ފާއިތުވި އޮކްޓޯބަރުމަހުގެ 7 ވަނަ ދުވަހުން ފެށިގެން އިސްރާއީލުން ފަލަސްތީނުގެ ޣައްޒާއަށް ދެމުންދާ އަނިޔާވެރި ހަމަލާތަކުގައި ޝަހީދުވި ފަލަސްތީނު މީހުންގެ އަދަދު 9,061 އަށް އަރައިފިއެވެ.

ހަމައެއާއެކު، ފަލަސްތީނުގެ ހެލްތު މިނިސްޓްރީން ބުނެފައިވަނީ ފާއިތުވި 24 ގަޑިއިރުގެ ތެރޭގައި ޣައްޒާއަށް އިސްރާއީލުން ދީފައިވާ ހަމަލާތަކުގައި އެކަނިވެސް އާންމުގެ 256 މީހުން ޝަހީދުވެފައިވާ ކަމުގައެވެ. އޭގެ އިތުރުން، 2،600 މީހުން ގެއްލިފައިވާކަމުގެ ރިޕޯޓުތައް އަލް ޝިފާ ހޮސްޕިޓަލަށް ވަނީ ލިބިފައެވެ. އޭގެ ތެރޭގައި ގެއްލިފައި، ނުވަތަ ވެއްޓިފައިވާ އިމާރާތްތަކުގެ ދަށުވެފައިވާ 1،150 ކުދިންވެސް ހިމެނޭކަމަށްވެސް އެ ހޮސްޕިޓަލުން ބުނެފައި ވެއެވެ.

އިސްރާއީލުގެ ހަމަލާތަކުގެ ސަބަބުން ގާޒާގެ 16 ހޮސްޕިޓަލެއް މިހާރުވަނީ ބޭނުން ނުކުރެވޭ ހާލަތަށް ގޮސްފައެވެ. އަދި ސިއްޚީ ޚިދުމަތްދޭ 32 ތަނެއްވެސް މިހާރު ވަނީ އޮޕަރޭޓް ނުކުރެވޭ ވަރަށް ހަލާކު ވެފައެވެ.

ތުރުކީގެ ހެލްތު މިނިސްޓަރ ފަހުރެޓިން ކޯސާ ވިދާޅުވެފައިވަނީ، ޣައްޒާގައި ހުރި، ކެންސަރަށް ފަރުވާދޭ ޓާކިޝް-ޕަލެސްޓައިން ފްރެންޑްޝިޕް ހޮސްޕިޓަލް އިސްރާއީލުގެ ހަމަލާތަކާއި ގުޅިގެން މިހާރު ހުއްޓިފައިވާތީ އެ ހޮސްޕިޓަލުގައި ކެންސަރަށް ފަރުވާ ހޯދަމުންދާ މީހުންނަށް އެގައުމަށް ގެންގޮސްގެން ފަރުވާދޭން ތައްޔާރަށް ތިބި ކަމަށެވެ.

ޣައްޒާގައި ކެންސަރަސް ފަރުވާދެމުންދިޔަ ހަމައެކަނި ހޮސްޕިޓަލަކީ މި ހޮސްޕިޓަލެވެ.

7 އޮކްޓޯބަރަށްފަހު ދެގައުމުން މަރުވެފައިވާ މީހުންގެ އަދަދުތައް؛

އިސްރާއީލު:

• 1،405 މީހުން ވަނީ މަރުވެފަ – އޭގެ ތެރޭގައި 333 ކުޑަކުދިންނާއި 58 ޕޮލިސް އޮފިސަރުން ހިމެނޭ
• 5،431 މީހުންނަށް ވަނީ އަނިޔާވެފަ
• ހަމާސްއިން ވަނީ އިސްރާއީލުގެ 242 މީހުން ރަހީނުކޮށްފަ – އޭގެ ތެރޭގައި 30 ކުޑަކުދިން ހިމެނޭ
• 40 މީހަކު ވަނީ ގެއްލިފަ

ފަލަސްތީން: ގާޒާ

• 9061 މީހުންވަނީ ޝަހީދުވެފަ – އޭގެ ތެރޭގައި 3،760 ކުޑަކުދިންނާއި 2،316 އަންހެނުން ހިމެނޭ
• 32،000 މީހުންނަށް ވަނީ އަނިޔާވެފަ – އޭގެ ތެރޭގައި 6،360 ކުޑަކުދިންނާއި 4،891 އަންހެނުން ހިމެނޭ
• 2030 މީހުން ވަނީ ގެއްލިފަ – އޭގެ ތެރޭގައި 1،020 ކުޑަކުދިން ހިމެނޭ
• 4،000 މީހުން އިސްރާއީލުންވަނީ ހައްޔަރުކޮށް ޖަލަށް ލާފައި

ފަލަސްތީނުގެ ހުޅަނގު އައްސޭރި:

• 132 މީހަކުވަނީ ޝަހީދުވެފަ – އޭގެ ތެރޭގައި 39 ކުޑަކުދިންނާއި 1 އަންހެނަކު ހިމެނޭ
• 2،000 މީހަކަށް ވަނީ އަނިޔާވެފަ
• 1،900 މީހުން ހައްޔަރުކޮށް އިސްރާއީލުންވަނީ ޖަލަށް ލާފަ – އޭގެ ތެރެއިން 2 މީހަކުވަނީ ޝަހީދުވެފަ

އިސްރާލުން ފަލަސްތީނަށް ދެމުންދާ ހަމަލާތައް ހުއްޓުމަކަށް އައިސްފައި ނުވާއިރު، އެގައުމުން ހިންގަމުންދާ އިންސާނިއްޔަތާއި ޚިލާފު ޖަރީމާތައް ކުށްވެރިކޮށް ދުނިޔޭގެ އެކި ކަންކޮޅުތަކުގައި ދަނީ މުޒާހިރާތައް ކުރަމުންނެވެ.