ލޯކަލް ކައުންސިލްތަކުން ނިންމާ ނިންމުންތަކަކީ އެއްވެސް ރައްޔިތެއްގެ މަދަނީ ހައްގަކަށް އުނިކަން ނާންނާނޭހެން އަދި ހުރިހާ ރައްޔިތުންގެ ހައްގުތައްވެސް ކަށަވަރުވާނޭހެން ނިންމާ ނިންމުންތަކަކަށް ހެދުމަށް ލޯކަލް ގަވަރުމަންޓް އޮތޯރިޓީ (އެލްޖީއޭ) އިން އިލްތިމާސްކޮށްފި އެވެ.

އެލްޖީއޭއިން ކައުންސިލްތަކަށް މިގޮތަށް އަންގާފައި މިވަނީ ވ. ފެލިދޫ ކައުންސިލަށް ދައްކަންޖެހޭ ފައިސާ ނުދައްކާ ފަރާތްތަކަށް ކައުންސިލުން ޚިދުމަތް ފޯރުކޮށްދިނުން ހުއްޓާލުމަށް އެރަށުގެ ރަށު ކައުންސިލުން ނިންމާފައި ވަނިކޮށެވެ. ފުލިދޫ ކައުންސިލުން ޚިދުމަތް ދިނުން ހުއްޓާލުމަށް ނިންމާފައިވަނީ ކައުންސިލަށް ދައްކަންޖެހޭ ފައިސާނުދައްކާ މީހުންނާއި އެމީހުންގެ އަނބިން، ފިރިން އަދި ދަރިންނަށެވެ.

މިކަން ހާމަކޮށްފައިވަނީ މިމަހުގެ 1 ވަނަ ދުވަހު ފެލިދޫ ރަށުކައުންސިލުން ގެޒެޓް ކޮށްފައިވާ އިއުލާނެއްގައެވެ. މިއިއުލާނުގައި ބުނެފައިވަނީ ކައުންސިލުގެ އާންމު ޖަލްސާއެގައި މި ނިންމުން ނިންމާފައިވަނީ ކައުންސިލަށް ފައިސާ ދައްކަންޖެހިފައިވާ ފަރާތްތަކުން ދައްކަންޖެހޭ ފައިސާ ހޯދުމަށް ތަކުރާރުކޮށް މަސައްކަތްކޮށްގެންވެސް ފައިސާ ހޯދުމުގައި ކުރިއެރުމެއް ނުލިބިގެން ކަމުގައެވެ.

ފެލިދޫ ކައުންސިލުން ކޮށްފައިވާ އިއުލާނުގައިވަނީ އެކައުންސިލަށް ފައިސާ ދައްކަންޖެހޭ ފަރާތްތަކަށް 5 ދުވަހުގެ މުއްދަތެއްވެސް ދީފައެވެ. އަދި ބުނެފައިވަނީ މި މުއްދަތުގައި ފައިސާ ނުދައްކާ ފަރާތްތަކަށް ކައުންސިލުން ފޯރުކޮށްދޭންޖެހޭ ޚިދުމަތްތައް މެދުކަނޑާލާނޭ ކަމުގައެވެ.

އަދި އޭގެ އިތުރުން އެފަރާތްތަކުގެ ވަނަވަރު ހިމެނޭހެން އެފަރާތްތަކުގެ ލިސްޓު އާންމު ކުރުމަށްވެސް ހަމަޖެހިފައިވާ ކަމުގައިވެސް އިއުލާނުގައި ބުނެފައި ވެއެވެ.

ފެލިދޫ ކައުންސިލަށް ފައިސާ ނުލިބި ގިނަދުވަސް ވެފައިވަނީ ކައުންސިލުން ފޯރުކޮށްދޭ ބައެއް އަސާސީ ޚިދުމަތްތަކަށް ލިބެންޖެހޭ ފައިސާކަމަށް އެކައުންސިލުން ބުނެފައި ވެއެވެ.

މިމައްސަލައާއި ގުޅޭގޮތުން އެލްޖީއޭއިން ނެރުނު ބަޔާނުގައި ވިދާޅުވެފައިވަނީ، ރައްޔިތުން އެއަށް އަމަލުކުރުމަށް ކައުންސިލުން ނިންމާ ކޮންމެ ނިންމުމެއް ވާންވާނީ ގާނޫނަކުން ނުވަތަ ގަވާއިދަކުން އެއަށް ބާރު ލިބިގެން ނިންމޭ ނިންމުމަކަށް ކަމަށެވެ. ގާނޫނުއަސާސީގައި ކަށަވަރުކޮށްދީފައިވާ އަސާސީ ހައްގުތަކުގެ ތެރެެއިން ބައެއް ކަންކަން ހަމަޖައްސައިދެނީ ކައުންސިލްތައް މެދުވެރިކޮށް ކަމަށްވާއިރު ކައުންސިލަކުން ފޯރުކޮށްދޭ ހިދުމަތްތަކުން އެއްވެސް ރައްޔިތަކު މަހުރޫމު ކުރެވޭނީ ގާނޫނީއަސާސީއާއި ހިލާފުނުވާނޭހެން ފާސްކޮށްފައިވާ ގާނޫނަކުން ނުވަތަ ގަވާއިދަކުން އެކަންކުރުމުގެ ބާރު ލިބިގެން ކަމަށްވެސް ފާހަގަކޮށްފައިވެ އެވެ. ކައުންސިލާއި އަމިއްލަ ފަރުދަކާ މެދު ކުރެވޭ މަދަނީ މުއާމަލާތެއްގެ ތެރެއިން އެފަރާތުން ކައުންސިލަށް ދައްކަން ޖެހޭ ފައިސާ ނުދެއްކުމަކުން ގާނޫނަކުން ނުވަތަ ގަވާއިދަކުން ހުއްދަކުރާ ފިޔަވަޅެއް އެޅުން ފިޔަވައި އެއްވެސް ރައްޔިތަކާމެދު އިތުރު ފިޔަވަޅެއް އެޅުމަކީ ފަރުދީ ހައްގެއް ހިފެހެއްޓުން ކަމުގައި އެ އޮތޯރިޓީން ދެކޭ ކަމަށްވެސް ބަޔާނުގައިވެ އެވެ.

އެހެންކަމުން ލޯކަލް ކައުންސިލްތަކުން ނިންމާ ނިންމުންތައް ނިންމުގައި އެއްވެސް ރައްޔިތެއްގެ މަދަނީ ހައްގަކަށް އުނިކަން ނާންނާނޭހެން ހުރިހާ ރައްޔިތުންގެ ހައްގުތައް ކަށަވަރުވާނޭހެން ނިންމުންތައް ނިންމުމަށް ލޯކަލް ކައުންސިލްތަކަށް އިލްތިމާސްކުރަމެވެ. އަދި އެއްވެސް ރައްޔިތަކު އެމައްޗަށް އަމަލުކުރަން ލާޒިމުވާ ނިންމުމެއް ކައުންސިލަކުން ނިންމެވުމުގެ ކުރިން އެކަންކަމަށް ބޭނުންވާ މުނިސިޕަލް ގަވައިދުތައް ކައުންސިލްތަކުން ފާސްކޮށް ގެޒެޓްކުރުމަށް ދަންނަވަމެވެ،

ކައުންސިލްތަކުން ނިންމާ ނިންމުންތަކުގެ ސަބަބުން އެއްވެސް ރައްޔިތެއްގެ މަދަނީ ހައްގަކަށް އުނިކަން އައިސްގެން ނުވާނޭކަމަށާއި އަދި ރައްޔިތުންގެ ހައްގުތައް ކަށަވަރުވާނޭހެން ނިންމުންތައް ނިންމުމަށް ކައުންސިލްތަކަށް އިލްތިކާސް ކުރަމުން އެލްޖިއޭއިން ވިދާޅުވެފައި ވެއެވެ.

އެލްޖީއޭ އިން ބުނެފައިވަނީ ކައުންސިލަކާއެކު ވެވޭ މަދަނީ މުއާމަލާތެއްގެ ސަބަބުން އެފަރާތަކުން އަދާކުރަންޖެހޭ ކަމެއް ނުވަތަ ދައްކަން ޖެހޭ ފައިސާއެއް ނުދެއްކުމަކުން ވަކިފަރުދަކާމެދު ފިޔަވަޅެއް އަޅަން ވާނީ އެފަދަ މުއާމަލާތަކާ ގުޅިގެން ހެދިފައިވާ އެއްބަސްވުމެއްގައި ބަޔާންކުރާ ނުވަތަ ގާނޫނާއި ގަވާއިދުގައި ބަޔާންކުރާ ގޮތެއްގެ މަތިން ކަމަށެވެ. އެފަދަ މުއާމަލާތަކާ ގުޅިގެން އެ މުއާމަލާތުގައި ނުހިމެނޭ، އެކިއެކި ފަރުދުންގެ މަދަނީ ހައްގެއް ހިފެހެއްޓުމަކީ ކައުންސިލްތަކުން ކޮށްގެންވާނެ ކަމެއް ނޫން ކަމަށްވެސް އެލްޖީއޭއިން ވިދާޅުވެފައި ވެއެވެ.