ސުޕަރ ސްޓަރ ސަލްމާން ޚާންގެ ކުރިއަށްއޮތް ފިލްމު "އަންތިމް"ގައި އޭނާ ފެންނާނެގޮތް ފުރަތަމަ ފަހަރަށް ސަލްމާނެގެ ޅިޔަނު އަޔުޝް ޝަރްމާ ސޯޝަލް މީޑިއާގައި އާންމުކޮށްފިއެވެ.
އަޔުޝް އާއި ސަލްމާން މުހިންމު ރޯލުތަކުން ފެންނަ މި ފިލްމުގެ ޝޫޓިންގ ވަނީ ނޮވެމްބަރު 16 ގައި ޕޫނޭގައި ފަށާފައެވެ. އަދި ހަމަ މިމަހު 6 ގައި ސަލްމާންވެސް ހިމެނޭ ބައެއް މަންޒަރުތައް ކަރްޖަތުގައި ވެސް މިހާރު ވަނީ ނަގާފައެވެ. އަދި މިހާރު ޝޫޓިންގ ކުރިއަށްދަނީ ފިލްމް ސިޓީ މުމްބާއީގައެވެ.
ސަލްމާންގެ ޅިޔަނު އަޔުޝް އިންސަޓަގްރާމަށް ދޫކޮށްލި ވީޑިއޯއިން ފެނިގެންދަނީ ސަލްމާން ގަދަ ނޫކުލައިގެ ގަމީހެއްގައި އަޅިކުލައިގެ ފަޓުލޫނެއްލައިގެން ކަޅޫބޫޓަކަށް އަރައިގެން ބޮލުގައި ޓާބަންއެއް ބަނދެފައި ހުއްޓައެވެ. އަދި ހިނގަމުން މާރުކޭޓެއް ކަހަލަ ތަނަކާއި ދިމާއަށް ދާ މަންޒަރުވެސް ފެނެއެވެ. މި ވީޑިއޯ އާންމު ކުރުމާއެކު ސަލްމާންގެ ގިނަ ސަޕޯޓަރުން ވަނީ މި ވީޑިއޯ މުޅި ސޯޝަލްމީޑިއާގައި ވައިރަލް ކޮށްލާފައެވެ. އަދި ގިނަ ބައެއްގެ ތަރުހީބުވެސް ސަލްމާންގެ މި "ލުކަށް" ވަނީ ލިބިފައެވެ.
View this post on Instagram
މި ފިލްމުގައި ސަލްމާނާއި އޭނާގެ ޅިޔަނު އަޔުޝް ޝަރްމާގެ ވަރުގަދަ ކުރިމަތިލުންތަކެއްވެސް ފެންނާނެކަމަށް ބޮލީވުޑްގެ ޚަބަރުތައް ގެނެސްދޭ މީޑިއާތަކުން ރިޕޯޓުކުރެއެވެ. މަރާޓީ ފިލްމެއް ކަމަށްވާ "މުލްޝީ ޕެޓާން"ގެ ރިމޭކްގައި އަޔުޝް ފެނިގެންދާނީ ގޭންގްސްޓާރެއްގެ ގޮތުގައެވެ. އަދި ސަލްމާނަކީ ސިކް ފުލުހެކެވެ. މި ދެ ތަރިންގެ އިތުރުން ފިލްމު "އަންތިމް" އިން ނިތިކިން ދީރު ވެސް ފެނިގެންދާނެއެވެ.
މަހޭޝް މަންޖްރޭކަރުގެ މި ފިލްމު އަންނަ އަހަރަށް އެޅުވުމަށް މަސައްކަތް ކުރަމުން ދިޔަ ނަމަވެސް ސީދާ ތާރީހު އަދި ކަނޑަނާޅާއެވެ.
ސަލްމާން އެންމެ ފަހުން ފެނިގެންދިޔައީ ކެޓްރީނާ އާއެކު "ބާރަތު" އިން ނެވެ. މީގެ އިތުރުން މި އަހަރު ރިލީޒްކުރަން ކުރިން އޮތް ސަލްމާންގެ ފިލްމު "ރާދޭ"ގެ މަސައްކަތްތައް ނިންމާފައި އޮތް ނަމަވެސް ކޯވިޑްގެ ސަބަބުން ފިލްމު އެޅުވުން އަންނަ އަހަރަށް ވަނީ ލަސްކޮށްފައެވެ.
