، މިފްކޯއަށް ދެކޮޅު ނުޖެހޭތީ ރިވިއުކުރަން ނިންމައިފިއެވެ. މިދިޔަ ސެޕްޓެމްބަރު މަހުގެ ތެރޭގައި މިފްކޯއިން ވަނީ 17 ރުފިޔާއަށް ގަންނަމުންދިޔަ މަސް ކިލޯއެއްގެ އަގު 25 ރުފިޔާއަށް ބޮޑުކޮށްފައެވެ.
މިފްކޯއިން ބުނީ، މަސްކިލޯއެއްގެ އަގު 17ރ އިން 25ރ އަށް ބޮޑު ކުރިފަހުން އެކުންފުނިން މަސްގަންނަމުން އަންނަނީ ކިލޯއެއް 25ރ އަށްކަމަށެވެ.
މިފްކޯގެ މެނޭޖިން ޑިރެކްޓަރު އިސްމާއިލް ފައުޒީ ވިދާޅުވީ، މަހުގެ އަގު ރިވިއު ކުރުމަށް ފިނޭންސް މިނިސްޓްރީއާއި ސަރުކާރުގެ އިދާރާތަކާއެކު މަޝްވަރާ ކުރަމުން އަންނަ ކަމަށާއި، މާކެޓުގެ އަގު ހުރި ގޮތުން މި ވަގުތު އަގު ހުންނަން ޖެހޭނީ 20ރ. އަށް ވުރެ ވެސް ދަށްކޮށް ކަމަށެވެ. އެހެންނޫންނަމަ ޚަރަދުތައް ހަމަޖައްސަން އުނދަގޫވާނެކަމަށް ފައުޒީ ވިދާޅުވިއެވެ.
ފައުޒީ ވިދާޅުވީ، ސަރުކާރުގެ އެހީއާއެކު ނޫންގޮތަކަށް ކުރިއަށް ދެވެން ނެތްކަމަށެވެ. މަސްވެރިންނަށް ބިލްތަކަށް ފައިސާދިނުން ލަސްވަނީވެސް އެހެންވެކަމަށްވެސް ފައުޒީ ވިދާޅުވިއެވެ.
މަސް ގަންނަ އަގު ބޮޑުކުރިއިރު، ޔޫރަޕަށް އެކްސްޕޯޓު ކުރާ މަހުގެ ޑިއުޓީ ކުޑަކުރުމަށް ވެސް ސަރުކާރުން އަންނަނީ މަސައްކަތް ކުރަމުންނެވެ. އެކަމުގެ މަޝްވަރާތައް ޕޮޒިޓިވްކޮށް ކުރިއަށް ދާ ކަމަށް ސަރުކާރުން މީގެ ކުރިން ބުންޏަސް، އޭގެ އެންމެ ފަހުގެ ތަފްސީލެއް ނުލިބެއެވެ.
ރާއްޖެއިން މިހާރު ޔޫރަޕަށް ފޮނުވާ މަހުގެ ޑިއުޓީގެ ގޮތުގައި 22 ޕަސެންޓް ނަގަ އެވެ. އެހެންވެ، ރާއްޖެއިން ޔޫރަޕް މާކެޓަށް ވިއްކާ މަހުގެ އަގު ވަރަށް ބޮޑަށް ވަނީ އުފުލިފައެވެ.
